3 | Indlela Tibonelo LetiseBhayibhelini Letingakusita Ngayo

LIBHAYIBHELI LIKHULUMA . . . Ngemadvodza nebafati ‘lebebanemiva lefana neyetfu.’—JAKOBE 5:17.

Lokukushoko

LiBhayibheli linetibonelo letinyenti temadvodza nebafati labativa ngetindlela letingafani etimeni letingafani. Njengobe sifundza ngetibonelo tabo, singatfola kutsi lomunye wabo wabhekana nesimo lesifana naleso lesibhekene naso.

Indlela Loku Lokungasita Ngayo

Sonkhe siyadzinga kwati kutsi labanye bayayicondza indlela lesitiva ngayo. Loku kubaluleke kakhulu nangabe silwisana nekucindzeteleka. Nasifundza ngebantfu lokukhulunywa ngabo eBhayibhelini, singatfola kutsi bebacabanga futsi bativa ngendlela natsi lesitiva ngayo. Loku kungasenta sibone kutsi nalabanye babhekana nesimo lesifana nesetfu futsi kusente singasativa sisodvwa njengobe silwisana nekukhatsateka kanye nekucindzeteleka.

LiBhayibheli likhuluma ngetintfo letinyenti letashiwo ngulabo labativa balahliwe. Uke weva yini shengatsi simo lobhekene naso ‘sesingetulu kwemandla akho’? Mosi, Elija kanye naDavide bake bativa ngaleyondlela.—Numeri 11:14; 1 Emakhosi 19:4; Tihlabelelo 55:4.
LiBhayibheli lisitjela ngewesifazane lokutsiwa nguHana ‘lobekacindzeteleke kakhulu’ ngenca yekutsi bekangabatfoli bantfwana, kantsi nazakwabo bekahlekisa ngaye ngenca yaloko.—1 Samuweli 1:6, 10.
LiBhayibheli lisitjela ngendvodza lokutsiwa nguJobe leyabhekana nesimo lesifana nesetfu. Ngisho nobe bekanekukholwa lokucinile, wake wacindzeteleka kakhulu waze watsi: “Ngiyakwenyanya kuphila kwami; angisakufuni kuphila.”—Jobe 7:16.

Kufundza ngendlela labantfu lokukhulunywa ngabo eBhayibhelini lababhekana ngayo nemicabango levisa buhlungu, kungasinika emandla ekubhekana nekucindzeteleka kwetfu.

Indlela LiBhayibheli Lelisita Ngayo Kevin

Kuphila Ne-Bipolar Disorder

“Nangineminyaka lecishe ibe ngu-50, kwatfolakala kutsi ngine-bipolar disorder. Ngaletinye tikhatsi ngitiva shengatsi ngingabhekana nanobe ngabe yini ekuphileni, kodvwa ngaletinye ngiva shengatsi ngabe ngiyafa.”

Indlela LiBhayibheli Lelingisita Ngayo

“Ngitiva njengemphostoli Phetro lokukhulunywa ngaye eBhayibhelini. Wenta emaphutsa lamenta wativa angenamsebenti walutfo, kodvwa kunekutsi ahlale acabanga ngaloko, Phetro wacitsa sikhatsi nebangani bakhe lebebamtsandza. Nangicindzetelwa ngule-bipolar disorder, emaphutsa lengiwentako angenta ngikhatsateke futsi ngitive ngingasilutfo. NjengaPhetro, ngifundze kutsi kufanele ngihlale ngisondzelene nebangani labafuna kungisita kuze ngingalilahli litsemba.

“Lomunye lokukhulunywa ngaye eBhayibhelini lengidvudvuteka kakhulu nangifundza ngaye, yiNkhosi Davide. Beyihlale icindzetelwa simo lebeyikuso futsi itisola ngemaphutsa leyiwentile. Nami ngitiva ngendlela lativa ngayo ngobe ngaletinye tikhatsi ngiyaye ngisho nobe ngente tintfo lengibese ngitisola ngato. Emavi aDavide latfolakala kuTihlabelelo 51 ayangidvudvuta. Kuvesi 3, Davide utsi: ‘Ngiwati kahle emaphutsa ami, futsi ngihlale ngicabanga ngesono lengisentile.’ Loku kuyichaza kahle indlela lengitiva ngayo nangicindzeteleke kakhulu ngobe kuba matima ngisho nekucabanga kutsi kukhona lokuhle lengikwentako. Ngivumelana nemavi aDavide lakuvesi 10 latsi: ‘Awu Nkulunkulu, yenta inhlitiyo yami ibe msulwa, ungiphe ingcondvo lensha futsi lengashintjashintji.’ Nami ngisebentisa indlela lefanako kuze ngicele Nkulunkulu kutsi angisite ngiticabange ngendlela leyehlukile. Ekugcineni, vesi 17 uyangidvudvuta nawutsi: ‘Awu Nkulunkulu, angeke uyibukele phansi inhlitiyo leyephukile naledzabukile.’ Lelivesi liyangicinisekisa kutsi Nkulunkulu uyangitsandza.

“Ngekunaka tibonelo tebantfu lokukhulunywa ngabo eBhayibhelini kanye naloko Nkulunkulu langinikete kona nyalo, ngiyakhona kucinisa litsemba lami ngelikusasa. Tetsembiso letiseBhayibhelini tiba yintfo mbamba kimi futsi loko kungisita kutsi ngingaphelelwa litsemba.”