1 | Umthantazo ‘Phonsani Konkhe Kukhatsateka Kwenu Kuye’

LIBHAYIBHELI LITSI: ‘Phonsani konkhe kukhatsateka kwenu kuNkulunkulu, ngobe uyanikhatsalela.’—1 PHETRO 5:7.

Lokukushoko

Jehova Nkulunkulu usimema kutsi sikhulume naye nganobe ngabe yini lesikhatsatako. (Tihlabelelo 55:22) Kute inkinga lenkhulu kakhulu nobe lencane kakhulu kutsi singamtjela ngayo. Nangabe kubalulekile kitsi, kubalulekile nakuJehova, ngobe uyasikhatsalela futsi unendzaba nendlela lesitiva ngayo. Kuthantaza kuye kusinyatselo lesibalulekile lokufanele sisitsatse kuze sibe nekuthula kwengcondvo.—KubaseFiliphi 4:6, 7.

Indlela Loku Lokungasita Ngayo

Nasilwisana nekucindzetelaka singahle sitive sisondvwana. Labanye bantfu bangahle bangayicondzi indlela lesitiva ngayo. (Taga 14:10) Nasitfululela tinhlitiyo tetfu kuNkulunkulu ngemthantazo, simtjele indlela lesitiva ngayo, utasilalela futsi ayicondze. Jehova uyasibona, uyabati buhlungu lesibuvako, kanye netintfo lesilwisana nato. Ufuna sithantaze kuye simtjele konkhe lokusikhatsatako.—2 Tikhronike 6:29, 30.

Kukhuluma naJehova ngemthantazo kusenta siciniseke kutsi uyasikhatsalela. Kungasenta sitive ngendlela umhlabeleli lativa ngayo nakathantaza atsi: “Ukubonile kuhlupheka kwami; uyati kutsi ngicindzeteleke kakhulu.” (Tihlabelelo 31:7) Kwati nje kutsi Jehova uyakubona loko lesilwisana nako, kungasisita sibeketelele tikhatsi letimatima. Jehova wenta lokungetulu nje kwekumane abone loko lokusicindzetelako, uphindze ayicondze kancono kwendlula nobe ngabe ngumuphi lomunye umuntfu indlela lesitiva ngayo naloko lesibhekene nako, futsi usisita sitfole indvudvuto nesikhutsato eBhayibhelini.

Indlela LiBhayibheli Lelisita Ngayo Julian

Kuphila Nesifo Sekukhatsateka

“Ngilwisana nekukhatsateka kanye ne-obsessive-compulsive disorder (OCD). Lokukhatsateka kungifikela ngingakalindzeli. Kulomzuzu ngitiva ngikahle, kulolandzelako ngitive sengikhatsateke kakhulu ngaphandle kwesizatfu. Ngikhatsateka kakhulu nanginalabanye bantfu. Ngihlale ngitibuta kutsi ingabe bacabangani ngami.

“Bangani bami labatiko kutsi ngilwisana nekukhatsateka bahlale bangisekela. Kuliciniso kutsi ngaletinye tikhatsi baye basho tintfo letingangisiti, kodvwa ngiyabonga ngekutsi bayetama kungisita.

“Ngaletinye tikhatsi kukhatsateka kanye ne-OCD kwenta kube matima kutsi ngithantaze. Kudzingeka ngilwe kamatima kuze ngikhone kukhuluma naJehova ngemthantazo. Ngihlale ngicabanga ngetintfo letinyenti ngasikhatsi sinye, futsi loko kungenta ngidideke. Nasengididekile, kuba matima kutjela Jehova lengikucabangako kanye nendlela lengitiva ngayo.”

Indlela LiBhayibheli Lelingisita Ngayo

“Kudadisha liBhayibheli kungisite ngabona kutsi nangithantaza akudzingeki ngisebentise emagama lamakhulu nobe ngente imithantazo lemidze kuze yemukeleke kuNkulunkulu. Ngalesinye sikhatsi nangingakhoni kuchaza indlela lengitiva ngayo ngivele ngitsi: ‘Jehova, ngicela ungisite.’ Nangenta njalo ngiyabona kutsi Jehova uyayicondza indlela lengitiva ngayo, futsi anginikete loko lengikudzingako ngaleso sikhatsi. Ngetulu nje kwekuthantaza, ngiphindze ngafuna lusito lwabodokotela. Ngiyajabula kusho kutsi totimbili letintfo tingisitile, futsi nyalo sengincono. Ngisho nobe kudzingeka ngente umetamo kuze ngicele lusito kuBabe wami losezulwini, ngiyawenta ngobe ngiyaciniseka kutsi uyangitsandza futsi ufuna kungisita.”