UMbuso WaNkulunkulu Sewuyabusa!

1. Yini lesingaciniseka ngayo, futsi leni?

NAWUBUKA timo letikhona lamuhla emhlabeni, ukutfola kumatima yini kwetsemba kutsi timo titawuba ncono? Lutsandvo emkhatsini wemalunga emndeni seluyancipha. Bantfu sebaba nebudlova kakhulu, baticabangela bona futsi baneludlame. Labanyenti bakutfola kumatima kwetsemba labo labasemagunyeni. Kodvwa loku kungakwenta uciniseke kutsi timo titawuba ncono. Kanjani? Ngobe bantfu benta loko kanye liBhayibheli lelatsi kutakwenteka ‘emalangeni ekugcina.’ (2 Thim. 3:1-5) Kute umuntfu longaphika kutsi lesiphrofetho sesigcwalisekile, futsi kugcwaliseka kwaso kuveta kutsi Khristu Jesu sewuyiNkhosi yeMbuso waNkulunkulu. Kodvwa lesi kumane kungulesinye siphrofetho kuletinyenti letimayelana neMbuso. Kufundza ngaletinye tiphrofetho letisandza kugcwaliseka kutasicinisa kukholwa.

2. Sitawucoca ngani kulesihloko, futsi leni? (Khulumela sitfombe lesisekhasini lekucala.)

² Kulesihloko, sitawucoca (1) ngesiphrofetho lesisisita sibone kutsi uMbuso waNkulunkulu ucale nini kubusa, (2) ngetiphrofetho letisisita sibone kutsi Jesu sewuyiNkhosi yeMbuso waNkulunkulu losezulwini (3) nangesiphrofetho lesiveta kutsi titsa teMbuso waNkulunkulu titawubhujiswa njani. Sitawubona kutsi letiphrofetho tihlangana kahle, kuhle kwemdlalo wekubeka lucetu nelucetu endzaweni yalo (jigsaw puzzle) futsi tisenta sibone kutsi sikuphi nesikhatsi.

SINGABONA NJANI KUTSI LOMBUSO UCALE NINI KUBUSA?

3. Siphrofetho lesikuDanyela 7:13, 14 sisicinisekisa ngani mayelana neNkhosi yeMbuso waNkulunkulu?

³ Siphrofetho lesikuDanyela 7:13, 14 sisicinisekisa ngekutsi Khristu Jesu utawuba nguMbusi lokahle kakhulu weMbuso waNkulunkulu. Bantfu labavela kuto tonkhe tive batamlalela, futsi kute lotawutsatsa sikhundla sakhe. Lesinye siphrofetho lesisencwadzini yaDanyela, siveta kutsi Jesu bekatawucala kubusa ekupheleni kwetikhatsi letingu-7. Singabona njani kutsi Jesu wacala nini kuba yiNkhosi?

4. Chaza kutsi Danyela 4:10-17 usisita njani sibone kutsi Khristu bekatawuba yiNkhosi ngamuphi umnyaka. (Buka nembhalo longentasi.)

⁴ Fundza Danyela 4:10-17. “Tikhatsi letingu-7” timelela iminyaka lengu-2 520. Lesikhatsi sacala nga-607 B.C.E. ngesikhatsi iBhabhulona isusa inkhosi yekugcina esihlalweni sebukhosi saJehova lebesiseJerusalema. Saphela nga-1914 C.E. ngesikhatsi Jehova abeka Jesu esihlalweni sebukhosi, lokunguye “lonelilungelo lelisemtsetfweni,” lekuba yiNkhosi yeMbuso waNkulunkulu.b—Hez. 21:25-27.

5. Singasisita njani lesiphrofetho lesimayelana ‘netikhatsi letingu-7’?

⁵ Sisisita njani lesiphrofetho? Kwati lesiphrofetho lesimayelana ‘netikhatsi letingu-7’ kuyasicinisekisa kutsi Jehova utigcwalisa ngesikhatsi lesifanele tetsembiso takhe. Njengobe bekasibekile sikhatsi sekutsi uMbuso wakhe utawucala nini kubusa, utawuciniseka kutsi tonkhe leletinye tiphrofetho tigcwaliseka ngesikhatsi sakhe lesifanele. Lilanga laJehova ‘angeke lephute!’​—Hab. 2:3.

SATI NJANI KUTSI KHRISTU SEWUYINKHOSI YEMBUSO WANKULUNKULU?

6. (a) Yini lesiyibonako lefakazela kutsi Khristu sewuyabusa ezulwini? (b) Siphrofetho lesikuSembulo 6:2-8 sikufakazela njani loku?

⁶ Ngasekupheleni kwemsebenti wakhe wekushumayela lamhlabeni, Jesu wakhuluma ngetintfo lebetitawusita balandzeli bakhe babone kutsi sewucalile kubusa ezulwini. Emkhatsini wetintfo lakhuluma ngato, wabala timphi, indlala nekutamatama kwemhlaba. Waphindze wakhuluma nangetifo letingumshayabhuce letitawuba khona “etindzaweni letehlukahlukene,” futsi umkhuhlane we-COVID-19 usibonelo saloku. Loku kuyincenye yaloko liBhayibheli lelikubita ngekutsi ‘tibonakaliso’ tekuba khona kwaKhristu. (Mat. 24:3, 7; Luk. 21:7, 10, 11) Ngemuva kweminyaka lengetulu kwalengu-60 Jesu abuyele ezulwini, waphindze wacinisekisa umphostoli Johane kutsi letintfo titakwenteka mbamba. (Fundza Sembulo 6:2-8.) Tonkhe letintfo tentekile kusukela Jesu aba yiNkhosi nga-1914.

7. Yini lebangele kutsi kwenteke tintfo letinyenti letimbi emhlabeni kusukela Jesu acala kuba yiNkhosi?

⁷ Yini leyabangela kutsi timo tibe tibi kakhulu emhlabeni ngesikhatsi Jesu aba yiNkhosi? Sembulo 6:2 siyasiphendvula. Intfo yekucala Jesu layenta nasekayiNkhosi kwaba kulwa imphi. Walwa nabani? Walwa naDeveli nemadimoni akhe. Ngekusho kweSembulo sehluko 12, Sathane wehlulwa, futsi yena nemadimoni akhe bajikijelwa emhlabeni. Umphumela waloko kube ‘ngumaye emhlabeni’ ngenca yekutsi Sathane utfukutsele kakhulu futsi uhlasela bantfu.​—Semb. 12:7-12.

8. Kusisita ngani kubona tiphrofetho letimayelana neMbuso tigcwaliseka?

⁸ Tisisita njani letiphrofetho? Tintfo letentekako emhlabeni kanye nelushintjo lolukhulu endleleni bantfu labatiphatsa ngayo kusisita sibone kutsi Jesu sewuyiNkhosi. Kunekutsi sitfukutsele nasibona bantfu baticabangela bona futsi baneludlame, kufanele sikhumbule kutsi tintfo labatentako tigcwalisa siphrofetho seliBhayibheli. UMbuso waNkulunkulu sewuyabusa! (Hla. 37:1) Silindzele kutsi tintfo tibe timbi kakhulu njengobe i-Amagedoni isondzela ngekushesha. (Mak. 13:8; 2 Thim. 3:13) Simbonga kakhulu Babe wetfu wasezulwini lositsandzako ngekusisita sicondze kutsi yini leyenta kube netintfo letinyenti letimbi emhlabeni.

INDLELA LETITAWUBHUJISWA NGAYO TITSA TEMBUSO WANKULUNKULU

9. Siphrofetho lesikuDanyela 2:28, 31-35, siwuchaza njani lombuso wekugcina, futsi wacala nini kuba khona?

⁹ Fundza Danyela 2:28, 31-35. Lesiphrofetho siyagcwaliseka lamuhla. Liphupho laNebukhadnezari lakhuluma ngaloko lebekutawenteka “emalangeni ekugcina,” ngemuva kwekutsi Khristu sekacalile kubusa. Titsa taJesu letilamhlabeni tifaka ekhatsi umbuso wekugcina kulemibuso yemhlaba lokwakhulunywa ngayo eBhayibhelini, lomelelwa ‘yinhlanganisela yensimbi nelubumba.’ Lombuso wemhlaba sewuvele uyabusa. Wacala kubusa ngeMphi Yelive Yekucala ngesikhatsi emaNgisi nemaMelika acala kusebentisana, akha umbuso wemaNgisi nemaMelika. Sitfombe lesabonwa nguNebukhadnezari ephusheni saveta netintfo letimbili ngalombuso wemhlaba letenta wehluke kulemibuso leyendlulile.

10. (a) Yini lesiyibonako lamuhla kulombuso wemaNgisi nemaMelika lokwashiwo siphrofetho saDanyela? (b) Nguyiphi ingoti lokufanele siyigweme? (Buka libhokisi lelitsi “Caphela Lubumba!”)

¹⁰ Kwekucala, ngalokungafani nemibuso yemhlaba leyendlulile lokukhulunywa ngayo kulombono, umbuso wamaNgisi nemaMelika awumelelwa ligolide nobe lisiliva, kodvwa umelelwa yinhlanganisela yensimbi nelubumba. Lolubumba lumelela ‘bantfwana bebantfu’ nobe luntfu. (Dan. 2:43, umbhalo longentasi) Loku kubonakala kahle, njengobe bantfu banesandla nakuvotwa, nakukhankaswa, nakutoyitoywa, nakutinyonyane tetisebenti futsi loku kwenta kube matima ngebaholi balombuso wemhlaba kutsi bente labakufunako.

11. Kubusa kweMbuso Wemhlaba wemaNgisi nemaMelika kusenta njani siciniseke kakhulu kutsi siphila emalangeni ekugcina?

¹¹ Kwesibili, umbuso wemaNgisi nemaMelika lomelelwa tinyawo talesitfombe, ungumbuso wekugcina wemhlaba lokwaphrofethwa ngawo eBhayibhelini. Kute lomunye umbuso wemhlaba lotawulandzela. Kunaloko, nge-Amagedoni, uMbuso waNkulunkulu utawubhubhisa lombuso wemhlaba kanye nabo bonkhe bohulumende bebantfu.c​—Semb. 16:13, 14, 16; 19:19, 20.

12. Siphrofetho saDanyela sisinika buphi lobunye bufakazi lobusidvudvutako nalobusinika litsemba?

¹² Sisisita njani lesiphrofetho? Siphrofetho saDanyela sisinika lobunye bufakazi bekutsi siphila emalangeni ekugcina. Eminyakeni lengetulu kwa-2 500 leyendlulile, Danyela waphrofetha kutsi ngemuva kweBhabhulona, bekutawuba nemibuso yemhlaba lemine lebeyitawubatsintsa ngalokucondzile bantfu baNkulunkulu. Ngetulu kwaloko, waveta kutsi uMbuso Wemhlaba wemaNgisi nemaMelika, bewutawuba ngumbuso wekugcina. Loku kuyasidvudvuta futsi kusinika litsemba lekutsi ngekushesha uMbuso waNkulunkulu utawubhubhisa bonkhe bohulumende bebantfu futsi kube ngiwo lobusa emhlabeni.​—Dan. 2:44.

13. Imelelani ‘inkhosi yesi-8’ ‘nemakhosi langu-10’ lokukhulunywa ngawo kuSembulo 17:9-12, futsi sigcwaliseke njani lesiphrofetho?

¹³ Fundza Sembulo 17:9-12. Umonakalo lowabangelwa Yimphi Yelive Yekucala waholela ekugcwalisekeni kwalesinye siphrofetho seliBhayibheli lesimayelana nemalanga ekugcina. Baholi bemhlaba bebafuna kuletsa kuthula emhlabeni. Ngako ngaJanuary 1920, basungula i-League of Nations leyabese itsatselwa sikhundla nguMhlabuhlangene nga-October 1945. Lenhlangano ibitwa ngekutsi “yinkhosi yesi-8.” Kodvwa ayisiwo umbuso wemhlaba. Emandla ayo iwatfola kubohulumende labayisekelako. LiBhayibheli libabita ngekutsi ‘ngemakhosi langu-10.’

14-15. (a) Yini levetwa Sembulo 17:3-5 mayelana ‘neBhabhulona Lenkhulu’? (b) Yini leyentekako kulabo labasekela inkholo yemanga?

¹⁴ Fundza Sembulo 17:3-5. Embonweni lawunikwa nguNkulunkulu, umphostoli Johane wabona ingwadla, ‘lokuyiBhabhulona Lenkhulu,’ lemelela umbuso wemhlaba wenkholo yemanga. Ugcwaliseke njani lombono? Sekuphele sikhatsi lesidze tinkholo temanga tibambisana nabohulumende bemhlaba futsi tibasekela. Kodvwa ngekushesha Jehova utakufaka etinhlitiyweni talabohulumende kutsi ‘bente injongo yakhe.’ Utawuba yini umphumela? Labohulumende, ‘lokungemakhosi langu-10,’ batawuhlasela tinhlangano tetinkholo temanga futsi baticedze nya!​—Semb. 17:1, 2, 16, 17.

¹⁵ Sati njani kutsi kubhujiswa kweBhabhulona Lenkhulu sekusedvute? Kuze siphendvule lombuto, kungasisita kukhumbula kutsi iBhabhulona yasendvulo beyivikelwe nangemanti eMfula lomkhulu iYufrathe. Incwadzi yeSembulo ifananisa tigidzi tebantfu labasekela iBhabhulona Lenkhulu ‘nemanti’ lasivikelo. (Semb. 17:15) Iphindze ivete kutsi lamanti ‘atawusha,’ lokukhombisa kutsi bantfu labanyenti batawuyekela kusekela lombuso wemhlaba wenkholo yemanga. (Semb. 16:12) Lamuhla, lesiphrofetho siyagcwaliseka ngobe bantfu labanyenti abasayi emasontfweni futsi sebatifuna kuletinye tindzawo tisombululo tetinkinga tabo.

16. Kusisita njani kwati tiphrofetho letimayelana nekuvela kwaMhlabuhlangene naletimayelana nekubhujiswa kweBhabhulona Lenkhulu?

¹⁶ Tisisita njani letiphrofetho? Kuba khona kwaMhlabuhlangene kanye nekutsi bantfu labanyenti abasayisekeli inkholo yemanga, kungulobunye bufakazi bekutsi siphila emalangeni ekugcina. Nanobe bantfu labanyenti bangasayisekeli iBhabhulona Lenkhulu, kodvwa akusho kutsi itawucotfulwa nguloko. Njengobe sekuvetiwe, Jehova utawufaka etinhlitiyweni ‘talamakhosi langu-10,’ lokuyimibuso lesekela Mhlabuhlangene, ‘kutsi ente injongo yakhe.’ Letive titawubhubhisa inkholo yemanga kungakalindzeleki, futsi loko kutawumangalisa umhlaba wonkhe.d (Semb. 18:8-10) Kubhujiswa kweBhabhulona Lenkhulu kutawutsintsa umhlaba wonkhe futsi kungenteka kubange bumatima, kodvwa bantfu baNkulunkulu batawuba netizatfu lokungenani letimbili tekujabula. Lesitsa saJehova Nkulunkulu lesesibe khona sikhatsi lesidze, sitawubhujiswa ngalokuphelele futsi kukhululwa kwetfu kulelive lelibi kutawube sekusedvute!​—Luk. 21:28.

LINDZELA LIKUSASA NGESIBINDZI

17-18. (a) Yini lesingayenta kuze sichubeke sicinisa kukholwa kwetfu? (b) Sitawucoca ngani esihlokweni lesilandzelako?

¹⁷ Danyela waphrofetha kutsi “lwati lweliciniso lutawuba lunyenti,” futsi loko sikubonile! Nyalo sesiyaticondza tiphrofetho letimayelana nesikhatsi setfu. (Dan. 12:4, 9, 10) Kushaya kwato emhlolweni kusenta simhloniphe kakhulu Jehova kanye neliVi lakhe leliphefumulelwe. (Isa. 46:10; 55:11) Ngako chubeka ucinisa kukholwa kwakho ngekutsi udadishe imiBhalo ngekutimisela nangekutsi usite labanye babe nebuhlobo lobuhle naye. Yena utawubasita bonkhe labetsembela kuye futsi utawubanika “kuthula lokuchubekako.”—Isa. 26:3.

¹⁸ Esihlokweni lesilandzelako, sitawucoca ngetiphrofetho letimayelana nelibandla lebuKhristu esikhatsini setfu. Njengobe sitawufundza, letiphrofetho nato tiyakhombisa kutsi siphila emalangeni ekugcina. Sitawubona nalobunye bufakazi bekutsi Jesu, loyiNkhosi yetfu lebusako, ucondzisa balandzeli bakhe labetsembekile.