INDLELA YEKUNCAMULA UMJIKELETO WENZONDO

1 | Ungakhetsi

Lokufundziswa LiBhayibheli:

“Nkulunkulu akakhetsi, kodvwa wonkhe umuntfu lomesabako nalowenta kulunga uyemukeleka kuye ngisho nobe asive sini.”—IMISEBENTI 10:34, 35.

Lokuchazwa NgulomBhalo:

Nkulunkulu Jehovaa akasehluleli ngekwebuve, buhlanga, libala lesikhumba nobe emasiko etfu. Kunaloko, ubuka lokubaluleke kakhulu, loko lesingiko ngekhatsi. LiBhayibheli litsi, “bantfu babuka lokubonakala ngephandle, kodvwa Jehova ubona lokusenhlitiyweni.”—1 Samuweli 16:7.

Loko Longakwenta:

Ngisho nobe singakhoni kubona loko bantfu labangiko ngekhatsi, singazama kulingisa Nkulunkulu ngekutsi natsi singakhetsi. Yetama kungabuki bantfu njengelicembu, kodvwa buka loko umuntfu ngamunye langiko. Nangabe uva shengatsi awubatsandzi bantfu balobunye buhlanga nobe buve, thantaza kuNkulunkulu umcele akusite uyekele kutiva ngaleyondlela. (Tihlabelelo 139:23, 24) Nangabe umcela ngalokusuka enhlitiyweni Jehova kutsi akuphe emandla kuze ungakhetsi, ungaciniseka kutsi utawulalela umthantazo wakho futsi akusite.—1 Phetro 3:12.

a Jehova libito laNkulunkulu.—Tihlabelelo 83:18.

“Bengingakase ngihlale phansi ngekuthula nemlungu, ingasaphatfwa-ke yekuyodla naye ekhaya lakhe. Manje bese ngililunga lemndeni webazalwane mbamba labasemhlabeni wonkhe.”—TITUS

Lokwenteke Ekuphileni Kwebantfu—TITUS

Wancoba Umjikeleto Wenzondo

Titus bekalilunga lelicembu lelinebudlova lebelitfukutseliswe yimitsetfo lecindzetelako yelubandlululo. Utsi: “Besiya etindzaweni letisedolobheni lapho bantfu labamnyama bebangakavumeleki kutsi baye kuto, njengasemahhotela nasemabhareni kuze nje siyokulwa.” Titus uyavuma kutsi loko bekakwenta ngenca yenzondo. Uchubeka atsi: “Nakwenteka ngihhwilitisane nemuntfu, indvodza nobe wesifazane, bekuba ngimi loshaya kucala.”

Titus washintja nakacala kufundza liBhayibheli naBoFakazi BaJehova. Kufundza liBhayibheli kwamenta wacabanga ngendlela leyehlukile. Watsintfwa kakhulu setsembiso selive lelisha lapho khona ‘kufa kungeke kusaba khona, futsi kulila kukhala kanye nebuhlungu nako kungeke kusaba khona.’—Sembulo 21:3, 4.

Ekucaleni, Titus wakutfola kumatima kuyekela kuzonda labanye. Utsi: “Bekumatima kakhulu kushintja indlela lebengenta nalebengicabanga ngayo.” Kodvwa wasitwa nguloko lakufundza ku-Imisebenti 10:34, 35, lotsi Nkulunkulu akakhetsi.

Waba yini umphumela? Titus uyachaza: “Nangibona indlela BoFakazi BaJehova labatsandzana ngayo ngisho babebuve Iobungafani, nelibala lelingafani, ngaciniseka kutsi bayinkholo yeliciniso. Ngisho nangaphambi kwekutsi ngibhajatiswe ngibe nguFakazi, umzalwane lomhlophe lebesinaye ebandleni wangimema kutsi ngiyodla naye ekhaya lakhe. Bekungatsi ngiyaphupha. Bengingakase ngihlale phansi ngekuthula nemlungu, ingasaphatfwa-ke yekuyodla naye ekhaya lakhe. Manje bese ngililunga lemndeni webazalwane mbamba labasemhlabeni wonkhe.”