“Tikhetseleni . . . Kutsi Nitawukhonta Bani”

1. Yini lokufanele siyente kuze sijabule mbamba, futsi ngasiphi sizatfu? (Isaya 48:17, 18)

BABE wetfu wasezulwini usitsandza kakhulu, futsi ufuna sikujabulele kuphila nyalo kanye nasesikhatsini lesitako. (Shu. 3:12, 13) Wasidala saba nemakhono lamangalisako, kodvwa akazange asidale saba nelikhono lekutibusa nobe lekutikhetsela tsine lokulungile nalokungakalungi. (Shu. 8:9; Jer. 10:23) Uyati kutsi kuze sijabule mbamba, kufanele simkhonte futsi siphile ngekuvumelana netimiso takhe.​—Fundza Isaya 48:17, 18.

2. Yini Sathane lafuna siyikholelwe, futsi Jehova ukhombise njani kutsi Sathane unemanga?

² Sathane ufuna sikholelwe kutsi asimdzingi Jehova kuze sijabule, utsi bantfu bangakhona kutibusa. (Gen. 3:4, 5) Kuze Jehova akhombise kutsi Sathane unemanga, uvumele bantfu kutsi batibuse sikhatsi lesitsite. Wonkhe muntfu uyatibonela umphumela lobuhlungu waloko. Ngakulokunye, imiBhalo inetibonelo letinyenti temadvodza nebesifazane labaphila imphilo lejabulisako ngenca yekukhonta Jehova. Jesu Khristu usibonelo lesihamba embili. Ase sicale sicoce ngekutsi yini leyamenta wakhetsa kukhonta Jehova. Sitawubese sicoca ngekutsi yini leyenta Babe wetfu wasezulwini akufanele kutsi simkhonte. Ekugcineni, sitawucoca ngaletinye tizatfu letenta sikhetse kukhonta Jehova.

LOKWENTA JESU WAKHETSA KUKHONTA JEHOVA

3. Yini Jesu letsenjiswa yona, futsi ngusiphi sincumo lasenta?

³ Ngesikhatsi Jesu alamhlabeni, kwadzingeka ente sincumo sekutsi utawukhonta bani. Ngekushesha nje ngemuva kwekubhajatiswa, Sathane watsi utamnika yonkhe imibuso lesemhlabeni nakangaguca kanye nje amkhonte. Jesu wamphendvula watsi: “Hamba Sathane! Ngobe kubhaliwe kutsi: ‘Kufanele ukhotsamele Jehova Nkulunkulu wakho, futsi nguye yedvwa lokufanele umkhonte.’” (Mat. 4:8-10) Yini leyenta Jesu wenta lesincumo? Ase sicoce ngaletinye tizatfu.

4-5. Ngutiphi letinye tizatfu letenta Jesu wakhetsa kukhonta Jehova?

⁴ Sizatfu lesihamba embili lesenta Jesu wakhetsa kukhonta Jehova lutsandvo​—umtsandza kakhulu Babe wakhe futsi kute lokungacedza lolutsandvo. (Joh. 14:31) Ngetulu kwaloko, Jesu ukhonta Jehova ngobe loko kuyintfo lekahle. (Joh. 8:28, 29; Semb. 4:11) Uyati kutsi nguye uMtfombo wekuphila, wetsembekile futsi uyephana. (Hla. 33:4; 36:9; Jak. 1:17) Bekahlale akhuluma liciniso kuJesu futsi nguye lonike Jesu tonkhe tintfo lanato. (Joh. 1:14) Ngakulokunye, Sathane ubange kufa. Ungumcambimanga loligovu naloticabangela yena. (Joh. 8:44) Njengobe Jesu akwati loku, akazange nakancane sekakucabange kulingisa Sathane ngekutsi avukele Jehova.​—Fil. 2:5-8.

⁵ Lesinye sizatfu lesenta Jesu wakhetsa kukhonta Jehova kutsi bekabuke phambili kuloko lebekutawufezeka ngenca yekwetsembeka kwakhe. (Heb. 12:2) Bekati kutsi nakahlala etsembekile, bekatawungcwelisa libito laBabe wakhe futsi ente kube nendlela yekucedza konkhe kuhlupheka lokwabangelwa nguDeveli.

LOKWENTA JEHOVA KUMFANELE KUTSI SIMKHONTE

6-7. Yini leyenta bantfu labanyenti lamuhla bangamkhonti Jehova, kodvwa yini leyenta akufanele kutsi simkhonte?

⁶ Lokwenta bantfu labanyenti lamuhla bangamkhonti Jehova kutsi basengakabati buntfu bakhe lobuhle futsi basengakatati tonkhe tintfo labentele tona. Bafana nebantfu lebebashunyayelwa nguPawula e-Athene, nabo bebangamati Nkulunkulu.​—Imis. 17:19, 20, 30, 34.

⁷ Pawula wachazela labo lebebamlalele kutsi Nkulunkulu weliciniso “unika bonkhe bantfu kuphila, umoya, nato tonkhe tintfo.” Wengeta watsi: “Ngaye siyaphila, siyanyakata, futsi sikhona.” Nkulunkulu unguMdali, nguye ‘lowenta tonkhe tive ngemuntfu munye,’ ngako unelilungelo lekutsi simkhonte.​—Imis. 17:25, 26, 28.

8. Yini Jehova langayuze ayente? Chaza.

⁸ Njengobe Jehova anguMdali futsi anguMbusi wendalo yonkhe, angabaphocelela bantfu kutsi bamkhonte. Kodvwa akayuze akwente loko. Kunaloko, usinika bufakazi bekutsi ukhona nekutsi utsandza ngamunye wetfu ngalokujulile. Ufuna kutsi bantfu labanyenti kakhulu babe bangani bakhe kuze kube phakadze. (1 Thim. 2:3, 4) Kuze loko kwenteke, uyasicecesha kuze sifundzise labanye ngetinjongo takhe futsi sibatjele ngetintfo letinhle latawutentela bantfu. (Mat. 10:11-13; 28:19, 20) Usinike emabandla lesingamkhontela kuwo futsi wahlela kutsi kube nalabadzala bemabandla labanelutsandvo labatasinakekela.​—Imis. 20:28.

9. Ngubuphi bufakazi lobukhombisa kutsi Jehova ubatsandza bonkhe bantfu?

⁹ Lutsandvo lwaJehova lolumangalisako lubonakala endleleni laphatsa ngayo labo labakhetsa kungabunaki bufakazi bekutsi ukhona. Cabanga nganaku: Kusukela kadzeni, tigidzigidzi tebantfu tikhetse kutikhetsela tona loko lokulungile nalokungakalungi. Nobe kunjalo, ngemusa Jehova ubanikete loko labakudzingako kuze bachubeke baphila futsi bakujabulele kuphila. (Mat. 5:44, 45; Imis. 14:16, 17) Ubente bakhona kujabulela budlelwane lobuhle nalabanye, kuba nemindeni kanye nekujabulela imiphumela yekusebenta kwabo kamatima. (Hla. 127:3; Shu. 2:24) Lobufakazi buveta ngalokucacile kutsi Babe wetfu wasezulwini ubatsandza bonkhe bantfu. (Eks. 34:6) Nyalo asesitikhumbute ngaletinye tizatfu letenta sikhetse kukhonta Jehova nekutsi ubabusisa njani labo labakhetsa kumkhonta.

LOKWENTA SIKHETSE KUKHONTA JEHOVA

10. (a) Ngusiphi sizatfu lesihamba embili lesenta sikhonte Jehova? (Matewu 22:37) (b) Sikusite njani sineke saJehova? (Tihlabelelo 103:13, 14)

¹⁰ NjengaJesu, sizatfu lesihamba embili lesenta sikhonte Jehova kutsi simtsandza kakhulu. (Fundza Matewu 22:37.) Sitiva sisondzelene naye nasifundza ngebuntfu bakhe. Sibonelo nje, cabanga ngesineke lasikhombisa sona. Ngesikhatsi ema-Israyeli angamlaleli, wawancenga watsi: “Ngicela niyekele kwenta lokubi.” (Jer. 18:11) Jehova uyakhumbula kutsi sinesono, uyakhumbula kutsi silutfuli. (Fundza Tihlabelelo 103:13, 14.) Nawucabangisisa ngesineke saJehova nangalobunye buntfu bakhe lobuhle, loko akukwenti yini ufune kumkhonta kuze kube phakadze?

11. Ngutiphi letinye tizatfu letenta sikhonte Babe wetfu wasezulwini?

¹¹ Lokunye lokusenta sikhetse kukhonta Jehova kutsi leyo yintfo lekahle lesingayenta. (Mat. 4:10) Ngetulu kwaloko, siyati kutsi kwetsembeka kwetfu kufeza lokutsite. Kwetsembeka kwetfu kungcwelisa libito laNkulunkulu, kukhombise kutsi Develi unemanga, futsi kwenta inhlitiyo yaBabe wetfu ijabule. Ngetulu kwaloko, nangabe sikhetsa kukhonta Jehova nyalo, siba nelitsemba lekumkhonta kuze kube phakadze!​—Joh. 17:3.

12-13. Yini lesiyifundza kulokwenteka kuJane naPam?

¹² Singamtsandza kakhulu Jehova ngisho sisebancane, futsi lolutsandvo lungachubeka luvutsa njengobe sikhula. Naka naku lokwenteka kuJane naPam,a lababosisi. Jane bekaneminyaka lengu-11, Pam aneminyaka lengu-10 ngesikhatsi bacala kudadisha liBhayibheli. Nanobe batali babo bebete sifiso sekudadisha liBhayibheli, kodvwa babavumela boJane naPam kutsi badadishe liBhayibheli naboFakazi, kuphela nje nabatawuya esontfweni nemndeni ngetimphelasontfo. Jane utsi: “Loko lengakufundziswa boFakazi eBhayibhelini kwangisita kutsi ngimelane nekucindzetelwa bontsanga yami kutsi ngisebentise tidzakamiva futsi ngitiphatse kabi.”

¹³ Ngemuva kweminyaka lembalwa, baba bamemeteli. Ngemuva kwesikhatsi, baba ngemahlahlandlela futsi ngesikhatsi lesifanako babe banakekela batali babo lesebakhulile. Jane nakabuka emuva kuloko lokwenteke kubo utsi: “Ngitibonele kutsi Jehova uhlale abanakekela bangani bakhe, nekutsi ‘Jehova uyabati labo lababakhe,’ njengobe kusho 2 KuThimothi 2:19.” Kusebaleni kutsi Jehova uyabanakekela labo labakhetsa kumtsandza nekumkhonta!

14. Singamvikela njani Jehova ngaloko lesikushoko nalesikwentako? (Buka netitfombe.)

¹⁴ Sifuna bantfu bati kutsi tintfo letimbi labativile ngaNkulunkulu atisilo liciniso. Cabanga nganasi simo: Umngani wakho lomkhulu unemusa, uyephana futsi uyacolelana. Ngalelinye lilanga uva lotsite utsi lomngani wakho akananhlitiyo futsi aketsembeki. Wenta njani? Uyamvikela. Ngendlela lefanako, Sathane nalabo labamsekelako nabetama kona lidvumela laJehova ngekutsi basakate emanga ngaye sibese sikhuluma liciniso ngaJehova futsi sivikele libito lakhe ngesibindzi. (Hla. 34:1; Isa. 43:10) Sikhombisa kutsi sifuna kukhonta Jehova ngemphefumulo wetfu wonkhe ngaloko lesikushoko nangaloko lesikwentako.

15. Kwamsita njani umphostoli Pawula kushintja imigomo yakhe? (KubaseFiliphi 3:7, 8)

¹⁵ Sishintja imigomo yetfu ekuphileni ngekutitsandzela kuze sikhone kukhonta Jehova ngendlela layemukelako nobe kuze sente lokunyenti emsebentini wakhe. Sibonelo nje, umphostoli Pawula washiya sikhundla lesiphakeme emmangweni wakubo kuze alandzele Khristu futsi akhonte Jehova. (Gal. 1:14) Ngenca yaloko, waphila imphilo lejabulisako, futsi watfola litfuba lelihle lekubusa naKhristu ezulwini. Akazange atisole ngesincumo lasenta sekukhonta Jehova, futsi natsi angeke size sitisole.​—Fundza KubaseFiliphi 3:7, 8.

16. Yini lesiyifundza kulokwenteka kuJulia? (Buka netitfombe.)

¹⁶ Nangabe kukhonta Jehova sikwenta kute kucala ekuphileni kwetfu, singaba nemphilo lejabulisako nyalo nasesikhatsini lesitako. Cabanga ngalokwenteka kulomunye dzadze lokutsiwa nguJulia. Ngaphambi kwekutsi afundze liciniso, bekahlabela ekwayeni yelisontfo kusukela asemncane. Lomunye umhlabeleli we-opera walibona likhono lakhe futsi wamcecesha. Kungakapheli sikhatsi lesinganani, Julia besekadvumile futsi besekahlabela emahholeni latiwako. Ngesikhatsi afundza kulesinye sikolwa lesidvumile semculo, lomunye lafundza naye wacala kumcocela ngaNkulunkulu futsi wamchazela kutsi ligama lakhe nguJehova. Kungakapheli sikhatsi lesidze, Julia wacala kudadisha liBhayibheli kabili ngeliviki. Ekugcineni, wancuma kucitsa sikhatsi sakhe nemandla akhe akhonta Jehova kunekutsi abe ngumhlabeleli we-opera. Bekungasimelula kwenta lesincumo. Utsi: “Bantfu labanyenti bangitjela kutsi ngidlala ngesiphiwo sami, kodvwa bengifuna kusebentisa kuphila kwami kuze ngikhonte Jehova ngalokugcwele.” Utiva njani lamuhla ngesincumo lasenta eminyakeni lengetulu kwalengu-30 leyendlulile? Utsi: “Nginekuthula kwengcondvo, futsi ngiyaciniseka kutsi Jehova utawenetisa tonkhe tifiso tenhlitiyo yami esikhatsini lesitako.”​—Hla. 145:16.

CHUBEKA UKHONTA JEHOVA

17. Kuncipha kwesikhatsi lesisele kubatsintsa njani labo labakhetse kukhonta Nkulunkulu nalabo labasengakakhetsi kumkhonta?

¹⁷ Sikhatsi lesisele sesinciphile. Umphostoli Pawula wabhala watsi: “Ngobe ‘sekusele kancane’ kutsi ‘loyo lotako efike, futsi ngeke ephute.’” (Heb. 10:37) Kusitsintsa njani loko? Sikhatsi lesisele sekutsi bantfu bakhetse kukhonta Jehova sesinciphile. (1 Khor. 7:29) Nangabe sesivele sente sincumo sekukhonta Nkulunkulu, siyati kutsi nanobe kutawudzingeka sibeketelele tinkinga, kutawuba kwesikhashana.

18. Yini Jehova naJesu labafuna siyente?

¹⁸ Jesu akagcinanga nje ngekukhutsata bafundzi bakhe kutsi bamlandzele, kodvwa wabakhutsata kutsi bachubeke bamlandzela. (Mat. 16:24) Ngako nangabe sekuphele iminyaka sikhonta Jehova, shengatsi singachubeka sitimisela kungayekeli. Kufanele sisebente kamatima kuze sichubeke sinamatsela esincumeni setfu sekukhonta Jehova. Kungahle kungabi melula, kodvwa sitawutfola kwenetiseka kanye netibusiso letinyenti ngisho kwanyalo!​—Hla. 35:27.

19. Yini lesiyifundza kulokwenteka kuGene?

¹⁹ Labanye beva ngatsi kufanele badzele lokunyenti kuze bakhonte Jehova. Nawusemusha, uva ngatsi kukhona yini lokukulahlekelako nawukhonta Jehova? Lomunye umzalwane losemusha lokutsiwa nguGene utsi: “Bengiva ngatsi kuba nguFakazi waJehova bekungincisha injabulo. Bengibona ngatsi bantfwana labanyenti lebengikhula nabo bajabulile njengobe baya emaphathini, banetintfombi, futsi badlala imidlalo ye-video lenebudlova, ngibe mine ngicitsa sikhatsi sami ngiya emihlanganweni yelibandla futsi ngishumayela.” Lendlela yekucabanga yaba namiphi imiphumela kuGene? Utsi: “Ngacala kuphila imphilo lembhacambili, futsi ekucaleni bengijabulile. Kodvwa lenjabulo yaba yesikhashana. Ngabese ngicala kucabanga ngemaciniso laseBhayibhelini lebengikhetse kungawanaki futsi ngancuma kukhonta Jehova ngenhlitiyo lephelele. Kusukela lapho, kubonakala ngatsi Jehova uyiphendvule yonkhe imithantazo yami.”

20. Yini lokufanele sitimisele kuyenta?

²⁰ Umhlabeleli wahlabelela Jehova watsi: “Uyajabula loyo lomkhetsako futsi umsondzete kuwe kute ahlale emabaleni akho.” (Hla. 65:4) Shengatsi natsi singatimisela kuchubeka sikhonta Jehova njengaJoshuwa lowatsi: “Kodvwa mine nendlu yami sitawukhonta Jehova.”​—Josh. 24:15.