Chubeka Uhamba Ngekukholwa

1. Yini leyenta Pawula wajabula ngendlela bekasebentise ngayo kuphila kwakhe?

UMPHOSTOLI PAWULA bekati kutsi ngekushesha utawubulawa, kodvwa bekajabula nakacabanga ngendlela lebekasebentise ngayo kuphila kwakhe. Nakabuka emuva, watsi: “Ngilicedzile nelibanga lami, futsi ngikugcinile kukholwa.” (2 Thim. 4:6-8) Pawula bekente tincumo letihlakaniphile ngesikhatsi enta umsebenti waJehova, futsi bekaciniseka kutsi bekajabula ngaye. Natsi sifuna kwenta tincumo letihlakaniphile, futsi sifuna Nkulunkulu asemukele. Singakwenta njani loko?

2. Kusho kutsini kuhamba ngekukholwa?

² Naku Pawula lakusho ngekuphila kwakhe nangalamanye emaKhristu letsembekile, watsi: “Sihamba ngekukholwa, hhayi ngekubona.” (2 Khor. 5:7, umbhalo longentasi) Bekasho kutsini? Ngalesinye sikhatsi eBhayibhelini ligama lelitsi “kuhamba,” lisho indlela umuntfu lakhetsa kuphila ngayo. Nangabe umuntfu ahamba ngekubona, wenta tincumo letisekelwe kuloko lakubonako kuphela, lakuvako nobe indlela lativa ngayo. Kodvwa nangabe umuntfu ahamba ngekukholwa, wenta tincumo letikhombisa kutsi uyametsemba Jehova Nkulunkulu. Lakwentako kuyakhombisa kutsi uyaciniseka kutsi Nkulunkulu utambusisa, nekutsi kutamsita kulalela seluleko saJehova lesitfolakala eVini lakhe.​—Hla. 119:66; Heb. 11:6.

3. Ngutiphi tibusiso lesitatitfola nasihamba ngekukholwa? (2 KubaseKhorinte 4:18)

³ Ngalesinye sikhatsi sonkhe setsembela kuloko lesikubonako, lesikuvako nasendleleni lesitiva ngayo kuze sente tincumo. Kodvwa singahle sibe netinkinga nasinaka kuphela loko lesikubonako nobe lesikuvako nasenta tincumo letibalulekile. Sisho ngani? Indlela lesitiva ngayo naloko lesikubonako kungahle kusidukise. Ngisho nobe kungasidukisi, nasihamba ngekubona kuphela, singagcine singasayinaki intsandvo yaNkulunkulu nobe seluleko sakhe. (Shu. 11:9; Mat. 24:37-39) Kodvwa nasihamba ngekukholwa, manyenti ematfuba ekutsi sente tincumo ‘letemukelekako eNkhosini.’ (Ef. 5:10) Kulalela seluleko saNkulunkulu kutasiniketa kuthula sibili futsi kusente sijabule mbamba. (Hla. 16:8, 9; Isa. 48:17, 18) Ngetulu kwaloko, nasichubeka sihamba ngekukholwa, sitawutfola kuphila lokuphakadze.​—Fundza 2 KubaseKhorinte 4:18.

4. Umuntfu angabona njani kutsi uhamba ngekukholwa nobe ngekubona?

⁴ Singabona njani kutsi sihamba ngekukholwa nobe ngekubona? Naku lokungasisita: Yini lesicondzisako nasenta tincumo? Sicondziswa kuphela nguloko lesikubonako yini? Nobe sicondziswa kwetsembela kwetfu kuJehova kanye neseluleko sakhe? Asesicoce ngekutsi singachubeka njani sihamba ngekukholwa kunati tintfo letintsatfu: nasikhetsa umsebenti, nasikhetsa lesitawushada naye nalapho sitfola sicondziso lesivela enhlanganweni. Esimeni ngasinye, sitawucoca ngaloko lokufanele sicabange ngako kuze sente tincumo letikahle.

NASIKHETSA UMSEBENTI

5. Yini lokufanele sicabange ngayo nasikhetsa umsebenti?

⁵ Sonkhe siyafuna kunakekela tidzingo tetfu kanye netemindeni yetfu. (Shu. 7:12; 1 Thim. 5:8) Leminye imisebenti iholelana kahle kunaleminye. Kungenteka ivumele sisebenti kutsi sikhone kunakekela tidzingo taso tamalanga onkhe futsi sikhone nekubeka lokutsite eceleni kuze sikusebentise esikhatsini lesitako. Kantsi leminye imisebenti iholela kancane, lokwenta kutsi sisebenti sikhone kunakekela umndeni waso ngetintfo lotidzingako nje kuphela. Kuliciniso kutsi nasincuma kutsi sitawemukela muphi umsebenti, sivame kucabanga ngekutsi sitawuhola malini. Nobe kunjalo, umuntfu angahamba ngekubona nakacabanga ngaloko nje kuphela.

6. Singahamba njani ngekukholwa nasikhetsa umsebenti? (KumaHebheru 13:5)

⁶ Nangabe sihamba ngekukholwa, sitawucabanga nangekutsi lomsebenti utabutsintsa njani buhlobo betfu naJehova. Singahle sitibute: ‘Lomsebenti utangenta kutsi ngente tintfo langatitsandzi yini Jehova?’ (Taga 6:16-19) ‘Angeke ngisaba khona kuyo yonkhe yini imihlangano yelibandla nobe ngibe nesikhatsi lesincane sekushumayela nesekudadisha liBhayibheli, futsi kutawudzingeka ngingabi nemndeni wami sikhatsi lesidze yini?’ (Fil. 1:10) Nangabe imphendvulo yamunye walemibuto kungu-yebo, kutawuba kuhlakanipha kungawemukeli lomsebenti ngisho nobe kumatima kutfola umsebenti. Ngenca yekutsi sihamba ngekukholwa, senta tincumo letitawukhombisa kutsi siyaciniseka kutsi ngandlelatsite Jehova utatinakekela tidzingo tetfu.​—Mat. 6:33; fundza KumaHebheru 13:5.

7-8. Lomunye umzalwane waseSouth America wahamba njani ngekukholwa? (Buka nesitfombe.)

⁷ Naka kutsi lomunye umzalwane waseSouth America lokutsiwa ngu-Javier,a wasibona njani sidzingo sekuhamba ngekukholwa. Utsi: “Ngafaka sicelo semsebenti lobewutanginika liholo leliphindvwe kabili kunalelo bengilitfola futsi ungente ngenetiseke.” Kodvwa Javier bekanesifiso lesikhulu sekuba lihlahlandlela. Uchubeka utsi: “Bangibita kuze babone kutsi ngingakhona yini kwenta lomsebenti (interview). Kodvwa ngaphambi kwekutsi ngiye, ngathantaza kuJehova kuze angisite, ngobe bengiciniseka kutsi uyakwati loko lokungilungelako. Bengifuna kutfutfuka emsebentini lebengiwenta futsi ngitfole nemali lenyenti. Kodvwa bengingawufuni lomsebenti nangabe utawenta ngingayifinyeleli imigomo yami ekukhonteni Nkulunkulu.”

⁸ Javier utsi: “Ngesikhatsi ngisakhuluma nalomphatsi (interview), wangitjela kutsi kutawudzingeka ngisebente ema-awa lengetiwe. Ngemusa ngamtjela kutsi ngeke ngikhone kukwenta loko ngenca yemsebenti lengiwentela Jehova.” Javier akazange awemukele lomsebenti. Ngemuva kwemaviki lamabili, wacala kuba lihlahlandlela. Nasewuyophela lowo mnyaka, watfola umsebenti labekasebenta khona emalanga latsite. Utsi: “Jehova wayiva imithantazo yami futsi wanginiketa umsebenti lobewungivumela kutsi ngichubeke ngilihlahlandlela. Ngijabula kakhulu ngekuba nalomsebenti longivumela kutsi ngibe nesikhatsi lesinyenti sekukhonta Jehova futsi ngisite bazalwane bami.”

9. Yini loyifundza kulokwenteka kuTrésor?

⁹ Kutsiwani nangabe sibona kutsi umsebenti lesiwentako awusivumeli kutsi sihambe ngekukholwa? Cabanga ngaloko lokwenteka kuTrésor waseCongo. Utsi: “Umsebenti wami lomusha bewuyintfo lebengisolo ngiyifuna kakhulu ekuphileni. Bengihola imali lephindvwe katsatfu kunaleyo bengiyihola ngaphambili futsi bantfu bebangihlonipha.” Nanobe kunjalo, Trésor bekangabi khona njalo emihlanganweni yelibandla ngenca yekutsi bekasebenta sikhatsi lesengetiwe. Ngalesinye sikhatsi, labo lasebenta nabo bebamcindzetela kutsi acambe emanga kubantfu kuze bangati ngekungetsembeki lokwentiwa ngulenkapani. Trésor bekafuna kuwuyekela lomsebenti, kodvwa bekakhatsateke ngekutsi utawutfolaphi lomunye. Yini leyamsita? Utsi: “Umbhalo waHabakhuki 3:17-19 wangisita ngabona kutsi ngisho nobe ngingalahlekelwa ngumsebenti, ngandlelatsite Jehova bekatanginakekela. Ngako ngayekela.” Uchubeka atsi: “Tisebenti letinyenti ticabanga kutsi umuntfu angadzela nobe yini, lokufaka ekhatsi umndeni wakhe nesikhatsi sekukhonta Jehova, kuze nje abe nemsebenti loholelana kahle. Ngijabula kakhulu ngekutsi ngavikela buhlobo bami naJehova kanye nebuhlobo bami nemndeni wami. Ngemuva kwemnyaka, Jehova wangisita ngatfola umsebenti lokahle lebewungivumela kutsi ngiphile imphilo lemelula futsi ngibe nesikhatsi lesinyenti sekwenta imisebenti yakhe. Nasibeka Jehova kucala ekuphileni kwetfu, singahle sidvonse kamatima etimalini, kodvwa Jehova utasinakekela.” Nasisetsemba setsembiso saJehova neseluleko sakhe, sitawuchubeka sihamba ngekukholwa, futsi utasibusisa.

NAWUKHETSA LOTAWUSHADA NAYE

10. Nawukhetsa lotawushada naye, ngutiphi tintfo letibalulekile lokufanele ucabange ngato, kodvwa yini lokufanele uyicaphele?

¹⁰ Umshado usipho lesivela kuJehova, futsi kungekwemvelo kufuna kushada. Nangabe dzadze afuna umzalwane latawushada naye, angahle anake buntfu balomzalwane, indlela labukeka ngayo, lidvumela lakhe, simo sakhe setimali nekutsi bakhona yini labanakekelako emndenini wakubo kanye nendlela lomzalwane lamenta ative ngayo.b Letintfo tibalulekile. Nanobe kunjalo, nangabe anaka letintfo leti kuphela, loko kungakhombisa kutsi uhamba ngekubona.

11. Singahamba njani ngekukholwa nasikhetsa lesitawushada naye? (1 KubaseKhorinte 7:39)

¹¹ Jehova uyatigcabha ngebazalwane nabodzadze labalalela seluleko sakhe nabakhetsa labatawushada naye! Sibonelo nje, bayasisebentisa seluleko seliBhayibheli sekulindza baze bendlule “esikhatsini sekuvutselwa yinkhanuko yebusha” ngaphambi kwekutsi bafune labatawutsandzana naye. (1 Khor. 7:36) Bacabanga ngekutsi lona labafuna kushada naye unabo yini buntfu latsi Jehova indvodza lekahle nobe umfati lokahle kufanele abe nabo. (Taga 31:10-13, 26-28; Ef. 5:33; 1 Thim. 5:8) Nangabe umuntfu longasuye Fakazi akhombisa timphawu tekufuna kutsandzana nabo, balalela seluleko sekutsi bashade “eNkhosini kuphela,” lesiku-1 KubaseKhorinte 7:39. (Fundza.) Bayachubeka bahamba ngekukholwa, babe baciniseka kutsi Jehova utabasita bakhone kubeketelela indlela labativa ngayo.​—Hla. 55:22.

12. Yini loyifundza kulokwenteka kuRosa?

¹² Cabanga ngalokwenteka kulelinye lihlahlandlela laseColombia lokutsiwa nguRosa. Emsebentini wakhe bekunelijaha lebelingasuye Fakazi lebelifuna kutsandzana naye. NaRosa belimkhanga lelijaha. Utsi: “Bekabonakala angumuntfu lokahle. Bekavolontiya emmangweni wakubo futsi aphila imphilo lekahle. Bengiyitsandza indlela lebekangiphatsa ngayo. Bekanako konkhe lebengikufuna kumuntfu lengitawushada naye, kuphela nje bekangasiye Fakazi.” Uchubeka utsi: “Indlela bengitiva ngayo beyenta kube matima kutsi ngale. Ngaleso sikhatsi, bengitiva ngingedvwa, futsi bengifuna kushada kodvwa bengisengakamtfoli Fakazi lebengingashada naye.” Nobe kunjalo, Rosa akagcinanga ngekunaka loko lebekakubona nje kuphela. Wacabangisisa ngekutsi sincumo sakhe besitabutsintsa njani buhlobo bakhe naJehova. Ngako wayekela ngalokuphelele kutihlanganisa nalelijaha, futsi waba matasa emsebentini waJehova. Ngekushesha ngemuva kwaloko, wamenywa kutsi aye eSikolweni Sebavangeli BeMbuso, futsi nyalo ulihlahlandlela lelikhetsekile. Rosa utsi: “Jehova ungiphe tibusiso letinyenti kakhulu futsi ngiyajabula ngato.” Nanobe kungenteka kungabi melula kuhlale sihamba ngekukholwa etindzabeni letiphatselene nenhlitiyo, kodvwa kuhlale kusisita kucondziswa nguJehova.

NASITFOLA SICONDZISO LESIVELA ENHLANGANWENI

13. Yini lengenta sihambe ngekubona nasitfola sicondziso lesivela enhlanganweni?

¹³ Sivame kutfola sicondziso lesivela enhlanganweni lesisicondzisa endleleni lokufanele sikhonte ngayo Nkulunkulu, singasitfola kulabadzala belibandla, kumbonisi wesigodzi, ehhovisini leligatja nobe eSigungwini Lesibusako. Kodvwa kutsiwani nangabe sihle singasicondzi sizatfu lesente sanikwa sicondziso lesitsite? Singahle sibone kuphela tizatfu letenta singasilungeli. Ngetulu kwaloko, singaze sicale kunaka emaphutsa alabazalwane labasiniketa lesicondziso.

14. Yini letasisita kutsi sihambe ngekukholwa nasitfola sicondziso lesivela enhlanganweni? (KumaHebheru 13:17)

¹⁴ Nasihamba ngekukholwa, siyetsemba kutsi nguJehova locondzisa lenhlangano yakhe futsi uyatati timo tetfu. Ngenca yaloko, siyashesha kulalela, futsi loko sikwenta sinembono lokahle. (Fundza KumaHebheru 13:17.) Siyacondza kutsi kulalela kwetfu kwenta kutsi kube nebunye ebandleni. (Ef. 4:2, 3) Siyetsemba nekutsi ngisho nobe siholwa bazalwane labanesono, Jehova utasibusisa nasilalela. (1 Sam. 15:22) Ngesikhatsi lesifanele, utawulungisa nobe ngabe yini ledzinga kulungiswa.​—Mik. 7:7.

15-16. Yini leyasita lomunye umzalwane kutsi ahambe ngekukholwa ngisho nobe bekasingabata sicondziso lasitfola? (Buka nesitfombe.)

¹⁵ Cabanga ngaloko lokwenteka lokukhombisa kutsi kusita ngani kuhamba ngekukholwa. Ngisho nobe Spanish silulwimi lolukhulunywa kakhulu ePeru, bantfu labanyenti bakhuluma tilwimi temdzabu. Lolunye lwaletilwimi siQuechua. Kwaphela iminyaka leminyenti bazalwane nabodzadze labakhuluma siQuechua bafuna labo labakhuluma lolulwimi endzaweni labashumayela kuyo. Nanobe kunjalo, kwashintjwa indlela lebekushunyayelwa ngayo kuze ihambisane nemtsetfo wahulumende. (Rom. 13:1) Kodvwa labanye bebatibuta kutsi lolushintjo angeke yini luphatamise indlela umsebenti wekushumayela lowentiwa ngayo kulensimu. Ngenca yekutsi labazalwane balalela lesicondziso, Jehova wababusisa batfola bantfu labanyenti labakhuluma siQuechua.

¹⁶ Lomunye lomdzala welibandla losebandleni lelikhuluma siQuechua, lokutsiwa nguKevin, bekangulomunye walabo bebakhatsatekile. Utsi: “Ngacabanga ngatsi: ‘Nyalo sesitabatfola njani bantfu labakhuluma siQuechua?’” Yini Kevin layenta? Utsi: “Ngakhumbula umbhalo weTaga 3:5. Ngetulu kwaloko, ngacabanga ngaMosi. Bekufanele ahole sive sema-Israyeli asikhiphe eGibhithe asiholele endzaweni lebekubonakala ngatsi batawuvaleleka kuyo, futsi kube melula ngebaseGibhithe kutsi babahlasele. Nanobe kunjalo, walalela, futsi Jehova wambusisa ngendlela lemangalisako.” (Eks. 14:1, 2, 9-11, 21, 22) Kevin bekakulungele kusebentisa lenye indlela yekushumayela. Waba yini umphumela? Utsi: “Ngamangala ngendlela Jehova lasibusisa ngayo. Esikhatsini lesendlulile, besihamba kakhulu emsebentini wekushumayela futsi ngalesinye sikhatsi besitfola umuntfu munye nobe babili labakhuluma siQuechua. Kodvwa nyalo sesiya etindzaweni lapho kutfolakala khona bantfu labanyenti labakhuluma lolulwimi. Ngenca yaloko, sesicoca nebantfu labanyenti, sibuyele kubo futsi sidadishe nabo liBhayibheli. Selikhulile linani lalabo lababa khona emihlanganweni yetfu yelibandla.” Nasihamba ngekukholwa, Jehova uhlale asibusisa.

17. Yini loyifundzile kulesihloko?

¹⁷ Sesicoce ngetintfo letintsatfu lapho khona kubalulekile kutsi sichubeke sihamba ngekukholwa. Nanobe kunjalo, kufanele sichubeke sihamba ngekukholwa kuto tonkhe tintfo, lokufaka ekhatsi nasikhetsa loko lesitijabulisa ngako, nasenta tincumo letimayelana nemfundvo nobe nasikhulisa bantfwana. Kunobe ngutiphi tincumo lokufanele sitente, kufanele singacondziswa nje kuphela nguloko lesikubonako kodvwa kufanele sicondziswe nabuhlobo betfu naJehova, seluleko sakhe kanye nesetsembiso sakhe sekutsi utasinakekela. Nasenta njalo, sitawukhona ‘kuhlonipha Jehova Nkulunkulu wetfu kuze kube phakadze.’​—Mik. 4:5.