Imibuto Levela Kubafundzi

Bekasho kutsini Jesu nakatsi: “Ningacabangi kutsi ngitele kutewuletsa kuthula”?

Jesu wafundzisa bantfu kutsi babe nekuthula nalabanye bantfu. Kodvwa ngalelinye lilanga watjela baphostoli bakhe watsi: “Ningacabangi kutsi ngitele kutewuletsa kuthula emhlabeni; angiketeli kutewuletsa kuthula, kodvwa ngitewuletsa inkemba. Ngobe ngitele kutewuhlukanisa: Indvodzana imelane nababe wayo, indvodzakati imelane namake wayo, makoti amelane namaketala.” (Mat. 10:34, 35) Bekasho kutsini Jesu?

Jesu bekangafuni kwehlukanisa imindeni, kodvwa bekati kutsi loko lebekakufundzisa bekutayehlukanisa leminye imindeni. Ngako, labo lebebafuna kuba balandzeli baKhristu futsi babhajatiswe, bekufanele bati kutsi ngumiphi imiphumela lebebatayitfola ngesincumo sabo. Ngaletinye tikhatsi nabaphikiswa ngulabashade nabo nobe emalunga emndeni, bekungaba matima kutsi bahlale betsembekile kuloko Khristu bekakufundzisa.

LiBhayibheli likhutsata emaKhristu kutsi ‘abe nekuthula nabo bonkhe bantfu.’ (Rom. 12:18) Kodvwa loko lokwafundziswa nguJesu kungafana ‘nenkemba’ kuleminye imindeni. Loko kuyenteka nangabe lelinye lilunga lemndeni likwemukela loko lokufundziswa nguJesu kodvwa lamanye emalunga angakwemukeli. Nakwenteka loko, lamalunga emndeni aba “titsa” talona lofundza liciniso.​—Mat. 10:36.

Balandzeli baKhristu labahlala netihlobo letingasibo boFakazi ngalesinye sikhatsi kufanele bente sincumo sekutsi batawenta loko lokujabulisa Jehova naJesu yini nobe batawenta loko lokujabulisa tihlobo tabo. Sibonelo nje, tihlobo letingasibo boFakazi tingahle tibaphocelele kutsi bagubhe liholidi lenkholo. Nabavivinywa, batawujabulisa bani? Jesu watsi: “Lotsandza babe wakhe nobe make wakhe kwengca mine akangifaneli.” (Mat. 10:37) Jesu bekangasho kutsi labo labafuna kuba balandzeli bakhe kufanele bangabatsandzi batali babo. Kunaloko bekabafundzisa kutsi bangancuma njani kutsi ngutiphi tintfo letibalulekile ekuphileni kwabo. Nangabe tihlobo tetfu letingasibo boFakazi timelene nekukhonta kwetfu Jehova, siyachubeka sititsandza, kodvwa siyaciniseka kutsi lutsandvo lesinalo ngaNkulunkulu luta kucala kitsi.

Siyati kutsi kubuhlungu kakhulu kuphikiswa tihlobo. Kodvwa balandzeli baJesu kufanele bahlale bakhumbula emavi akhe latsi: “Nobe ngubani longavumi kuhlushwa futsi angilandzele, akangifaneli.” (Mat. 10:38) Ngalamanye emavi, emaKhristu ayavuma kuhlushwa ngemalunga emndeni njengobe abafundzi baKhristu. Kodvwa ayetsemba kutsi kutiphatsa kahle kwawo kungenta emalunga emndeni ashintje indlela lacabanga ngayo futsi afune kufundza umlayeto loseBhayibhelini.​—1 Phet. 3:1, 2.