Tintfo Letimbi Letenteka Nakunemphi
Timbalwa tintfo letivisa bantfu buhlungu kwendlula timphi nebudlova lobuhambisana nato. Emasotja kanye nalabanye bantfu emhlabeni batibonele ngewabo imiphumela yemphi.
EMASOTJA
“Uhlale ubona kubulawa bantfu nobe balinyatwa, lokukwenta utive ungakaphephi.”—Gary, waseBritain.
“Ngadubuleka emhlane nasebusweni, futsi ngabona bantfu labanyenti babulawa lokufaka ekhatsi bantfwana kanye nalasebakhulile. Imphi ikwenta uphelelwe luvelo.”—Wilmar, waseColombia.
“Awukhohlwa nawubona umuntfu adutjulwa embikwakho. Uyachubeka uva lokukhala kwaloyo muntfu. Awuyuze umkhohlwe loyo muntfu.”—Zafirah, wase-United States.
BANTFU
“Bengesaba kutsi ngitawubulawa, futsi ngetulu kwaloko bengesaba nekutsi umndeni wami kanye nebangani bami batawubulawa. Bengingacabangi kutsi ngiyoke ngiphindze ngijabule.”—Oleksandra, wase-Ukraine.
“Kuyesabeka kudelezela kudla kusukela nga–2:00 ekuseni kuze kube ngu–11:00 ebusuku, ngobe kungenteka ushaywe yinhlavu lephampalatile.”—Daler, waseTajikistan.
“Imphi yangishiya ngiyintsandzane ngite umuntfu longangidvudvuta nobe longanginakekela.”—Marie, waseRwanda.
Ngisho nobe laba lokukhulunywe ngabo langenhla beva buhlungu ngenca yetimphi, kodvwa nyalo sebanekuthula. Ngetulu kwaloko, bayaciniseka kutsi madvutane tonkhe timphi kanye nebudlova kutawuphela. LeSicongosekulindza sitosebentisa liBhayibheli kuze sichaze kutsi loku kutokwenteka kanjani.