Singathantaza Njani Kuze Siviwe NguNkulunkulu?
Nkulunkulu Jehova ‘ungumuvi wemithantazo.’ (Tihlabelelo 65:2) Singakhuluma naye nobe ngabe ngukuphi nobe ngabe kunini, siphumisele nobe sithantaze ngenhlitiyo. Jehova ufuna simbite ‘ngaBabe,’ futsi unguBabe lobendlula bonkhe bobabe. (Matewu 6:9) Ngelutsandvo, Jehova usifundzisa indlela yekuthantaza kuye kute asive.
THANTAZA KUNKULUNKULU JEHOVA EGAMENI LAJESU
“Nakukhona lenikucela kuBabe egameni lami, utaninika kona.”—Johane 16:23.
Lamavi asikhombisa ngalokucacile kutsi Jehova ufuna sithantaze kuye, hhayi ngetitfombe, ngetingilosi, nobe ngebantfu labafile, kodvwa sithantaze egameni laJesu Khristu. Nasithantaza kuNkulunkulu egameni laJesu, sisuke sikhombisa kutsi siyacondza kutsi Jehova uyayiva imithantazo yetfu ngenca yaloko Jesu lasentela kona. Jesu watsi: “Kute umuntfu lota kuBabe ngaphandle kwekutsi ete ngami.”—Johane 14:6.
KHULUMA NGALOKUSUKA ENHLITIYWENI
“Mtjeleni konkhe lokusetinhlitiyweni tenu.”—Tihlabelelo 62:8.
Nasithantaza kuJehova, kufanele sikhulume naye ngendlela lesingakhuluma ngayo nababe wetfu lositsandzako. Kunekutsi sisho umthantazo lobhalwe encwadzini, nobe losilandzelo, kufanele sikhulume naye ngenhlonipho nangalokusuka enhlitiyweni.
THANTAZA NGEKUVUMELANA NENTSANDVO YANKULUNKULU
“Nobe yini lesiyicela kuNkulunkulu levumelana nentsandvo yakhe, yena uyasiva.”—1 Johane 5:14.
EBhayibhelini, Nkulunkulu Jehova usitjela ngaloko latawusentela kona, naloko lafuna simentele kona. Kuze imithantazo yetfu yemukeleke kuNkulunkulu, kufanele sithantaze kuye “ngekuvumelana nentsandvo yakhe.” Ngako kudzingeka sitadishe liBhayibheli kute sitomati kancono. Nasenta njalo, Nkulunkulu utayemukela imithantazo yetfu.
YINI LESINGAYITHANTAZELA?
Thantazela Tidzingo Takho. Singathantazela tidzingo tetfu tamalanga onkhe, lokufaka ekhatsi kudla, kwekwembatsa, nendzawo yekuhlala. Singathantaza sicele kuhlakanipha kute sente tincumo letikahle, siphindze sithantazele emandla ekubeketelela tinkinga. Singaphindze singathantazele kukholwa, intsetselelo, kanye nelusito lwaNkulunkulu.—Lukha 11:3, 4, 13; Jakobe 1:5, 17.
Faka Nalabanye Emithantazweni Yakho. Batali labanelutsandvo bayajabula nangabe bantfwana babo batsandzana. NaJehova uyajabula nangabe natsi njengebantfwana bakhe sitsandzana. Kuyintfo lekahle kutsi sibafake emthantazweni bantfu lesishade noba, bantfwana betfu, imindeni yetfu kanye nebangani betfu. Umfundzi Jakobe wabhala watsi: “Nithantazelane.”—Jakobe 5:16.
Bonga Nkulunkulu Ngalakwentele Kona. Nalikhuluma ngeMdali wetfu, liBhayibheli litsi: “Wativeta kini kutsi ungubani wanehlisela imvula ezulwini, waniletsela netikhatsi tenala waninika nekudla lokunyenti futsi wagcwalisa tinhlitiyo tenu ngenjabulo.” (Imisebenti 14:17) Nasicabanga ngako konkhe Nkulunkulu lasentele kona, sitawufuna kumbonga ngemthantazo. Kuliciniso kutsi kufanele sikhombise ngendlela lesiphila ngayo kutsi siyambonga Nkulunkulu.—Kholose 3:15.
BEKETELA FUTSI UCHUBEKE UTHANTAZA
Ngaletinye tikhatsi singativa sidvumatekile ngenca yekutsi asiyitfoli ngekushesha imphendvulo yemithantazo yetfu lesuka enhlitiyweni. Loko kusho kutsi Nkulunkulu akanendzaba yini natsi? Cha! Cabanga nganasi sibonelo lesilandzelako lesikhombisa kutsi kufanele sichubeke sithantaza.
Steve, lokukhulunywe ngaye esihlokweni sekucala, uyavuma utsi: “Kube bekungasiwo umthantazo, ngabe ngalahlekelwa litsemba lekutsi ngiyoke ngiphindze ngijabule.” Yini leyamsita walungisa simo sakhe sengcodvo ngemthantazo? Wacala kutadisha liBhayibheli futsi wafundza ngekutsi kufanele achubeke athantaza. Steve utsi: “Ngithantaza kuNkulunkulu ngimbonge ngako konkhe kusekelwa lengikutfole kubangani bami lengibatsandzako. Nyalo sengijabula kakhulu kwendlula esikhatsini lesendlulile.”
Kutsiwani ngaJenny, lobekeva shengatsi Nkulunkulu akukafaneli alalele imithantazo yakhe? Utsi: “Ngaletinye tikhatsi nangitiva ngingasilutfo, bengincenga Nkulunkulu kutsi angisite ngicondze kutsi kungani ngitiva ngaleyondlela.” Kwamsita njani loko? Utsi: “Kukhuluma naNkulunkulu kungisite ngatibona ngendlela Yena langibona ngayo, ngabona nekutsi ngisho nobe inhlitiyo yami ingangilahla, yena ngeke aze angilahle. Kuphindze kwangisita kutsi ngingaphelelwa ngemandla.” Ube yini umphumela? Jenny utsi: “Umthantazo ungisite ngabona Jehova njengaBabe lonelutsandvo, Nkulunkulu longinakekelako, nanjengeMngani lotawuhlala angisekela kuphela nje nangenta loko lakufunako.”
Nakabona indvodzana yakhe Gerard ijabulela kuphila ngisho nobe ikhubatekile, Isabel utsi: “Ngiyabona kutsi iyimphendvulo yemithantazo yami”
Cabanga futsi nangaloko lokwenteka ku-Isabel. Ngesikhatsi akhulelwe, bodokotela bamtjela kutsi umntfwana wakhe bekatawutalwa akhubatekile. Weva buhlungu kakhulu. Labanye baze bamkhutsata kutsi asikhiphe lesisu. Utsi: “Ngeva kungatsi ngitawufa ngenca yebuhlungu lebengibuva.” Yini layenta? Isabel utsi: “Ngathantaza tikhatsi letinyenti ngicela Nkulunkulu kutsi angisekele.” Ngekuhamba kwesikhatsi wabeleka indvodzana yakhe, Gerard, futsi beyikhubatekile. Isabel uva ngatsi Nkulunkulu wayiphendvula yini imithantazo yakhe? Yebo! Ngayiphi indlela? Isabel utsi: “Nangibona indvodzana yami leneminyaka lengu-14, ijabulela kuphila ngisho nobe ikhubatekile, ngiyabona kutsi iyimphendvulo yemithantazo yami, sibusiso lesikhulu Nkulunkulu Jehova langiphe sona.”
Lamavi lasuka enhlitiyweni asikhumbuta loko lokwashiwo ngumhlabeleli nakatsi: “Wena Jehova utawusiva sicelo salabatfobekile. Utawucinisa tinhlitiyo tabo futsi ubalalelisise.” (Tihlabelelo 10:17) Lesi sizatfu lesihle sekuchubeka sithantaza!
EBhayibhelini kunemithantazo yaJesu leminyenti, lowatiwa kakhulu, nguloyo lawufundzisa bafundzi bakhe. Yini lesingayifundza kuwo?