Sikhonta Nkulunkulu Lonemusa Lomkhulu

1. Yini lefika engcondvweni nawucabanga ngemuntfu lonemusa?

NASICABANGA ngemuntfu lonemusa, kungenteka sicabange ngemuntfu lonesihawu, lonenhlitiyo lenhle, loneluvelo nalowephanako. Kungenteka sicabange nangendzaba yemSamariya lolungile Jesu lakhuluma ngayo. Lendvodza lebeyiyalesinye sive ‘yaba nemusa’ kulomJuda lebekashaywe tigebengu futsi tamemuka netintfo takhe. LomSamariya ‘wamhawukela’ lomJuda lebekalimele futsi wamnakekela ngelutsandvo. (Luk. 10:29-37) Lendzaba iveta buntfu lobuhle baNkulunkulu wetfu, lokungumusa. Nkulunkulu unemusa ngobe uyasitsandza futsi njalo ngelilanga usikhombisa umusa ngetindlela letehlukahlukene.

2. Nguyiphi lenye indlela lesingakhombisa ngayo umusa?

² Kunalenye indlela umuntfu langakhombisa ngayo kutsi unemusa. Umuntfu lonemusa angakhetsa kungamjezisi umuntfu lokufanele ajeziswe. Nasicabanga ngaloko, Jehova usikhombise umusa. Umhlabeleli watsi: “Indlela lasiphatsa ngayo, ayiyi ngendlela lesona ngayo.” (Hla. 103:10) Kodvwa ngaletinye tikhatsi, Jehova angahle amjezise umuntfu lowonile.

3. Ngumiphi imibuto lesitayiphendvula?

³ Kulesihloko, sitawuphendvula nayi imibuto lemitsatfu: Kungani Jehova akhombisa umusa? Kukhona yini kuhlobana emkhatsini wesijeziso lesicinile kanye nemusa? Yini lengasisita kutsi sikhombise umusa? Asesibone kutsi liVi laNkulunkulu liyiphendvula njani lemibuto.

KUNGANI JEHOVA AKHOMBISA UMUSA?

4. Kungani Jehova akhombisa umusa?

⁴ Jehova uyakutsandza kuba nemusa. Umphostoli Pawula waphefumulelwa kutsi abhale kutsi Nkulunkulu “unesihawu lesikhulu.” Ngesikhatsi asho loku, bekasho kutsi Nkulunkulu unemusa ngobe unike tikhonti takhe letigcotjiwe futsi letinesono litsemba lekuphila ezulwini. (Ef. 2:4-7) Kodvwa Jehova akakhombisi kuphela tikhonti takhe letigcotjiwe umusa. Umhlabeleli Davide wabhala watsi: “Jehova muhle kubo bonkhe, nemusa wakhe uyabonakala kuko konkhe lakwentako.” (Hla. 145:9) Ngenca yekutsi Jehova uyabatsandza bantfu, ubentela umusa ngaso sonkhe sikhatsi nakabona kunesidzingo.

5. Jesu wabona njani kutsi Jehova unemusa?

⁵ Jesu wati kwendlula nobe ngubani kutsi Jehova uyakutsandza kukhombisa umusa. Jehova naJesu bebandzawonye ezulwini sikhatsi lesidze kakhulu ngaphambi kwekutsi Jesu ete emhlabeni. (Taga 8:30, 31) Tikhatsi letinyenti, Jesu bekayibona indlela Babe wakhe bekabakhombisa ngayo umusa bantfu labanesono. (Hla. 78:37-42) Nakafundzisa, Jesu bekavame kukhuluma ngalobuntfu baBabe wakhe lobuhle.

6. Jesu usisita njani sibone kutsi Babe wakhe unemusa?

⁶ Njengobe sibonile esihlokweni lesendlulile, Jesu wasebentisa indzaba lemayelana nendvodzana leyahamba ekhaya kuze asisite sicondze indlela Jehova latsandza ngayo kukhombisa umusa. Lendvodzana yahamba ekhaya futsi ‘yadlabhatisa lifa layo ngekuphila imphilo yekonakala.’ (Luk. 15:13) Ngekuhamba kwesikhatsi, yayekela kutiphatsa kabi, yatitfoba futsi yabuyela ekhaya. Wenta njani babe wayo? Lelijaha lasheshe labona kutsi babe walo bekativa njani. Jesu watsi: “Babe [walendvodzana] wayibona isesekhashane, wayihawukela, wagijima wefika wayigaca futsi wayanga.” Lobabe akazange ayihlaze lendvodzana yakhe. Kunaloko, wayikhombisa umusa, wayicolela futsi wayemukela ekhaya. Lendvodzana beyone kakhulu, kodvwa ngenca yekutsi yaphendvuka, babe wayo wayicolela. Lobabe lonemusa lokukhulunywa ngaye kulendzaba umelela Jehova. Jesu wasebentisa lendzaba kuze asikhombise kutsi Babe wakhe ufuna kubatsetselela labo labonile labaphendvuka mbamba.—Luk. 15:17-24.

7. Indlela Jehova lakhombisa ngayo umusa iveta njani kutsi uhlakaniphile?

⁷ Jehova ukhombisa umusa ngenca yekutsi uhlakaniphe kakhulu. Jehova uhlale enta tincumo letitayilungela indalo yakhe. LiBhayibheli litsi “kuhlakanipha lokuvela ezulwini” kugcwele “umusa netitselo letinhle.” (Jak. 3:17) Njengemtali lonelutsandvo, Jehova uyati kutsi umusa wakhe uyabazuzisa bantfwana bakhe. (Hla. 103:13; Isa. 49:15) Umusa waNkulunkulu ubanika litsemba ngisho banesono. Ngenca yekutsi uhlakaniphe kakhulu, ngaso sonkhe sikhatsi uba nemusa nakunesidzingo. Ngesikhatsi lesifanako, Jehova uyati kutsi kunini lapho kungakafaneli khona abe nemusa. Ngenca yekutsi uhlakaniphile, akawukhombisi umusa nangabe abona kutsi kwenta kanjalo kutawenta kubonakale shengatsi uvumela bubi.

8. Yini lokungahle kudzingeke yentiwe ngaletinye tikhatsi, futsi kungani?

⁸ Asesitsi sikhonti saNkulunkulu sincuma kutiphatsa kabi ngemabomu. Yini tsine lokufanele siyente? Pawula waphefumulelwa kutsi abhale atsi: ‘Yekelani kutihlanganisa naye.’ (1 Khor. 5:11) Labo labonile futsi bangaphendvuki bayayekeliswa kuba BoFakazi BaJehova. Loko kubalulekile kuze kuvikelwe bazalwane nabodzadze labetsembekile futsi kukhombisa kutsi tindlela taJehova tingcwele. Kodvwa labanye bacabanga kutsi kuyekelisa umuntfu kuba nguFakazi akuwuveti umusa waNkulunkulu. Kuliciniso yini loko? Asesibone.

KUYEKELISA UMUNTFU KUBA NGUFAKAZI KUKHOMBISA UMUSA YINI?

9-10. Ngekuvumelana nembhalo waKumaHebheru 12:5, 6, yini lesenta sitsi kuyekelisa lotsite kuba nguFakazi kusento semusa? Fanekisa.

⁹ Nasiva simemetelo emhlanganweni welibandla lesitsi umuntfu lesimatiko nalesimtsandzako “akasesuye Fakazi waJehova,” siva buhlungu kakhulu. Kungenteka sitibute kutsi besikhona yini sidzingo sekumyekelisa kuba nguFakazi. Kuyekelisa umuntfu kuba nguFakazi kukhombisa umusa yini? Yebo. Kungamjezisi umuntfu lokufanele ajeziswe akusiko kuhlakanipha, kute umusa futsi akulukhombisi lutsandvo. (Taga 13:24) Kuyekelisa umuntfu kuba nguFakazi kungamsita yini kutsi aphendvuke? Yebo. Labanyenti labente sono lesikhulu batfole kutsi sincumo lesicinile salabadzala belibandla sibasitile kuze basanguluke, bashintje tento tabo futsi babuyele kuJehova.—Fundza KumaHebheru 12:5, 6.

¹⁰ Cabanga nganangu umfanekiso. Asesitsi umelusi ubona lenye imvu yakhe kutsi iyagula. Uyati kutsi kuze ayelaphe lokugula kufanele ayehlukanise nemhlambi. Nanobe kunjalo, timvu tiyakutsandza kuba naletinye timvu. Tiyakutsandza kuba nemhlambi, futsi atijabuli natehlukaniswe nawo. Kodvwa njengobe umelusi ayehlukanisa naletinye timvu, loku kusho kutsi ute yini luvelo? Unalo. Uyati kutsi nakayivumela ibe naletinye timvu, lokugula kutawutfolwa nanguleti letinye. Ngako, usuke avikela umhlambi nakayehlukanisa nawo.—Catsanisa naLevithikhusi 13:3, 4.

11. (a) Umuntfu loyekelisiwe kuba nguFakazi angafananiswa ngatiphi tindlela nemvu legulako? (b) Ngutiphi tintfo letingentiwa ngumuntfu loyekelisiwe kuba nguFakazi futsi nguluphi lusito langalutfola?

¹¹ UmKhristu loyekelisiwe kuba nguFakazi singamfananisa nalemvu legulako. Ufana nemuntfu logulako ngobe buhlobo bakhe naJehova busuke bulimele. (Jak. 5:14) Njengobe nemuntfu logulako angabatselela labanye lokugula, kanjalo nemuntfu lolinyalelwe buhlobo bakhe naJehova, angenta labanye kutsi bente tintfo letimbi. Ngako ngaletinye tikhatsi kungahle kudzingeke kutsi umuntfu lonjalo ayekeliswe kuba nguFakazi. Lesijeziso siyindlela Jehova lakhombisa ngayo kutsi uyawutsandza umhlambi wakhe lowetsembekile futsi singahle sisite lona lowonile abone kutsi wente intfo lembi futsi aphendvuke. Nakaseyekelisiwe kuba nguFakazi, angaba khona emihlanganweni yelibandla, lapho angatfola khona ticondziso letiseBhayibhelini futsi aphindze acinise kukholwa kwakhe. Angatfola tincwadzi kuze atidadishele aphindze abukele neMsakato we-JW. Njengobe labadzala belibandla babona enta lushintjo, bangahle bamnikete seluleko nesicondziso lesingamsita kuze aphindze abe nebuhlobo lobuhle naNkulunkulu, kuze abuyiselwe abe nguFakazi waJehova.b

12. Yini lengentiwa ngulabadzala belibandla kumuntfu lowente sono futsi longaphendvuki lekhombisa lutsandvo nemusa?

¹² Kubalulekile kukhumbula kutsi toni letingaphendvuki letiyekeliswako kuba boFakazi. Labadzala belibandla bayati kutsi lena yindzaba lematima, futsi abafuni kuyitsatsela phasi. Bayati kutsi Jehova ujezisana “ngendlela lefanele.” (Jer. 30:11) Bayabatsandza bazalwane babo, futsi abafuni kwenta intfo letawulimata buhlobo babo naJehova. Kodvwa ngaletinye tikhatsi, kuyekelisa umuntfu kuba nguFakazi sikhatsi lesitsite, kusento lesikhombisa lutsandvo nemusa.

13. Yini leyenta kwaba nesidzingo sekutsi lomunye umKhristu asuswe ebandleni?

¹³ Cabanga ngaloko lokwentiwa ngumphostoli Pawula kulomunye umuntfu lowenta sono futsi wangaphendvuki. Lomunye umKhristu eKhorinte bekatiphatsa kabi nemfati wababe wakhe. Lena bekuyintfo lembi kakhulu! Mayelana naloku, Jehova bekatjele ema-Israyeli watsi: “Indvodza leya ecansini nemfati wababe wayo, isuke ihlazise babe wayo. Ngako lendvodza nalomfati kufanele babulawe.” (Lev. 20:11) Kuliciniso kutsi Pawula bekangeke atjele libandla kutsi liyibulale lendvodza. Kodvwa Pawula watjela libandla kutsi liyisuse emkhatsini walo. Lentfo lembi lebeyentiwa ngulendvodza beyililimata libandla ngobe labanye bebangacabangi kutsi yenta sono lesikhulu!—1 Khor. 5:1, 2, 13.

14. Pawula wayikhombisa njani umusa lenye indvodza lebeyisusiwe ebandleni laseKhorinte, futsi kungani? (2 KubaseKhorinte 2:5-8, 11)

¹⁴ Ngekuhamba kwesikhatsi, Pawula weva kutsi lendvodza yente lushintjo lolukhulu. Lesoni besiphendvuke mbamba! Nanobe lendvodza beyilihlazisile libandla, Pawula watjela labadzala kutsi bekangafuni kusebentisa “emavi lacinile.” Watsi kubo: “Nimtsetselele ngemusa futsi nimdvudvute.” Naka kutsi kungani Pawula asho njalo, watsi: “Kuze kungenteki kutsi ngandlela tsite ancotjwe kuva buhlungu lobukhulu.” Pawula wayivela lendvodza lebeseyiphendvukile. Bekangafuni kutsi itive idvumateke kakhulu nobe ive buhlungu kakhulu ngaloko beyikwentile ize iyekele kucela kutsetselelwa.—Fundza 2 KubaseKhorinte 2:5-8, 11.

15. Labadzala belibandla bangasiniketa njani sijeziso lesicinile babe ngesikhatsi lesifanako banemusa?

¹⁵ NjengaJehova, labadzala belibandla bayakutsandza kukhombisa umusa. Batawuniketa sijeziso lesicinile nakudzingekile, kodvwa babe nemusa nakungenteka. Nangabe labadzala belibandla bangamjezisi umuntfu lowonile, basuke bangamkhombisi umusa kodvwa basuke bavumela bubi kutsi buchubeke. Ngulabadzala belibandla kuphela yini lokufanele bakhombise umusa?

YINI LENGENTA KUTSI SONKHE SIBE NEMUSA?

16. Ngekusho kweTaga 21:13, yini Jehova latawuyenta kulabo labangabakhombisi labanye umusa?

¹⁶ Onkhe emaKhristu etama kuba nemusa njengaJehova. Kungani? Lesinye sizatfu kutsi Jehova angeke abalalele labo labangabakhombisi labanye umusa. (Fundza Taga 21:13.) Sonkhe sifuna kutsi Jehova ayilalele imithantazo yetfu, ngako siyakugwema kuba bete umusa. Kunekutsi singamlaleli umzalwane wetfu losebuhlungwini, sifuna kuhlale simlalela “loweswele nakakhalela lusito.” Sifuna kuhlale sisisebentisa leseluleko lesiphefumulelwe lesitsi: “Loyo longawukhombisi umusa utawehlulelwa ngaphandle kwemusa.” (Jak. 2:13) Nangabe sitfobekile futsi sikhumbula kutsi sikudzinga kangakanani kukhonjiswa umusa, manyenti ematfuba ekutsi natsi sikhombise labanye umusa. Sifuna kukhombisa umusa nangabe soni lesiphendvukile sibuya ebandleni.

17. INkhosi Davide yakhombisa njani kutsi beyinemusa?

¹⁷ Tibonelo letiseBhayibhelini tingasisita kutsi sikhombise umusa futsi sikugweme kuba bete luvelo. Cabanga ngeNkhosi Davide. Beyivame kubakhombisa umusa labanye. Nanobe Sawula bekafuna kuyibulala, yaba nemusa kulenkhosi legcotjiwe yaNkulunkulu, ayizange ifune kutiphindziselela futsi ifune kuyilimata.—1 Sam. 24:9-12, 18, 19.

18-19. Ngutiphi tikhatsi letimbili lapho Davide ehluleka khona kuba nemusa?

¹⁸ Nanobe kunjalo, Davide bekahle aba bete umusa. Nasi sibonelo, Nabali, lebekayindvodza lengakalungi, futsi leyedzelelako, wala kunika Davide nemadvodza lebekahamba nawo kudla. Davide watfukutsela wabila futsi wafuna kubulala yena kanye nawo onkhe emadvodza lebekasemndenini wakhe. Kodvwa Abigayili, lobekangumfati waNabali, bekanemusa futsi anesineke, ngako ngekushesha walungiselela Davide kudla. Davide wabese akasambulali Nabali kanye nemadvodza lebekasemndenini wakhe.—1 Sam. 25:9-22, 32-35.

¹⁹ Ngalelinye lilanga, umphrofethi Nathani wacocela Davide indzaba lemayelana nalenye indvodza lenjingile leyatsatsa imvu lekuphela kwayo yamakhelwane wayo lophuyile. Davide watfukutsela kakhulu watsi: “Ngifunga Jehova Nkulunkulu lophilako ngitsi lendvodza leyente loko kufanele ife noma kanjani!” (2 Sam. 12:1-6) Davide bekawati uMtsetfo waMosi. Umuntfu lowebe imvu bekufanele akhiphe timvu letine esikhundleni sayo. (Eks. 22:1) Bekufanele yini vele lendvodza ibulawe? Loko Davide lakusho bekukhombisa kutsi ute luvelo. Nathani wasebentisa lendzaba kuze asite Davide abone kutsi bekente tono letimbi kakhulu! Jehova wakhombisa kuba nemusa lomkhulu kakhulu kuDavide kunendlela yena lebekatawenta ngayo kulendvodza leyebe imvu lekulomfanekiso waNathani!—2 Sam. 12:7-13.

20. Yini lesingayifundza esibonelweni saDavide?

²⁰ Naka kutsi ngesikhatsi Davide atfukutsele kakhulu, wancuma kubulala Nabali nawo onkhe emadvodza lebekasemndenini wakhe. Ngekuhamba kwesikhatsi, Davide watsi lendvodza lesemfanekisweni waNathani bekufanele ibulawe. Kuloku kwesibili, singahle sitibute kutsi kungani indvodza lenemusa njengaye beyingakhipha sehlulelo lesite luvelo ngalendlela. Cabanga ngendlela Davide lebekativa ngayo. Ngaleso sikhatsi, bekativa anelicala. Nangabe umuntfu ete luvelo nakehlulela labanye, loko kukhombisa kutsi buhlobo bakhe naJehova bulimele. Jesu wecwayisa balandzeli bakhe watsi: “Yekelani kwehlulela labanye, kuze nani ningatowehlulelwa, ngobe ngendlela lenehlulela ngayo labanye, nani nitakwehlulelwa ngayo.” (Mat. 7:1, 2) Ngako kufanele sente konkhe lokusemandleni etfu kuze sigweme kuba bete luvelo futsi silwele kuba ‘nesihawu lesikhulu’ njengaNkulunkulu wetfu.

21-22. Ngutiphi letinye tindlela lesingakhombisa ngato umusa?

²¹ Kuba nemusa akugcini nje ngekuvela labanye. Bantfu labanemusa basita labanye. Ngako sonkhe singabuka bantfu lesingabasita emindenini yetfu, ebandleni, nasendzaweni yangakitsi. Sitawutfola kutsi manyenti ematfuba ekukhombisa umusa! Ukhona yini lodzinga kudvudvutwa? Kukhona yini lesingamsita ngako njengekumupha kudla nobe kumsita ngaletinye tindlela? UmKhristu losandza kubuyiselwa kuba nguFakazi udzinga umngani lotamdvudvuta yini futsi amkhutsate? Singabacocela yini labanye tindzaba letimnandzi letidvudvutako? Lena ngulenye indlela yekukhombisa umusa kunobe ngubani lesihlangana naye.—Jobe 29:12, 13; Rom. 10:14, 15; Jak. 1:27.

²² Nangabe sibona kutsi labanye bayakudzinga loko, sitawubona kutsi manyenti ematfuba ekukhombisa labanye umusa. Nasikhombisa umusa, simjabulisa kakhulu Babe wetfu wasezulwini, longuNkulunkulu ‘lonesihawu lesikhulu’!