INDLELA YEKUNCAMULA UMJIKELETO WENZONDO

3 | Khipha Inzondo Engcondvweni Yakho

Lokufundziswa LiBhayibheli:

“Gucukani ngekutsi nishintje tingcondvo tenu, kuze nititfolele nine loko lokuyintsandvo yaNkulunkulu, nikwati lokuhle, lokwemukelekako nalokuphelele.”—KUBASEROMA 12:2.

Lokuchazwa NgulomBhalo:

Nkulunkulu unendzaba nekutsi sicabangani. (Jeremiya 17:10) Sidzinga lokungetulu nje kwekumane sibalekele kusho nobe kwenta tintfo letikhombisa inzondo. Inzondo icala etintfweni lesiticabangako nasenhlitiyweni. Ngako-ke kufanele sikuyekele ngekushesha kucabanga ngetintfo letisenta sibe nenzondo. Ngulena kuphela indlela lengasisita ‘sigucuke’ mbamba futsi siyekele kuzondana.

Loko Longakwenta:

Hlolisisa indlela lotiva ngayo ngalabanye bantfu, ikakhulukati labo balobunye buhlanga nobe buve. Tibute: ‘Ngibatsatsa njani? Indlela lengibatsatsa ngayo isekelwe kuloko lengikwatiko yini ngabo nobe isekelwe elubandlululweni?’ Tibalekele tekuchumana, ema-movie, nobe tintfo tekutijabulisa letikhutsata inzondo kanye nebudlova.

LiVi laNkulunkulu lingasisita sincobe inzondo etingcondweni kanye nasetinhlitiyweni tetfu

Akusimelula kwehlulela indlela lesitiva ngayo nobe lesicabanga ngayo ngaphandle kwekutivikela, kodvwa liVi laNkulunkulu lingasisita “sicondze imicabango netinhloso tenhlitiyo.” (KumaHebheru 4:12) Ngako chubeka uhlolisisa liBhayibheli, ucatsanise loko lelikufundzisako nendlela locabanga ngayo, futsi wente konkhe lokusemandleni akho kuze uvumelanise indlela locabanga ngayo naloko lelikufundzisako. LiVi laNkulunkulu lingasisita sincobe inzondo “lembelwe yacina” etingcondvweni kanye nasetinhlitiyweni tetfu.—2 KubaseKhorinte 10:4, 5.

Lokwenteke Ekuphileni Kwebantfu—STEPHEN

Washintja Indlela Lebekacabanga ngayo

Stephen kanye nemalunga emndeni wakhe bebatondvwa belungu. Ngenca yaloko wayengeka kutsi ajoyine licembu letepolotiki lebelilwela emalungelo ebantfu. Ngekuhamba kwesikhatsi wabese wenta bugebengu lobuhambisana nenzondo. Stephen utsi: “Ngaletinye tikhatsi, nginebangani bami besibukela emafilimu lebekakhombisa indlela bantfu labamnyama labebagcilatwa ngayo eMelika. Sicansulwe nguloko lebesikubukele, besishaya bontsanga yetfu lababelungu lebesibukela nabo lamafilimu. Ngemuva kwaloko besiya etindzaweni letibomakhelwane, sitfungatsa labanye belungu lesingabashaya.”

Indlela Stephen bekacabanga ngayo yashintja kakhulu nakacala kutadisha liBhayibheli naBoFakazi BaJehova. Utsi: “Njengobe ngakhula ngesikhatsi selubandlululo, indlela lebebaphila ngayo boFakazi yangimangalisa. Ngikhumbula ngalelinye lilanga lomunye umzalwane longumlungu washiya bantfwana bakhe emndenini webazalwane labamnyama ngesikhatsi aye ngesheya kwetilwandle. Ngikhumbula nangesikhatsi lomunye umzalwane lomnyama eswele indzawo yekuhlala lomunye umndeni walabamhlophe wamhlalisa.” Loku kwenta Stephen waciniseka kutsi BoFakazi BaJehova babazalwane labanelutsandvo Jesu latsi batawuba khona.—John 13:35.

Yini leyenta Stephen kutsi ayekela budlova kanye nekutondza labanye? Wasitwa ngumbhalo waKubaseRoma 12:2. Stephen utsi: “Ngabona kutsi kudzingeka ngishintje indlela lengicabanga ngayo. Bekufanele ngishintje ingcondvo yami hhayi nje kuphela kute ngibe nekuthula nalabanye kodvwa ngobe lena bekuyindlela lencono kakhulu yekuphila.” Manje sekuphele iminyaka lengu-40 Stephen ajabulela imphilo lete inzondo.