4 | LiBhayibheli Lisiniketa Teluleko Lesingatisebentisa
LIBHAYIBHELI LITSI: “Yonkhe imiBhalo . . . ilusito.”—2 KUTHIMOTHI 3:16.
Lokukushoko
Ngisho nobe lingasiyo incwadzi yetekwelapha, liBhayibheli lisiniketa teluleko letilusito nalesingatisebentisa. Teluleko talo tingamsita umuntfu lolwisana nekucindzeteleka. Cabanga ngetibonelo letimbalwa.
Indlela Loku Lokungasita Ngayo
“Bantfu labaphilile abamdzingi dokotela, kodvwa ngulabagulako labamdzingako.”—MATEWU 9:12.
LiBhayibheli liyavuma kutsi kungenteka sidzinge lusito lwabodokotela. Bantfu labanyenti labalwisana nekucindzeteleka, basitwe kutfola lwati lolungulonalona ngalokugula kwabo, kanye nekuya kubodokotela.
‘Kucecesha umtimba kuyazuzisa.’—1 KUTHIMOTHI 4:8.
Kwenta tintfo letenta umtimba wakho uphile kungakusita kulokucindzeteleka. Letintfo tifaka ekhatsi kuba neluhlelo kwekujima njalo, kudla kudla lokunemphilo kanye nekulala ngalokwenele.
“Inhlitiyo lejabulako ifana nemutsi lowelaphako, kodvwa umoya lowephukile ucedzana emandla.”—TAGA 17:22.
Kufundza tindzaba letiseBhayibhelini letikhutsatako kanye nekutibekela imigomo longakhona kuyifinyelela kungakusita kutsi uhlale ujabulile. Kuhlale unake tintfo letinhle ekuphileni futsi unelitsemba lekutsi simo sakho sitawuba ncono esikhatsini lesitako, kutakusita ukhone kubhekana nekucindzeteleka.
“Kuhlakanipha kukubantfu labatfobekile.”—TAGA 11:2.
Kungenteka kutsi awukhoni kutentela tonkhe tintfo lofuna kutenta. Ngako, yemukela lusito lwalabanye. Kungenteka umndeni nebangani bakho bayafuna kukusita, kodvwa abati kutsi yini labangakusita ngayo. Batjele kutsi yini loyidzingako, kodvwa ungalindzeli kutsi bakwentele lokukhulu, futsi ubabonge ngaloko labakwentele kona.
Indlela Seluleko SeliBhayibheli Lesisita Ngayo Labanesifo Sekucindzeteleka
“Bengiva kutsi kukhona lokungahambi kahle kimi, ngako ngaya kuyobona dokotela. Dokotela watfola kutsi nginani. Loko kwangisita ngasicondza kancono simo sami, futsi lodokotela wangisita ngatfola tindlela tekwelashwa letenta kuphila kwami kwaba ncono.”—Nicole,a lone-bipolar disorder.
“Ngitfole kutsi kufundza liBhayibheli njalo ekuseni nginemkami kungisite kutsi ngicale lilanga ngemicabango lemihle naleyakhako. Ngalamanye emalanga nakumatima kubhekana nalokugula, livesi lelitsite livele lingidvudvute.”—Peter, lonesifo sekucindzeteleka.
“Bekumatima kutjela labanye ngekugula kwami ngobe benginemahloni ngako. Umngani wami wangilalelisisa, futsi ngemusa wetama kucondza indlela lengitiva ngayo. Wangisita ngativa ngincono futsi ngingasingedvwa.”—Ji-yoo, lone-eating disorder.
“LiBhayibheli lingisitile kutsi ngente tintfo ngekulinganisela, ngiphumule ngalokwenele, futsi ngingasebenti kakhulu. Kuhlakanipha kwalo kungente ngakhona kubhekana nekucindzeteleka lebengilwisana nako.”—Timothy, lone-obsessive-compulsive disorder.
a Lamanye emagama ebantfu ashintjiwe.