Sandla SaJehova Asiyuze Sibe Sifisha!

1. Mosi wakhombisa njani kutsi unekukholwa ngesikhatsi ahola sive sema-Israyeli asikhipha eGibhithe?

INCWADZI YAKUMAHEBHERU ikhuluma ngebantfu labanyenti lebebanekukholwa kuJehova. Lomunye wabo nguMosi, lebekanekukholwa lokucine kakhulu. (Heb. 3:2-5; 11:23-25) Wakhombisa kutsi unekukholwa ngesikhatsi akhipha sive sema-Israyeli eGibhithe. Akazange avume kwesatjiswa nguFaro kanye nelibutfo lakhe. Wetsembela kuJehova, wahola labantfu eLwandle Lolubovu futsi ngekuhamba kwesikhatsi wabaholela ehlane. (Heb. 11:27-29) Ema-Israyeli lamanyenti ayekela kwetsemba kutsi Jehova utawanakekela, kodvwa Mosi wachubeka etsembela kuNkulunkulu wakhe. Akazange amdvumate Mosi ngekwetsembela kuye, ngobe Nkulunkulu wanika labantfu kudla nemanti ngalokusimangaliso kuze baphile kulelihlane lelingenalutfo.a​—Eks. 15:22-25; Hla. 78:23-25.

2. Yini leyenta Nkulunkulu wabuta Mosi lombuto lotsi: “Sandla saJehova sifishane yini”? (Numeri 11:21-23)

² Ngisho nobe Mosi bekanekukholwa lokucinile, kepha ngemuva kwemnyaka akhiphe ema-Israyeli ngalokusimangaliso eGibhithe, wangabata kutsi Jehova angakhona kunika labantfu inyama. Mosi bekangaboni kutsi Jehova angakhona njani kwenetisa letigidzi talabantfu lebetikulelihlane ngenyama. Nakaphendvula Mosi, Jehova wambuta watsi: “Sandla saJehova sifishane yini?” (Fundza Numeri 11:21-23.) Emavi latsi “sandla saJehova” asho umoya wakhe longcwele, nobe emandla akhe lasebentako. Ngalamafisha, Jehova bekabuta Mosi atsi: ‘Mbambambamba ucabanga kutsi ngitawehluleka yini kwenta loko lengitsite ngitawukwenta?’

3. Kubaluleke ngani kutsi sibe nendzaba naloko lokwenteka kuMosi nakuma-Israyeli?

³ Ukile yini watibuta kutsi Jehova utawukhona yini kunakekela wena nobe umndeni wakho? Ngisho nobe ukile nobe cha, asesicoce ngalokwenteka kuMosi nakuma-Israyeli, labangazange betsembe kutsi Nkulunkulu utawutinakekela tidzingo tabo. Ngetulu kwaloko, sitawubuka leminye imibhalo letasisita siciniseke kutsi sandla saJehova asiyuze sibe sifisha.

FUNDZA KUMOSI NAKUMA-ISRAYELI

4. Yini leyenta labanye bantfu bacala kungabata kutsi Jehova utawutinakekela tidzingo tabo?

⁴ Yini leyenta ema-Israyeli lamanyenti acala kungabata kutsi Jehova utawunakekela tidzingo tawo? Besekuphele sikhatsi lesitsite ema-Israyeli kanye “nelicembu lelikhulu” lebantfu labangasiwo ema-Israyeli basehlane njengobe bebesuka eGibhithe baya eVeni Lesetsembiso. (Eks. 12:38; Dut. 8:15) Labantfu labangasiwo ema-Israyeli babese bayadzinwa kudla imana futsi kwenteka lokufanako nakulamanye ema-Israyeli lamanyenti, labese ahlanganyela nabo kulokukhonona. (Num. 11:4-6) Labantfu babese bakhumbula kudla bebakudla eGibhithe. Ngenca yekutsi bebakhonona kuMosi, kungenteka wacabanga kutsi nguye lebekufanele atfolele bonkhe labantfu lenyama, kepha bekangati kutsi angayitfola njani.​—Num. 11:13, 14.

5-6. Yini lesingayifundza endleleni bantfu labangasiwo ema-Israyeli labafaka ngayo umoya lomubi kulesive?

⁵ Labantfu labangasiwo ema-Israyeli bebangabongi ngato tonkhe tintfo Jehova bekabentele tona, futsi lamanye ema-Israyeli acala kucabanga njengabo. Natsi ungasitsintsa umoya wekungabongi lokhona kulelive futsi sicale kungasenetiseki ngaloko Jehova lesisekela ngako. Loko kungenteka nangabe silangatelela tintfo lesake saba nato esikhatsini lesendlulile nobe nangabe sibadlela umona labanye ngaloko labanako. Kodvwa sitawujabula kakhulu nasitifundzisa kwenetiseka ngisho nobe sikusiphi simo.

⁶ Ema-Israyeli bekufanele akhumbule kutsi Nkulunkulu bekawacinisekise ngekutsi atawujabulela tintfo letinyenti letimnandzi nawefika ekhaya lawo lelisha. Lesetsembiso besitawugcwaliseka eVeni Lesetsembiso, hhayi endleleni nabasesehlane. Ngendlela lefanako, kunekutsi sinake kakhulu loko lesite kona kulelive, senta kahle ngekucabanga ngaloko Jehova letsembise kusinika kona eveni lelisha. Singaphindze sicabangisise ngemibhalo lengasisita kutsi simetsembe kakhulu Jehova.

7. Yini leyenta siciniseke kutsi sandla saJehova asisifisha?

⁷ Nobe kunjalo, kungenteka uyatibuta kutsi yini leyenta Nkulunkulu wabuta Mosi watsi: “Sandla saJehova sifishane yini?” Kungenteka Jehova bekasita Mosi acabange ngekutsi sandla sakhe asigcini nje ngekuba nemandla, kepha singafika nobe ngukuphi. Nkulunkulu bekanganiketa ema-Israyeli inyama lenyenti ngisho nobe bekasehlane lelikhashane. Wakhombisa kutsi angakhona kusita bantfu bakhe nobe ngukuphi ‘ngesandla sakhe lesinemandla kanye nesandla leseluliwe.’ (Dut. 7:19) Ngako ngisho nobe unayiphi inkinga, kufanele uciniseke kutsi sandla saJehova leseluliwe singafika kuwe ngisho nobe ukuphi.​—Hla. 138:6, 7.

8. Singakugwema njani kwenta liphutsa lelifana nalelentiwa bantfu labanyenti ehlane? (Buka nesitfombe.)

⁸ Ngekushesha Jehova wenta loko lakwetsembisa, waniketa labantfu tinyoni letinyenti kakhulu. Nobe kunjalo, ema-Israyeli akazange ambonge Nkulunkulu ngalesimangaliso. Kunaloko, linyenti lawo belifuna kutitsatsela tinyoni letinyenti kunaleto bebatidzinga. Basebenta busuku nemini betama kutitsatsela tinyoni letinyenti kakhulu. Jehova wabatfukutselela kakhulu “labantfu lebebabukhali,” futsi wabajezisa. (Num. 11:31-34) Kukhona lesingakufundza kulendzaba. Kufanele sinake kutsi singabi bukhali. Ngisho nobe sinjingile nobe seswele, kutibekela “umcebo ezulwini” kufanele kube yintfo leta kucala ekuphileni kwetfu ngekutsi sakhe buhlobo lobuhle naJehova naJesu. (Mat. 6:19, 20; Luk. 16:9) Nasenta njalo, singaciniseka kutsi Jehova utasinakekela.

9. Yini lesingaciniseka ngayo?

⁹ Jehova ukulungele kusita bantfu bakhe lamuhla. Nobe kunjalo, loko akusho kutsi asiyuze sibe netinkinga tetimali nobe seswele kudla.b Kodvwa Jehova akayuze asishiye. Utasisita etinkingeni letehlukahlukene lesibhekana nato. Singakhombisa njani kutsi setsembele kuJehova kuze asinakekele? Ase sicoce ngetimo letimbili: (1) Nasinetinkinga tetimali, nalapho (2) sicabanga kutsi sitayitfola njani imali nasesikhulile.

NASIBHEKANA NETINKINGA TETIMALI

10. Ngutiphi tinkinga tetimali lesingahle sibhekane nato?

¹⁰ Njengobe lelive liya ngasekupheleni, singalindzela kutsi simo setemnotfo sibe sibi kakhulu. Kushintjashintja kwesimo setepolitiki, timphi, tehlakalo temvelo nobe tifo letinsha letingumshayabhuce kungenta silahlekelwe yimali, kuphele umsebenti, silahlekelwe tintfo lesinato nobe emakhaya etfu. Kungahle kudzingeke sifune umsebenti lomusha endzaweni lesihlala kuyo, nobe sitfutsele kulenye indzawo nemindeni yetfu kuze sitawukhona kuyinakekela. Yini lengasisita kuze sente tincumo letikhombisa kutsi siyasetsemba sandla saJehova?

11. Yini lengakusita kutsi ubhekane netinkinga tetimali? (Lukha 12:29-31)

¹¹ Intfo lebaluleke kakhulu longayenta kukhuluma naJehova ngetintfo letikukhatsatako futsi loko kungakusita kakhulu. (Taga 16:3) Mcele akuphe kuhlakanipha kuze wente tincumo letikahle futsi uhlale wehlise umoya kuze ugweme “kukhatsateka kakhulu” ngesimo lokuso. (Fundza Lukha 12:29-31.) Mncenge kutsi akusite ngetintfo lotidzingako. (1 Thim. 6:7, 8) Cwaninga etincwadzini tetfu kutsi yini longayenta kuze ubhekane netinkinga tetimali ngendlela lephumelelako. Labanyenti kubasitile kubuka tintfo letitfolakala ku jw.org letikhuluma ngetinkinga tetimali.

12. Ngumiphi imibuto lengasita umKhristu kutsi ente sincumo lesikahle lesitawusita umndeni wakhe?

¹² Labanye balingekile kutsi batsatse umsebenti lodzinga kutsi bashiye umndeni wabo, kodvwa bufakazi bukhombisa kutsi loko kusincumo lesikabi. Ngaphambi kwekutsi utsatse umsebenti lomusha, ungacabangi nje kuphela ngekutsi utawutfola malini, kodvwa cabanga nangebuhlobo bakho naJehova. (Luk. 14:28) Tibute: ‘Umshado wami utawutsintseka njani nangabe ngishiya ngemuva loyo lengishade naye? Ngitawukhona yini kuya kuyo yonkhe imihlangano yelibandla, emsebentini wekushumayela futsi ngicitse sikhatsi nebazalwane bami nabodzadze?’ Nangabe unebantfwana, ungaphindze utibute nangu umbuto lobalulekile: ‘Ngitabakhulisa njani bantfwana bami “ngekubayala nangesicondziso saJehova” nangabe ngingekho nabo?’ (Ef. 6:4) Nawenta sincumo, condziswa yindlela Nkulunkulu lacabanga ngayo, hhayi tihlobo nebangani labangatihloniphi timiso teliBhayibheli.c Tony, lohlala enshonalanga ye-Asia, wavulekelwa ngematfuba lamanyenti ekusebenta ngesheya kwetilwandle. Kodvwa ngemuva kwekuthantaza ngalendzaba futsi acoce nemkakhe, wancuma kungayitsatsi lemisebenti kepha betama kunciphisa tindleko temndeni. Nakabuka emuva, Tony utsi: “Ngikhonile kusita bantfu labambalwa kutsi bamati Jehova, futsi bantfwana betfu bayalitsandza liciniso. Umndeni wetfu ufundzile kutsi nangabe siphila ngekuvumelana nemavi lakuMatewu 6:33, Jehova utasinakekela.”

NASICABANGA KUTSI SITAYITFOLA NJANI IMALI NASESIKHULILE

13. Ngutiphi tintfo lesingatenta nyalo letingasisita nasesikhulile?

¹³ Singaphindze sikhombise kutsi sisetsemba kanganani sandla saJehova nasicabanga kutsi sitawuba njani simo setfu nasesikhulile. LiBhayibheli lisikhutsata kutsi sisebente kamatima kuze sikhone kuba naloko lesikudzingako esikhatsini lesitako. (Taga 6:6-11) Nangabe sikhona, kukahle kutsi sibekele lokutsite eceleni lesitakusebentisa esikhatsini lesitako. Imali isivikelo ngelizinga lelitsite. (Shu. 7:12) Nobe kunjalo, kufanele singakuvumeli kucongelela imali kute kucala ekuphileni kwetfu.

14. Kubaluleke ngani kutsi sicabange ngalokushiwo ngumbhalo waKumaHebheru 13:5 nasicabanga kutsi sitayitfola njani imali esikhatsini lesitako?

¹⁴ Jesu waveta kutsi kubulima kanganani kutsi umuntfu acongelele imali “kodvwa abe angakacebi emehlweni aNkulunkulu.” (Luk. 12:16-21) Kute lowatiko kutsi likusasa limphatseleni. (Taga 23:4, 5; Jak. 4:13-15) Njengobe sibalandzeli baKhristu, sonkhe kunenkinga lesibhekana nayo. Jesu watsi kufanele sikulungele ‘kushiya tonkhe tintfo’ lesinato kuze sibe bafundzi bakhe. (Luk. 14:33) EmaKhristu aseJudiya akwenta ngenjabulo loko. (Heb. 10:34) Lamuhla, bazalwane nabodzadze labanyenti kudzingeke kutsi badzele imali ngenca yekwala kusekela emacembu etepolitiki. (Semb. 13:16, 17) Yini lebasitile kutsi bakwente loko? Basetsemba ngalokuphelele setsembiso saJehova lesitsi: “Ngeke ngize ngikushiye, futsi ngeke ngize ngikulahle.” (Fundza KumaHebheru 13:5.) Senta konkhe lesingakwenta kuze sibe naloko lesitakudzinga esikhatsini lesitako, futsi nakuvela timo letingakalindzeleki ekuphileni kwetfu, siyetsemba kutsi Jehova utasinakekela.

15. Ngumuphi umbono lokahle batali labangemaKhristu lokufanele babe nawo ngebantfwana babo? (Buka nesitfombe.)

¹⁵ Etindzaweni letinyenti, batali baba nebantfwana ngobe bafuna kutsi labantfwana babanakekele nasebakhulile. LiBhayibheli litsi batali kufanele banakekele bantfwana babo. (2 Khor. 12:14) Kuliciniso kutsi batali bangahle badzinge kusitwa ngetindlela letitsite njengobe bakhula, futsi bantfwana labanyenti bayakujabulela kukwenta loko. (1 Thim. 5:4) Kodvwa batali labangemaKhristu bayati kutsi injabulo lenkhulu bayitfola ngekusita bantfwana babo kutsi bakhonte Jehova kunekutsi babakhulise banembono wekutsi ngekuhamba kwesikhatsi batabasekela ngetimali.​—3 Joh. 4.

16. Batali bangabasita njani bantfwana babo kutsi bakhone kutisekela ngekwetimali nasebakhulile? (Kubase-Efesu 4:28)

¹⁶ Ngesibonelo sakho, fundzisa bantfwana bakho kutsi betsembele kuJehova njengobe ubasita kutsi bakhone kutinakekela ngekuhamba kwesikhatsi. Kusukela basebancane, bakhombise kutsi kubaluleke ngani kusebenta kamatima. (Taga 29:21; fundza Kubase-Efesu 4:28.) Njengobe bakhula, basite kutsi batimisele esikolweni. Batali labangemaKhristu benta kahle ngekucwaninga futsi basebentise timiso teliBhayibheli kuze basite bantfwana babo bancume kutsi bangakusebentisa njani kahle loko labakufundza esikolweni. Loko kutawusita labantfwana kutsi bakhone kutisekela futsi babe nesikhatsi lesinyenti sekushumayela.

17. Yini lesingaciniseka ngayo?

¹⁷ Bantfu baJehova labetsembekile bangaciniseka kutsi angakhona kubanakekela ngetintfo labatidzingako, futsi unaso sifiso sekukwenta loko. Njengobe sisondzela ekupheleni kwalelive, singalindzela kutsi kwetsembela kwetfu kuJehova kuvivinyeke. Kodvwa ngisho kungentekani, shengatsi singatimisela kwetsemba kutsi Jehova utawusebentisa emandla akhe kuze asisite ngetintfo lesitidzingako. Singaciniseka kutsi sandla sakhe lesinemandla naleselulekile asiyuze sibe sifishane kutsi singehluleka kufika kitsi.