Indlela Umthantazo Longakusita Ngayo

Ngesikhatsi agula, Pamela wacela lusito lwabodokotela. Kodvwa waphindze wathantaza kuNkulunkulu kute acele emandla ekubeketelela lesimo lesimatima. Kwamsita yini kuthantaza?

Nakachaza utsi: “Ngesikhatsi ngilashelwa sifo samdlavuza, bengesaba kakhulu. Kodvwa nangithantaza kuNkulunkulu Jehova, bengitiva ngincono futsi ngikhona kucabanga kahle. Ngisabuva buhlungu, kodvwa umthantazo ungisita kutsi ngibe nesimo sengcondvo lesihle. Bantfu nabangibuta kutsi ngitiva njani, ngibatjela kutsi angitiva kahle, kodvwa ngijabulile!”

Kuliciniso kutsi kufanele sithantaze ngaso sonkhe sikhatsi, singalindzeli kutsi timo tize tibe matima. Sonkhe sinato tinkinga, letinkhulu naletincane, futsi sihlale sifuna lusito kute simelane nato. Umthantazo ungasisita yini?

LiBhayibheli litsi: “Lahlela umtfwalo wakho kuJehova, futsi yena utakusita. Ngeke aze avume kutsi lolungile awe.” (Tihlabelelo 55:22) Loku kusidvudvuta kakhulu! Ngako umthantazo ungakusita njani? Nawuthantaza kuNkulunkulu ngendlela lekahle, utakunika loko lokudzingako kute umelane netinkinga lonato.—Buka libhokisi lelitsi “Loko Lotakutfola Nawuthantaza.”

Loko Lotakutfola Nawuthantaza

Kuthula kwengcondvo

“Ticelo tenu atatiwe nguNkulunkulu ngekuthantaza, ngekuncusa nangekubonga; futsi kuthula kwaNkulunkulu lokwendlula konkhe kucondza kutawulondvolota tinhlitiyo netingcondvo tenu ngaKhristu Jesu.” (KubaseFiliphi 4:6, 7) Nawutjela Nkulunkulu tinkinga takho, utakusita ube nekuthula futsi wente tincumo letihlakaniphile ngisho nobe ucindzetelekile.

Kuhlakanipha lokuvela kuNkulunkulu

“Nangabe lomunye wenu eswele kuhlakanipha, akachubeke akucela kuNkulunkulu futsi utawuphiwa kona, ngobe bonkhe ubapha ngesandla lesivulekile futsi ngeke abatfukutselele.” (Jakobe 1:5) Nasicindzetelekile, kuba lukhuni kutsi sente tincumo letihlakaniphile. Nawuthantaza ucela kuhlakanipha, Nkulunkulu angakusita ukhumbule timiso letiseVini lakhe liBhayibheli letingakusita.

Emandla nendvudvuto

“Nginemandla ekwenta tonkhe tintfo ngenca yaloyo longipha emandla.” (KubaseFiliphi 4:13) Ngenca yekutsi Jehova unguNkulunkulu Somandla, angakuniketa emandla ekumelana netinkinga lonato aphindze akucinise ebumatimeni lokubo. (Isaya 40:29) LiBhayibheli liphindze libite Jehova ngekutsi ‘nguNkulunkulu wayo yonkhe indvudvuto.’ Angasidvudvuta “kuko konkhe kuhlupheka.”—2 KubaseKhorinte 1:3, 4.

UNGAKUJABULELA YINI KUSITWA NGUMTHANTAZO?

Kuliciniso kutsi Jehova akakuphoceleli kutsi uthantaze kuye. Kunaloko, ngelutsandvo, ukumema kutsi wente njalo. (Jeremiya 29:11, 12) Kutsiwani nangabe esikhatsini lesendlulile bewuva ngatsi imithantazo yakho ayiphendvulwa? Ungaphelelwa ngemandla. Batali labanelutsandvo kungenteka bangabasiti bantfwana babo ngendlela nangesikhatsi labantfwana labafuna ngaso. Kungenteka kutsi labatali banendlela lencono yekubasita. Kodvwa kunentfo yinye lesiciniseka ngayo: Batali labanelutsandvo bayabasita bantfwana babo.

Nkulunkulu Jehova ungumtali lonelutsandvo lobendlula bonkhe futsi ufuna kukusita. Nawuhlolisisa loko lesesicoce ngako lokuvela eBhayibhelini, futsi wenta konkhe lokusemandleni akho kute ukusebentise ekuphileni kwakho, Nkulunkulu utawuphendvula imithantazo yakho ngendlela lekahle kakhulu!—Tihlabelelo 34:15; Matewu 7:7-11.