Indlela lesitiva ngayo ingahlale isisita yini kutsi sente tincumo letikahle?
Lokuhle Nalokubi: Yini Lesita Labanyenti Kutsi Bente Tincumo?
Cishe bantfu labanyenti bayavumelana ngekutsi letinye tintfo timbi kantsi letinye tikahle. Sibonelo nje, kubulala, kudlwengula kanye nekuhlukumeta umntfwana ngekwelicansi tintfo letatiwako kutsi timbi; kantsi kungakhetsi, kuba nemusa kanye nekuba neluvelo tintfo bantfu labavumelana ngato kutsi tinhle. Nobe kunjalo, bantfu labanyenti bacabanga kutsi kute sincumo lesikahle nobe lesikabi nakutiwa etindzabeni letinjengekutsi utawuya nabani ecansini, utawuba ngumuntfu lowetsembekile yini nobe utabakhulisa njani bantfwana bakho. Batsi nobe yini umuntfu layikhetsako ikahle. Bantfu benta tincumo kuye ngekutsi bona nobe labo lababajwayele bativa njani ngaleyo ndzaba. Kuyindlela lekahle yini leyo yekwenta tincumo?
INDLELA LESITIVA NGAYO
Ngalokuvamile tincumo lesitentako tiya ngekutsi nembeza wetfu utsini. Nembeza uyindlela lesitiva ngayo ngalokuhle nalokubi. (KubaseRoma 2:14, 15) Ngisho sisesebancane besikubona lokuhle nalokubi, futsi sitisola nasente lokubi. Nobe kunjalo, nasikhula sifundza kutsi yini lekahle nalekabi kubantfu lesicitsa sikhatsi lesinyenti nabo, kungaba sendzaweni lesihlala kuyo nobe enkholweni lesikuyo. Nasenta tincumo, nembeza wetfu uyasitjela kutsi lesincumo lesisentako siyavumelana yini naloko lesifundziswe kona mayelana nalokuhle nalokubi.
Indlela lesitiva ngayo ngalokuhle nalokubi ingasenta sibavele labanye, sibonge, sibaphatse ngendlela lefanako, futsi sibe nemusa kubo. Ingaphindze isisite kutsi singenti tintfo letitabavisa buhlungu labo lesibatsandzako, nobe sente tintfo letingasihlaza, sitive sinemahloni futsi sinelicala.
Kukahle yini kucondziswa yindlela lesitiva ngayo? Nakasakhula, Garrick bekatitjela kutsi angenta nobe yini layifunako. Lokubuhlungu kutsi umphumela wekwenta loko lakufunako awuzange ube muhle. Utsi kuphila kwakhe bekungajabulisi ngobe bekatiphatsa kabi ngekwelicansi, asebentisa kabi tidzakamiva, asidzakwa futsi anebudlova.
INDLELA LABANYE LABATIVA NGAYO
Ngetulu kwendlela lesitiva ngayo, siphindze sicondziswe yindlela labanye labativa ngayo ngetincumo lesititsatsako. Loku kungasenta sizuze elwatini lwabo kanye nasekuhlakanipheni kwabo. Emalunga emndeni, bangani kanye nebantfu endzaweni lesihlala kuyo, bayasihlonipha nangabe senta loko labacabanga kutsi kukahle.
Kukahle yini kucondziswa yindlela labanye labativa ngayo? Nakasakhula, Priscila wenta loko lebekwentiwa bontsanga yakhe futsi aya ecansini angakashadi. Ngisho nobe labanye bebacabanga kutsi akusikubi loko lakwentako kodvwa yena bekangajabuli. Utsi: “Kwenta loko lebekwentiwa bantfu labanyenti bekungangijabulisi. Kwangenta ngatsatsa tincumo letingakahlakaniphi naletiyingoti.”
IKHONA YINI INDLELA LENCONO?
Indlela tsine lesitiva ngayo kanye nendlela labanye labativa ngayo ibalulekile nasikhetsa emkhatsini walokuhle nalokubi. Nobe kunjalo, kunaka loko kuphela nawenta tincumo akuhlali kukahle. Ngaletinye tikhatsi singahle sitilimate tsine nobe silimate labanye ngenca yekungaboni kutsi tintfo lesitikhetsako titasiholela kuphi. (Taga 14:12) Ngisho nobe tsine nobe labanye sicabanga kutsi sincumo lesitsite lesisentile sikahle, kusenekwenteka sisilimate nobe imibono yebantfu ngaso ishintje. Ngetulu kwaloko, tintfo lebetitsatfwa njengaletimbi esikhatsini lesendlulile, nyalo setitsatfwa njengaletikahle; bese kutsi leto lebetingemukeleki esikhatsini lesendlulile, nyalo setiyemukeleka.
Kulandzela imibono yalabanye kungahlale kusisita yini kutsi sente sincumo lesikahle?
Sikhona yini sicondziso lesikahle lesingasisita sikhetse emkhatsini walokulungile nalokungakalungi? Ikhona yini indlela lencono yekuphila lesingayilandzela namuhla lengasenta singatisoli kusasa?
Sikhona sicondziso lesingashintji nalesingasetsemba lesisebentela wonkhe muntfu nobe ngabe uhlala kuphi. Sihloko lesilandzelako sitawucoca ngekutsi singasitfola kuphi lesicondziso lesingasetsemba lesingasisita nasikhetsa kutsi yini lelungile nalengakalungi.