INDLELA YEKUNCAMULA UMJIKELETO WENZONDO

2 | Ungatiphindziseleli

Lokufundziswa LiBhayibheli:

“Ningaphindziseli lokubi ngalokubi kulabanye. . . . Nakungenteka, yentani konkhe lokusemandleni enu kuze nibe nekuthula nabo bonkhe bantfu. . . Ningatiphindziseleli. . . ngobe kubhaliwe kwatsiwa: ‘Jehova utsi: “Kuphindzisela kwami, ngimi lengitawuphindzisela.”’”—KUBASEROMA 12:17-19.

Lokuchazwa NgulomBhalo:

Ngisho nobe kuyintfo levamile kutsi umuntfu nakasivise buhlungu sifune kutiphindziselela, kodvwa Nkulunkulu akafuni sitiphindziselele. Kunaloko, ufuna silindze yena ngobe madvutane utakucedza konkhe kungalungi.—Tihlabelelo 37:7, 10.

Loko Longakwenta:

Nangabe bantfu labanesono betama kutiphindziselela, loko kutawubenta bazondane kakhulu. Ngako nangabe lomunye asivise buhlungu, akukafaneli sitiphindziselele. Kufanele setame kwakha kuthula futsi silawule indlela lesitiva ngayo. Ngaletinye tikhatsi kuncono kakhulu kutsi sikwendlulise loko lokusivise buhlungu. (Taga 19:11) Nobe kunjalo, ngaletinye tikhatsi kungaba kuhle kutsi sikubike loko lokwentekile. Sibonelo nje, singawabikela emaphoyisa nobe labanye labasemagunyeni nangabe kunebugebengu lobentekile.

Kutiphindziselela kulimata tsine

Yini lokufanele uyente nangabe kubonakala shengatsi kute indlela yekulungisa lenkinga ngekuthula? Yini lokufanele uyente nangabe sewente konkhe lokusemandleni akho kuze ulungise lenkinga ngekuthula, kodvwa wangaphumeleli? Ungatiphindziseleli ngobe loko kutawenta lesimo sibe sibi nakakhulu. Kunaloko, ncoba inzondo ngekutsi ufundze kwetsembela endleleni Nkulunkulu lalungisa ngayo tinkinga. “Yetsembela kuye, futsi yena utakusita.”—Tihlabelelo 37:3-5.

Lokwenteke Ekuphileni Kwebantfu—ADRIÁN

Wancoba Sifiso Sekutiphindziselela

Ngesikhatsi asemusha, Adrián bekaneludlame futsi atsandza kulwa kuze atiphindziselele kulabo lebebamvise buhlungu. Utsi: “Bengivame kuba khona nakudutjulwana futsi emahlandla lamanyenti bengitikhandza ngisesitibeni sengati ngophela kufa etigangeni.”

Nakaneminyaka lengu-16, Adrián wacala kufundza liBhayibheli. Utsi: “Njengobe ngichubeka nekufundza liBhayibheli ngasibona sidzingo sekwenta tingucuko ekuphileni kwami.” Bekudzingeka ayekele inzondo kanye nebudlova. Watsintfwa kakhulu nguloko lakufundza KubaseRoma 12:17-19 lotsi ningatiphindziseleli. Utsi: “Ngabese ngiyakwemukela kutsi Jehova utatilungisa tintfo ngendlela yakhe nangesikhatsi sakhe. Kancane kancane ngayiyekela lemphilo yebudlova.”

Ngalenye intsambama, Adrián wahlaselwa bafana labasecenjini lebekavame kulwa nalo. Umholi walo wamemeta watsi: “Tivikele!” Adrián uyavuma utsi: “Ngativa ngifutfumala kutsi angitiphindziselele.” Kodvwa esikhundleni sekutsi atiphindziselele, Adrián washaya umthantazo lomcane kuJehova futsi wabaleka.

Adrián uchubeka utsi: “Ngakusasa ngahlangana nalomholi walelicembu. Ngafisa kumbamba ngetandla kodvwa ngaphindze ngacela Jehova kutsi angisite ngitibambe. Lokwangimangalisa kutsi lelijaha leta kimi latsi: ‘Ngicela ungicolele ngalokwenteke itolo ebusuku. Nangikhuluma liciniso, nami ngiyafisa kuba njengawe. Ngifuna kufundza liBhayibheli.’ Kwangijabulisa kakhulu kutsi ngakhona kutibamba! Umphumela waloko waba kutsi sabese sicala kufundza liBhayibheli ndzawonye.”