Tiphitsiphitsi Letimayelana Netepolitiki Letigcwalisa Siphrofetho SeliBhayibheli
Lamuhla, bantfu behlukene ekhatsi etindzabeni tetepolitiki. Abavumelani nemitsetfo letsintsa kuphila kwabo kwamalanga onkhe, futsi basebentisa ludlame kuze bavete imibono yabo yetepolitiki. Kubohulumende, tishayamtsetfo kanye naletinye tiphatsimandla tisetikhundleni letiphikisanako futsi kute lofuna kuvumelana nalomunye. Lokungafani kwemibono kubanga tiphitsiphitsi etindzabeni tetepolitiki lokubese kuphazamisa kusebenta kwahulumende.
Siphitsiphitsi lesihamba embili etindzabeni tetepolitiki ngulesi lesisemkhatsini kwemaNgisi nemaMelika. Leni? Ngobe liBhayibheli laphrofetha kutsi kutawuba nesiphitsiphitsi emkhatsini walamave lamabili, futsi kungaleso sikhatsi lapho hulumende wasezulwini lomiswe nguNkulunkulu atawungenela khona.
Tiphitsiphitsi tetepolitiki “emalangeni ekugcina”
LiBhayibheli linesiphrofetho lesijabulisako lesisencwadzini yaDanyela. Kulesiphrofetho Nkulunkulu waveta “loko lokutawenteka emalangeni ekugcina,” ngalesosikhatsi bekusho tintfo lebetitokwenteka esikhatsini lesitako lapho khona bekutawuba nelushintjo lolukhulu emlandvweni webantfu.—Danyela 2:28.
Lesiphrofetho seliBhayibheli, Nkulunkulu wasendlulisela enkhosini yaseBhabhulona ngeliphupho. Kuleliphupho lenkhosi yabona sitfombe lesikhulu lebesakhiwe ngetintfo letehlukahlukene. Ngemuva kwesikhatsi, umphrofethi Danyela wase uyachaza kutsi kusuka enhloko kuyofika etinyaweni, lesitfombe besimelela imibuso yemhlaba lebeyitawuba nemandla sikhatsi lesitsite bese ngekuhamba kwesikhatsi ayaphela lamandla.a Ekugcineni, lesitfombe besitawubhidlitwa litje lelikhulu lelimelela uMbuso nobe hulumende lomiswe nguNkulunkulu.—Danyela 2:36-45.
Ngekusho kwalesiphrofetho, uMbuso waNkulunkulu utawutsatsa sikhundla sabobonkhe bohulumende bebantfu. LoMbuso ngulona Jesu lafundzisa balandzeli bakhe kutsi bawuthantazele nakatsi: “UMbuso wakho awute.”—Matewu 6:10.
Ngukuphi kulesiphrofetho lapho khona liBhayibheli liphrofetha ngetiphitsiphitsi kutepolitiki? Naka kutsi letinyawo talesitfombe “betiyinhlanganisela yensimbi nelubumba.” (Danyela 2:33) Lenhlanganisela beyehlukile kuleletinye tintfo lebetakha lesitfombe, lokukhombisa kutsi bekutawuba nembuso munye lobewutawehluka kuleleminye imibuso. Kanjani? Siphrofetho saDanyela siyachaza:
Ngekusho kwalesiphrofetho, lombuso lomelelwa tinyawo kulesitfombe bewutaba netiphitsiphitsi kutepolitiki. Bewungeke ubenemandla ngenca yebantfu labangephansi kwawo.
Siphrofetho saDanyela siyagcwaliseka lamuhla
Tinyawo talesitfombe timelela umbuso lomkhulu nalonemandla emhlabeni lamuhla, lokungumbuso wemaNgisi nemaMelika lobusa ngekubambisana. Tintfo letentekako lamuhla tikufakazela njani loku?
Tinyawo talesitfombe “tiyinhlanganisela yensimbi nelubumba,” futsi lenhlanganisela yenta letinyawo tibe butsakatsaka. (Danyela 2:42) Lamuhla, lombuso wemaNgisi nemaMelika wentiwa ube butsakatsaka bantfu lobabusako. Nasi sibonelo, kuwo womabili lamave kunemacembu ebantfu laphikisanako. Bantfu basebentisa budlova kuze balwele emalungelo abo. Tiphatsimandla letikhetfwe bantfu ativumelani etindzabeni letinyenti. Ngenca yekutsi labantfu behlukene ekhatsi labohulumende abakhoni kwenta loko labafise kukwenta.
Simo salemibuso kwaphrofethwa ngaso kuDanyela sehluko 2
Asesihlole lokunye lokushiwo ngulesiphrofetho saDanyela nekutsi sigcwaliseka njani lamuhla:
Siphrofetho: “Lombuso nawo utawehlukana ekhatsi. Kodvwa incenye yawo itawucina njengensimbi.”—Danyela 2:41.
Lesikushoko: Nanobe lamave anemacembu lehlukene ekhatsi kutepolitiki, womabili lamave anemabutfo emphi lamakhulu nalanemandla. Ngenca yaloko, lamave abusa ngeligunya futsi acine njengensimbi.
Kugcwaliseka
Nakwentiwa luhla lwemave lasebentise imali lenyenti kutemphi nga-2023, kutfolakele kutsi iMelika nemaNgisi basebentise imali lenyenti kakhulu kwendlula lesetjentiswe ngemave langu-12 lakuloluhla ahlanganisiwe.—Stockholm International Peace Research Institute.
“Kubambisana kwemabutfo etemphi emaNgisi nemaMelika . . . kwente lamave lamabili aba nebudlelwane lobusondzelene kakhulu. . . . Sisebenta ndzawonye, siphila ndzawonye, silwa ndzawonye.”—I-Strategic Command, U.K. Ministry of Defence, ya-April 2024.
Siphrofetho: “Njengobe letintwane tiyinhlanganisela yensimbi nelubumba, kanjalo-ke lenye incenye yalombuso itawucina, lenye ibe butsakatsaka.”—Danyela 2:42.
Lesikushoko: Ngisho nobe libutfo lemasotja lemaNgisi nemaMelika linemandla, alikhoni kwenta loko lelifisa kukwenta ngenca yendlela hulumende walamave losebenta ngayo. Nangabe bantfu labakhetse loyo hulumende bangavumelani naloko lafuna kukwenta, kuba matima ngalohulumende kwenta nobe yini lofuna kuyenta.
Kugcwaliseka
“Letinye tati kutepolitiki titsi kwehlukana ekhatsi kwahulumende waseMelika kwenta kube lukhuni ngeMelika kutsi yente loko leyetsembise umhlaba kutsi itokwenta, lokufaka ekhatsi tindzaba tekuphepha kanye netekutsengiselana.”—“The Wall Street Journal.”
“Kube netinkinga letinyenti kutepolitiki eNgilandi letingazange setibe khona, futsi tiphazamise bosopolitiki labanyenti. Ngenca yaloko tisebenti tahulumende atikhoni kusita bantfu ngendlela betingafisa ngayob.”—Institute for Government.
Siphrofetho: “Letincenye talombuso titawuhlanganiswa nebantfu, kodvwa angeke kuhlangane kube yintfo yinye.”—Danyela 2:43.
Lesikushoko: Kuhulumende wentsandvo yelinyenti, bantfu labangesibo bosopolitiki, ngelizinga lelitsite bayakulawula loko lokwentiwa nguhulumende. Umphumela waloko awutijabulisi tiphatsimandla kanye nalabo labavotile.
Kugcwaliseka
“Lamuhla, bantfu labanyenti baseMelika abasatitsandzi tindzaba tepolitiki kanye nabosopolitiki.”—Pew Research Center.
“Lamuhla, lehle nakakhulu lizinga bantfu baseNgilandi labetsemba ngayo bosopolitiki kanye nahulumende wabo kuleminyaka lengu-50 leyendlulile.”—“National Centre for Social Research.”
Sitawugcwaliseka njani siphrofetho saDanyela esikhatsini lesitako
Ngekusho kwesiphrofetho saDanyela, kutawube kungumbuso wemaNgisi nemaMelika lonemandla emhlabeni nakufika uMbuso waNkulunkulu futsi utsatsa sikhundla sabo bonkhe bohulumende bebantfu emhlabeni.—Danyela 2:44.
Kulesinye siphrofetho lesisencwadzini yeSembulo lesikhuluma ngesikhatsi lesifanako, liBhayibheli liveta kutsi ‘emakhosi emhlaba wonkhe’ atawubutselwa ndzawonye amelane naJehovac Nkulunkulu, “emphini yelilanga lelikhulu laNkulunkulu Somandla,” i-Amagedoni. (Sembulo 16:14, 16; 19:19-21) Kulemphi, Jehova utawubhubhisa bonkhe bohulumende bebantfu, futsi angeke kuphindze kube nemibuso lenemandla emhlabeni njengaleyo lemelelwa ngulesitfombe kulesiphrofetho saDanyela.
Kuze utfole lokunyenti, fundza sihloko lesitsi “Iyini Impi Ye-Armagedoni?” Lesitfolakala ngesiZulu
Tinzuzo lesititfola kulesiphrofetho saDanyela lesimayelana netiphitsiphitsi tetepolitiki
LiBhayibheli laphrofetha ngalokunembile ngetiphitsiphitsi tetepolitiki lesitibona lamuhla letenteka eMelika naseNgilandi, futsi kufundza ngato kutokwenta ushintje indlela locabanga ngayo ngetintfo letentekako lamuhla.
Utawucondza kutsi yini leyenta Jesu watjela balandzeli bakhe kutsi bangalutsatsi luhlangotsi etindzabeni tepolitiki. (Johane 17:16) Utawuphindze ucondze kutsi yini leyenta Jesu lokhetfwe nguNkulunkulu kutsi abeyiNkhosi yeMbuso wakhe, watsi: “UMbuso wami awuveli kulelive.”—Johane 18:36.
Utawuciniseka kutsi madvutane uMbuso waNkulunkulu utoletsela bantfu tibusiso letinyenti, njengobe Nkulunkulu etsembisile.—Sembulo 21:3, 4.
Sitawuciniseka ngelikusasa, futsi ngeke sisakhatsateka ngekutsi imibuso lengavani itawubhubhisa umhlaba.—Tihlabelelo 37:11, 29.
Siphrofetho saDanyela siveta kutsi umbuso wemaNgisi nemaMelika lobusa ndzawonye nalomelelwa tinyawo talesitfombe, utawuba ngumbuso wemhlaba wekugcina lonemandla. Lombuso utawutsatselwa indzawo nguMbuso waNkulunkulu lotawubusa usezulwini!
Kuze utfole lokunyenti ngaloko uMbuso waNkulunkulu lotokwentela bantfu, bukela i-video letsi, Uyini UMbuso WaNkulunkulu?
a Buka libhokisi lelitsi “Ngumiphi Imibuso Yemhlaba Lechazwa Siphrofetho SaDanyela?”
b Tisebenti tahulumende “ngibobonkhe bantfu labachashwe nguhulumende.”—Merriam-Webster’s Unabridged Dictionary.
c Jehova ligama laNkulunkulu. (Tihlabelelo 83:18) Buka sihloko lesitsi “Ungubani Jehova”