I-Watchtower ONLINE LIBRARY
I-Watchtower ONLINE LIBRARY
WeSicongosekulindza
SiSwati
  • LIBHAYIBHELI
  • LOKUTFOLAKALAKO
  • IMIHLANGANO
  • wp23 No. 1 emakh. 8-9
  • 2 | Indvudvuto “Lesiyitfola EmiBhalweni”

Kute i-video kulolokukhetsile.

Siyacolisa. Kube nenkinga nayisavuleka le-video.

  • 2 | Indvudvuto “Lesiyitfola EmiBhalweni”
  • Sicongosekulindza Simemetela UMbuso WaJehova (Lohanjiswako)—2023
  • Tihlokwana
  • Tincwadzi Letinemaphuzu Lafanako
  • Lokukushoko
  • Indlela Loku Lokungasita Ngayo
  • 3 | Indlela Tibonelo LetiseBhayibhelini Letingakusita Ngayo
    Sicongosekulindza Simemetela UMbuso WaJehova (Lohanjiswako)—2023
Sicongosekulindza Simemetela UMbuso WaJehova (Lohanjiswako)—2023
wp23 No. 1 emakh. 8-9
Indvodza leseyikhulile icabangisisa ngaloko lekufundza eBhayibhelini.

2 | Indvudvuto “Lesiyitfola EmiBhalweni”

LIBHAYIBHELI LITSI: “Tonkhe tintfo letabhalwa kadzeni tabhalelwa kufundzisa tsine, kuze kutsi ngekucinisela kwetfu nangendvudvuto lesiyitfola emiBhalweni sibe nelitsemba.”​—KUBASEROMA 15:4.

Lokukushoko

LiBhayibheli lisenta sibe nemicabango ledvudvutako lengasisita singacabangi tintfo letisivisa buhlungu. Umlayeto weliBhayibheli usiniketa litsemba lekutsi kucidzeteleka kutawuphela.

Indlela Loku Lokungasita Ngayo

Ngaletinye tikhatsi sonkhe siyacindzeteleka nobe sikhatsateke, kodvwa labo labalwisana nesifo sekucindzeteleka nobe sekukhatsateka balwisana nemiva lebuhlungu ngaso sonkhe sikhatsi. LiBhayibheli lingasita njani?

  • LiBhayibheli likhuluma ngetintfo letinhle lesingacabanga ngato letingatsatsa sikhundla semicabango lesivisa buhlungu. (KubaseFiliphi 4:8) Lingagcwalisa tingcondvo tetfu ngemicabango ledvudvutako nalengasenta sijabule futsi lisisite silawule indlela lesitiva ngayo.​—Tihlabelelo 94:18, 19.

  • LiBhayibheli lingasisita silwisane nemicabango yekutiva sitintfo letingenamsebenti walutfo.​—Lukha 12:6, 7.

  • Tindzaba letinyenti letiseBhayibhelini tisicinisekisa kutsi asisisodvwa nekutsi Nkulunkulu, uMdali wetfu, uyicondza ngalokuphelele indlela lesitiva ngayo.​—Tihlabelelo 34:18; 1 Johane 3:19, 20.

  • LiBhayibheli letsembisa kutsi Nkulunkulu utasisita singasatikhumbuli tintfo letibuhlungu letenteka esikhatsini lesendlulile. (Isaya 65:17; Sembulo 21:4) Nasihlushwa yimiva leyetfusako, lesetsembiso singasisita sisinike emandla ekubeketela.

Indlela LiBhayibheli Lelisita Ngayo Jessica

Kuphila Nesifo Sekucindzeteleka

Jessica ulele futsi esandleni sakhe kuneliBhayibheli lelivuliwe.

“Nangineminyaka lengu-25, kwatfolakala kutsi nginesifo sekucindzeteleka. Bengihlushwa kukhumbula tintfo letibuhlungu letenteka ekuphileni kwami. Bodokotela bangisita ngabona kutsi lesifo sekucindzeteleka besibangwa yimicabango lemibi lebenginayo ngenca yetintfo letimbi letenteka esikhatsini lesendlulile. Ngetulu kwekunatsa emaphilisi, kwadzingeka ngikhulume nadokotela wengcondvo kuze angisite ngilungise indlela lengicabanga ngayo.”

Indlela LiBhayibheli Lelingisita Ngayo

“Nangicindzeteleke kakhulu bengetfuka lite, ngikhatsateke kakhulu futsi ngingalali nasebusuku. Etikhatsini letinyenti ebusuku, engcondvweni yami kuphitsitela imicabango lengikhatsatako. Njengobe Tihlabelelo 94:19 tichaza, Nkulunkulu angasidvudvuta futsi asente sijabule nasicindzetelwa kukhatsateka. Ngako, eceleni kwembhedze wami kuhlale kuneliBhayibheli kanye nelibhuku lengibhala kulo imibhalo lengikhutsatako. Nangingakhoni kulala, ngifundza lamavesi eliBhayibheli, ngaleyondlela ngivumele imicabango yaNkulunkulu kutsi ingidvudvute.

“LiBhayibheli lisikhutsata kutsi siyishintje imicabango lengavumelani naloko lesikwatiko ngaNkulunkulu. Esikhatsini lesendlulile bengiciniseka kutsi ngiyintfo lengenamsebenti walutfo nekutsi kute longangitsandza, kodvwa ngifundzile kutsi imicabango lenjalo ayivumelani naloko lokushiwo liBhayibheli. LiBhayibheli litsi Nkulunkulu unguBabe lonelutsandvo, luvelo futsi unendzaba nemuntfu ngamunye. Kancane kancane ngakhona kulawula imicabango yami kunekutsi ngivumele yona ingilawule. Ngifundze kutibona ngendlela Nkulunkulu langibona ngayo. Lesi kwaba sinyatselo lesibalulekile lesangisita ngangasatitsatsi njengentfo lengenamsebenti walutfo.

“Ngisibuke ngalabovu sikhatsi lapho khona imicabango lecindzetelako kanye nekukhumbula tintfo letibuhlungu kutawucedvwa. Ngiyati kutsi esikhatsini lesitako sifo sekucindzeteleka angeke sisabakhona. Ngako loko kungenta ngikhone kubeketela nyalo ngiphindze ngibuke phambili esikhatsini lapho kucindzeteleka kutawucedvwa khona ngalokuphelele.”

Kuze Utfole Lokunye Lokungakusita:

Fundza sihloko lesitsi “Usizo Oluvela ‘KuNkulunkulu Wenduduzo,’” ku-Phaphama! letfolakala ngesiZulu yangaJuly 2009 ku-website letsi jw.org.

Fundza emavesi ladvudvutako lasencwadzini yeTihlabelelo ku-website letsi jw.org.

    Tincwadzi TesiSwati (2002-2025)
    Phuma
    Ngena
    • SiSwati
    • Share
    • Khetsa Lokufunako
    • Copyright © 2025 I-Watch Tower Bible and Tract Society of Pennsylvania
    • Imibandzela Yekuyisebentisa
    • Kusetjentiswa Kwemininingwane Yakho
    • Privacy Settings
    • JW.ORG
    • Ngena
    Share