Kulungisa Buhlobo Bakho NaJehova

NJALO ngemnyaka, banyenti bantfu lababuyiselwa kutsi baphindze babe boFakazi. Cabanga ngekutsi iba ngakanani ‘injabulo ezulwini’ njalo nje nakubuyiselwa umuntfu! (Luk. 15:7, 10) Nangabe ubuyiselwe, ciniseka kutsi Jesu, tingilosi naJehova bajabula kakhulu ngekutsi sewuphindze uyincenye yelibandla. Nobe kunjalo, ungabhekana netinkinga njengobe ulungisa buhlobo bakho naJehova. Ngutiphi letinye tato, futsi yini lengakusita?

NGUTIPHI TINKINGA LONGABHEKANA NATO?

Labanyenti bativa badvumatekile ngisho nobe sebabuyile ebandleni. Mhlawumbe uyayicondza indlela iNkhosi Davide lebeyitiva ngayo. Ngisho nobe beseyitsetselelwe emaphutsa ayo, yatsi: “Emaphutsa ami semanyenti kakhulu.” (Hla. 40:12; 65:3) Ngisho nobe umuntfu sekabuyele kuJehova, kungaphela iminyaka solo ativa anelicala nobe anemahloni. Isabelle, lokwaphela iminyaka lengetulu kwalengu-20 ayekelisiwe kuba nguFakazi,a utsi: “Bengikutfola kumatima kwemukela kutsi Jehova angangicolela.” Nawudvumatekile, buhlobo bakho naJehova bungaphindze bube butsakatsaka. (Taga 24:10) Ungakuvumeli loko kutsi kwenteke kuwe.

Labanye bakhatsateka ngekutsi kungenteka bangakhoni kwenta lokudzingeka kutsi bakwente kuze baphindze babe nebuhlobo lobuhle naJehova. Ngemuva kwekubuyiselwa kutsi abe nguFakazi, Antoine watsi: “Besengikhohlwe tintfo letinyenti lebengitifundzile nobe lebengitenta ngisengakayekeliswa kuba nguFakazi.” Ngenca yekutiva ngalendlela, labanye babese abamenteli Jehova konkhe lokusemandleni abo.

Nasi sibonelo, ase sitsi likhaya lalotsite libhidlitwe siphepho lesinemandla, lomnikati walelikhaya angativa advumatekile nakacabanga ngemsebenti lomnyenti lokufanele awente kuze alakhe kabusha. Ngendlela lefanako, nangabe buhlobo bakho naJehova bulinyetwe sono lesikhulu losentile, ungahle uve shengatsi kudzingeka usebente kamatima kuze ulungise buhlobo bakho naye. Kodvwa ungalutfola lusito.

Jehova uyasicela utsi: “Buyani, asilungiseni tindzaba emkhatsini wetfu.” (Isa. 1:18) Sewuvele usebente kamatima kuze ‘nilungise tindzaba.’ Jehova uyakutsandza ngenca yekutsi wente loko. Cabanga ngaloku: Ngenca yekutsi ubuyele kuJehova, angasebentisa sibonelo sakho kuze akhombise Sathane kutsi unemanga!—Taga 27:11.

Ngekwenta loko, sewusondzele kuJehova futsi naye wetsembisa kutsi utawusondzela kuwe. (Jak. 4:8) Nobe kunjalo, kusenalokunyenti lokufanele ukwente ngetulu nje kwekutsi labanye babone kutsi sewubuyile ebandleni. Kufanele uchubeke umtsandza kakhulu Jehova longuBabe wakho neMngani wakho. Ungakwenta njani loko?

TIBEKELE IMIGOMO LONGAKHONA KUYIFINYELELA

Yetama kutibekela imigomo longakhona kuyifinyelela. Kungenteka usatikhumbula tintfo letisisekelo lowatifundza ngaJehova kanye nesetsembiso sakhe seliPharadisi. Kodvwa nyalo kudzingeka uphindze ube neluhlelo loluhle lolufaka ekhatsi kushumayela njalo, kuya emihlanganweni kanye nekucitsa sikhatsi nebazalwane nabodzadze. Cabanga nganayi imigomo longatibekela yona.

Khuluma naJehova njalo. Babe wakho uyati kutsi nangabe uchubeka utiva unelicala ngalokubi lowakwenta, loko kungahle kwente kutsi kube matima kuthantaza kuye. (Rom. 8:26) Nobe kunjalo, ‘phikelela emthantazweni,’ umtjele kutsi ukufuna kangakanani kuba ngumngani wakhe. (Rom. 12:12) Andrej utsi: “Bengitiva nginelicala futsi nginemahloni kakhulu. Kodvwa njalo nje nangicedza kuthantaza bengitiva ngincono. Bengitiva nginekuthula lokukhulu.” Nangabe ungati kutsi uthantazele ini, cabanga ngemithantazo leyashiwo yiNkhosi Davide lebeyiphendvukile lebhalwe kuTihlabelelo 51 na-65.

Lidadishe njalo liBhayibheli. Loko kutakusita kutsi ube nekukholwa lokucinile futsi utamtsandza kakhulu Jehova. (Hla. 19:7-11) Felipe utsi: “Ngenca yekutsi bengite luhlelo lwekufundza liBhayibheli nekulidadisha, ngaba butsakatsaka futsi ngadvumata Jehova. Angifuni kuphindze ngimdvumate Jehova, ngako ngilidadisha njalo liBhayibheli.” Nawe ungenta intfo lefanako. Nangabe udzinga lusito kuze ukhetse tihloko longatidadishela tona, ungacela umngani lovutsiwe kutsi akusite.

Phindze ucinise buhlobo bakho nebazalwane nabodzadze. Labanye lababuyela ebandleni bakhatsateka ngekutsi labanye angeke babemukele kahle. Larissa utsi: “Benginemahloni kakhulu. Bengiva shengatsi ngibadvumatile bazalwane nabodzadze. Kwaphela sikhatsi lesidze ngitiva ngalendlela.” Ciniseka kutsi labadzala belibandla kanye nalabanye labavutsiwe ebandleni batimisele kukusita kutsi uphindze ube nebuhlobo lobuhle naJehova. (Buka libhokisi lelitsi “Yini Lengentiwa Ngulabadzala Belibandla?”) Bayajabula ngekutsi ubuyile futsi bafuna kutsi nawe ujabule!—Taga 17:17.

Yini lengakusita kutsi usondzelane nebazalwane nabodzadze? Bani khona kuyo yonkhe imihlangano yelibandla futsi ube khona njalo emsebentini wekushumayela. Kutakusita ngani loko? Felix watsi: “Libandla belilindzele kutsi ngibuye. Ngativa ngitsandvwa. Bonkhe bangisita kutsi ngitive ngiyincenye yelibandla, ngibone kutsi Jehova ungitsetselele nekutsi ngingachubeka ngimkhonta.”—Buka libhokisi lelitsi “Yini Longayenta?”

UNGAPHELI EMANDLA!

Sathane utawuchubeka akubangela tinkinga letinyenti kuze etame kukucedza emandla njengobe ulungisa buhlobo bakho naJehova. (Luk. 4:13) Hlale ukulungele loko ngekutsi ucinise buhlobo bakho naJehova nyalo.

Akhuluma ngemvu yakhe, Jehova utsi: “Imvu lelahlekile ngitayifuna, naledukile ngitayibuyisa, nalelimele ngitayibhandisha, futsi lebutsakatsaka ngitayinika emandla.” (Hez. 34:16) Jehova usite labanyenti kutsi baphindze babe nebuhlobo lobuhle naye. Ciniseka kutsi ufuna kukusita nawe kutsi uchubeke wakha buhlobo lobucinile naye.

Yini Lengentiwa Ngulabadzala Belibandla?

Kunyenti lokungentiwa ngulabadzala belibandla kuze basite bamemeteli lababuyiselwe kuba boFakazi kutsi baphindze bacinise buhlobo babo naJehova. Naka naku labangakwenta.

Bacinisekiseni. Umphostoli Pawula bekati kutsi labo lababuyele kuJehova ‘bangancotjwa kuva buhlungu lobukhulu.’ (2 Khor. 2:7) Bangahle bative banemahloni futsi badvumatekile. Pawula weluleka libandla watsi: ‘Mtsetseleleni ngemusa futsi nimdvudvute.’ Labo lababuyiselwe kuba boFakazi badzinga kucinisekiswa kutsi Jehova kanye nebazalwane babo nabodzadze babatsandza kakhulu. Nangabe labadzala belibandla bahlale babancoma futsi babasita, loko kungabenta kutsi bangadvumateki.

Thantazani nabo. “Kuncusa kwemuntfu lolungile kunemandla kakhulu.” (Jak. 5:16) Larissa utsi: “Ngatjela labadzala belibandla ngaloko bekungenta ngingabate futsi ngesabe. Bathantaza nami. Loko kwangenta ngabona kutsi bebangakangitfukutseleli. Bebafuna kungisita kutsi ngiphindze ngibe nebuhlobo lobuhle naJehova.” Theo utsi: “Imithantazo yalabadzala belibandla yangicinisekisa kutsi Jehova ungitsandza mbamba nekutsi ubona lokuhle kimi, hhayi nje lokubi kuphela.”

Banini bangani babo. Labo lababuyiselwe kutsi babe boFakazi bayabadzinga bangani ebandleni. Lomunye lomdzala welibandla lokutsiwa nguJustin, utsi: “Funani ematfuba ekushumayela kanye nabo futsi niciniseke kutsi niyabavakashela emakhaya abo. Bungani bubaluleke kakhulu kubo!” Lomunye lomdzala welibandla lokutsiwa nguHenry, utsi: “Nangabe labanye ebandleni babona labadzala belibandla bakha bungani nalaba lababuyiselwe kuba boFakazi, nabo batawenta lokufanako.”

Basiteni kutsi badadishe. Umngani lovutsiwe angasita losandza kubuyiselwa kuba nguFakazi kutsi abe neluhlelo loluhle lwekudadisha. Lomunye lomdzala welibandla lokutsiwa nguDarko, utsi: “Ngiyatsandza kubacocela tintfo letikhutsatako lengititfolile nangitidadishela liBhayibheli futsi ngibakhombise kutsi ngikujabulela kanganani kutidadishela liBhayibheli. Ngiphindze ngihlele kutsi ngidadishe nabo tihloko letitabakhutsata.” Lomunye lomdzala welibandla lokutsiwa nguClayton, utsi: “Ngibakhutsata kutsi bafune tindzaba letiseBhayibhelini letifana nesimo labake baba kuso.”

Beluseni. Lababuyiselwe kuba boFakazi bababonile labadzala belibandla baba behluleli. Nyalo, lokubaluleke kakhulu kubo kubabona njengebelusi. (Jer. 23:4) Balalelisise, futsi uhlale ukulungele kubancoma. Hlale ukhuluma nabo. Naka naku lokwentiwa ngulomunye lomdzala welibandla lokutsiwa nguMarcus, nakavakasha ayowelusa: “Sifundza nabo umBhalo, sibancome, sibacinisekise ngekutsi siyajabula ngekutsi basebente kamatima kuze babuyele kuJehova, futsi naye ujabula kakhulu ngaloko. Nase sicedzile, sibeka lilanga lesitawuphindze sibuye ngalo.”

a Emagama ebantfu lakulesihloko ashintjiwe.