Kuba Nekuthula Ngisho Kunemphi Kanye Netiphitsiphitsi Letihambisana Nebudlova
“Ngaphambi kwekutsi ngidadishe liBhayibheli bengingacondzi kutsi yini lebangela bantfu babe nelunya, babebete kulunga futsi kube netinkinga emhlabeni. Nyalo senginekuthula kwengcondvo ngobe sengiyati kutsi Jehova Nkulunkulu utokwenta umhlaba ube yindzawo lephephile,” kusho Gary lobekalisotja.
Akusuye Gary kuphela lotiva ngalendlela. Asesibone indlela liBhayibheli lelibasite ngayo labanye.
LIBHAYIBHELI LITSI: “Wena Jehova umuhle futsi uhlale ukulungele kutsetselela.”—Tihlabelelo 86:5.
INDLELA LOKU LOKUSITA NGAYO: “Lelivesi liyangicinisekisa kutsi Jehova unemusa futsi ukulungele kungicolela ngako konkhe lengakwenta ngesikhatsi ngisemphini.”—Wilmar, waseColombia.
LIBHAYIBHELI LITSI: “Ngidala emazulu lamasha nemhlaba lomusha; tintfo lesetendlulile angeke tisakhunjulwa.”—Isaya 65:17.
INDLELA LOKU LOKUSITA NGAYO: “Ngine-post-traumatic stress disorder kanye nesifo sekucindzeteleka ngenca yaloko lokwenteka ngesikhatsi ngiselisotja. Lombhalo uyangikhumbuta kutsi masinyane Jehova utanginika kuthula kwengcondvo angente ngikhohlwe konkhe lokwenteka emphini. Angeke ngiphindze ngikukhumbule. Sipho lesihle leso!”—Zafirah, wase-United States.
LIBHAYIBHELI LITSI: “Nasekubusa yona, bantfu labalungile batawuphumelela, kwandze kuthula kuze kube phakadze.”—Tihlabelelo 72:7.
INDLELA LOKU LOKUSITA NGAYO: “Ngihlale ngicabanga ngalamavi. Imphi itophela madvutane futsi angeke sisakhatsateka ngekuphepha kwalabo lesibatsandzako.”—Oleksandra, wase-Ukraine.
LIBHAYIBHELI LITSI: “Labafile bakho bayawuphila. . . . Phaphamani nimemete ngenjabulo, nine lenihlala elutfulini!”—Isaya 26:19.
INDLELA LOKU LOKUSITA NGAYO: “Cishe onkhe emalunga emndeni wami abulawa ngesikhatsi lolunye luhlanga lubulala emaTutsi. Lelivesi lingenta ngiciniseke kutsi ngitophindze ngiwubone umndeni wami. Ngilangatelela kubabona sebavusiwe, ngiphindze ngive emavi abo sebajabulile!”—Marie, waseRwanda.
LIBHAYIBHELI LITSI: “Ngemuva nje kwesikhashana, bantfu lababi ngeke basaba khona . . . Kodvwa labamnene batawudla lifa lemhlaba, futsi batawujabulela kuthula lokukhulu.”—Tihlabelelo 37:10, 11.
INDLELA LOKU LOKUSITA NGAYO: “Ngisho nobe imphi seyiphelile, kuchubeka kube nekungalungi kanye nebantfu lababi. Lamavesi acinisa kukholwa kwami. Jehova ubona konkhe futsi uyasicondza simo lengikuso. Wetsembisa kutsi konkhe kuhlupheka kutophela madvutane futsi kungasakhunjulwa.”—Daler, waseTajikistan.
Laba lokukhulunywa ngabo kulomagazini bangulabanye baBoFakazi BaJehova labasitwe liBhayibheli kutsi babenekuthula. Bafundze kutsandza bonkhe bantfu lokufaka ekhatsi baletinye tive kanye netinhlanga. (Kubase-Efesu 4:31, 32) BoFakazi BaJehova abalutsatsi luhlangotsi kutepolitiki futsi bete budlova.—Johane 18:36.
BoFakazi BaJehova basekelwa nabazalwane babo labanelutsandvo labasemhlabeni wonkhe. (Johane 13:35) Sibonelo nje, Oleksandra, lesike sakhuluma ngaye, kwadzingeka kutsi yena nadzadzewabo babalekele kulelinye live ngenca yemphi. Uchubeka atsi: “Nasiwela umncele semukelwa boFakazi bakuleyo ndzawo, labasisita sakhona kuphila kulelolive njengebakhoseli.”
Sikumema ngemfudvumalo kutsi ubenatsi emihlanganweni yetfu lapho sifundza khona ngemlayeto weliBhayibheli wekuthula kanye nendlela longawusebentisa ngayo. Ngena ku-website letsi jw.org kuze utfole imihlangano lesendzaweni lohlala kuyo, nobe ucele kudadisha liBhayibheli mahhala kusetjentiswa incwajana letsi Jabulela Kuphila Kuze Kube Phakadze!