Jehova Utakudvudvuta

1. Chaza simo semaJuda lebekatfunjiwe.

CABANGA ngendlela emaJuda lebekatfunjwe eBhabhulona lebekativa ngayo. Bekabone live lawo libhujiswa. Ngenca yetono tawo netabokhokho bawo, atsatfwa eveni lawo amikiswa eveni langalati. (2 Khr. 36:15, 16, 20, 21) Kuliciniso kutsi eBhabhulona bekanenkhululeko yekuphila imphilo levamile. (Jer. 29:4-7) Kodvwa imphilo beyingasimelula, futsi bekangakayikhetsi lemphilo. Ativa njani ngalesimo lebekakuso? Naka naku lokwashiwo ngulomunye lebeketsembekile futsi atfunjiwe, watsi: “Sahlala ngasemifuleni yaseBhabhulona. Sakhala nasikhumbula iSiyoni.” (Hla. 137:1) LamaJuda bekayidzinga mbamba indvudvuto, kodvwa bekangayitfolaphi?

2-3. (a) Yini Jehova layentela emaJuda lebekatfunjiwe? (b) Sitawucoca ngani kulesihloko?

² Jehova ‘unguNkulunkulu wayo yonkhe indvudvuto.’ (2 Khor. 1:3) Ngenca yekutsi unguNkulunkulu lonelutsandvo, uyakutsandza kudvudvuta labo labasondzela kuye. Jehova bekati kutsi labanye labatfunjiwe bebatasemukela sijeziso sakhe futsi babuyele kuye. (Isa. 59:20) Ngako kusesele iminyaka lengetulu kwalengu-100 ngaphambi kwekutsi batfunjwe, waphefumulela umphrofethi Isaya kutsi abhale incwadzi lebitwa ngeligama lakhe. Ngayiphi injongo? Isaya watsi: “Nkulunkulu wenu utsi: ‘Dvudvutani, dvudvutani bantfu bami.’” (Isa. 40:1) Asebentisa lencwadzi yalomphrofethi, Jehova waniketa emaJuda lebekatfunjiwe indvudvuto lebekatayidzinga.

³ NjengalamaJuda lebekatfunjiwe, natsi sihle siyidzinga indvudvuto. Kulesihloko, sitawucoca ngetindlela letintsatfu Jehova lebekatawudvudvuta ngato emaJuda lebekatfunjiwe: (1) Wetsembisa kubacolela labo bebaphendvukile, (2) waniketa bantfu bakhe litsemba, futsi (3) wabenta bangesabi. Njengobe sitawube sicoca ngalamaphuzu, naka indlela langasisita ngayo lamavi aJehova lakhutsatako.

JEHOVA UYACOLELA

4. Jehova wakhombisa njani kutsi unguNkulunkulu lonemusa? (Isaya 55:7)

⁴ Jehova ‘unguNkulunkulu wayo yonkhe indvudvuto.’ (2 Khor. 1:3) Loko wakukhombisa ngesikhatsi etsembisa kucolela emaJuda latfunjiwe laphendvukile. (Fundza Isaya 55:7.) Watsi: “Ngenca yekutsi lutsandvo lwami lolucotfo luhlala phakadze, ngiyawuba nemusa kuwe.” (Isa. 54:8) Jehova bekatawukhombisa njani umusa? Nanobe lamaJuda bekutawudzingeka abhekane nemiphumela yetento tawo, Jehova wawetsembisa kutsi bekangeke ahlale eBhabhulona siphelane. Bekatawutfunjwa sikhatsi lesitsite. (Isa. 40:2) Lamavi awadvudvuta kakhulu futsi awacinisekisa lamaJuda lebekatfunjiwe!

5. Yini leyenta sibe netizatfu letinyenti tekubonga ngemusa waJehova kwendlula emaJuda lebekatfunjiwe?

⁵ Yini lesiyifundzako? Jehova ufuna kubacolela ngalokuphelele bantfu bakhe. Lamuhla sinetizatfu letinyenti tekubonga ngaloko kwendlula emaJuda lebekatfunjiwe. Kanjani? Sesiyati kutsi yini Jehova layenta kuze sicolelwe tono tetfu. Ngemuva kweminyaka leminyenti Isaya aphrofethile, Jehova watfumela iNdvodzana yakhe layitsandzako lamhlabeni kuze ibe yinhlawulo yato tonkhe toni letiphendvukako. Lenhlawulo yenta kutsi tono tetfu ‘tesulwe,’ lokusho kususwa ngalokuphelele. (Imis. 3:19; Isa. 1:18; Ef. 1:7) Sikhonta Nkulunkulu lonemusa mbamba!

6. Kungasisita njani kunaka umusa waJehova? (Buka nesitfombe.)

⁶ Emavi aJehova laphefumulelwe laku-Isaya 55:7 angasidvudvuta nangabe sihlushwa ngunembeza. Labanye betfu bangase bachubeke bativa banelicala ngenca yeliphatsa labalenta kadzeni ngisho nobe sebaphendvukile. Loko kungenteka kakhulu nangabe solo sibhekana nemiphumela yaleliphutsa lesalenta. Kodvwa nangabe sivuma tono tetfu, sishintja tindlela tetfu, singaciniseka kutsi Jehova usicolele. Ngetulu kwaloko, Jehova nakacolela ukhetsa kungasasikhumbuli lesono. (Catsanisa naJeremiya 31:34.) Nangabe Jehova angahlali acabanga ngemaphutsa lesawenta esikhatsini lesendlulile, natsi kufanele sente lokufanako. Lokubalulekile kuJehova nguloko lesikwentako nyalo, hhayi emaphutsa lesawenta esikhatsini lesendlulile. (Hez. 33:14-16) Ngekushesha, Babe wetfu lonemusa utayicedza ngalokuphelele imiphumela yemaphutsa etfu.

7. Yini lengasisita kutsi sicele lusito nangabe besifihla sono?

⁷ Yini lokufanele siyente nangabe sihlushwa ngunembeza ngenca yekufihla sono lesikhulu? LiBhayibheli lisikhutsata kutsi sicele lusito kulabadzala belibandla. (Jak. 5:14, 15) Nobe kunjalo, singahle sikutfole kumatima kuvuma sono setfu. Kodvwa kufanele sikhumbule kutsi Jehova usebentisa lamadvodza letsembekile kuze asisite, nekutsi loko atakwenta ngelutsandvo nangemusa njengaye. Nangabe sikukhumbula loko futsi siphendvukile, sitawukhona kuyokhuluma nalamadvodza. Cabanga ngendlela umusa waJehova lowamdvudvuta ngayo lomunye umzalwane lokutsiwa ngu-Arthur,a lebekahlushwa ngunembeza. Arthur utsi: “Besekuphele sikhatsi lesingangemnyaka ngibukela titfombe letikhombisa kungcola. Kodvwa ngemuva kwekulalela inkhulumo lemayelana nanembeza, ngasivuma sono sami kumkami nakulabadzala belibandla. Ngemuva kwaloko ngaba nekuthula, kodvwa bengisolo ngitiva nginelicala ngenca yaloko bengikwentile. Labadzala belibandla bangikhumbuta kutsi Jehova akangilahli. Usijezisa ngobe asitsandza. Emavi abo lanemusa ayitsintsa inhlitiyo yami futsi angisita ngashintja indlela bengicabanga ngayo.” Lamuhla, Arthur ulihlahlandlela futsi uyinceku lesebentako. Kusidvudvuta kakhulu kwati kutsi Jehova usikhombisa umusa nasiphendvuka!

JEHOVA USINIKETA LITSEMBA

8. (a) Jehova wawaniketa liphi litsemba emaJuda latfunjiwe? (b) Ngekusho kwa-Isaya 40:29-31, litsemba belitawasita njani emaJuda laphendvukile?

⁸ Ngekubuka kwemuntfu, emaJuda lebekatfunjiwe bekete litsemba. UMbuso Wemhlaba WaseBhabhulona bewatiwa ngekutsi awubakhululi labo lobatfumbile. (Isa. 14:17) Nobe kunjalo, Jehova waniketa bantfu bakhe litsemba. Wabetsembisa kutsi utabakhulula, futsi kute lebekungamvimba. (Isa. 44:26; 55:12) Emehlweni aJehova, iBhabhulona beyifana nelutfuli. (Isa. 40:15) Uliphuphutsa kanye nje, luvele lusuke. Litsemba belitawasita njani lamaJuda latfunjiwe? Belitawadvudvuta. Kodvwa belingenta lokungetulu kwaloko. Isaya wabhala watsi: “Labo labetsembele kuJehova batawutfola emandla kabusha.” (Fundza Isaya 40:29-31.) Litsemba belitawanika emandla; ‘bekatawukhuphuka ngetimphiko njengetinsweti.’

9. Yini leyenta emaJuda latfunjiwe atetsemba tetsembiso taJehova?

⁹ Jehova waphindze waniketa emaJuda lebekatfunjiwe sizatfu sekutsi atetsembe tetsembiso takhe. Njani? Cabanga ngetiphrofetho lebesetivele tigcwalisekile. Bekati kutsi base-Asiriya bancobe umbuso waka-Israyeli losenyakatfo futsi batfumba bantfu bakhona. (Isa. 8:4) Abona ngesikhatsi baseBhabhulona bacotfula iJerusalema futsi btfumba bantfu bakhona. (Isa. 39:5-7) Bekaphila ngesikhatsi iNkhosi Sedekiya ikupulutwa emahlo futsi iyiswa eBhabhulona. (Jer. 39:7; Hez. 12:12, 13) Kwenteka konkhe loko Jehova bekatsite kutawenteka. (Isa. 42:9; 46:10) Konkhe loko kwawenta asetsemba kakhulu setsembiso saJehova lesimayelana nekukhululwa kwawo!

10. Yini lengasisita kutsi sihlale sinelitsemba kulamalanga ekugcina?

¹⁰ Yini lesiyifundzako? Nasitiva siphansi, litsemba lingasidvudvuta futsi lisente siphindze sibe nemandla. Siphila etikhatsini letimatima futsi sibhekana naletinye titsa letinemandla. Nobe kunjalo, akukafaneli sesabe. Jehova usinike litsemba lelihle lekuphila phakadze sekunethula mbamba nekulondzeka. Kufanele sigcine lelitsemba liphila etingcondvweni tetfu nasetinhlitiyweni tetfu. Nasingenti njalo, litsemba letfu lingaba lufifi, kufane nekubuka indzawo lenhle ngelifasitelo lelingcolile. Singaliwasha njani lelifasitelo, lokusho kugcina litsemba letfu liphila? Ngekutsi sihlale sitinika sikhatsi sekucabanga kutsi kutawuba mnandzi kangakanani kuphila kwetfu emhlabeni lomusha. Singafundza tihloko letikhuluma ngelitsemba letfu, sibukele ema-video futsi silalele netingoma. Singaphindze sikhulume naJehova ngemthantazo mayelana netetsembiso lesikubuke ngalabovu kugcwaliseka kwato.

11. Yini lesita lomunye dzadze lonekugula lokungapheli kutsi aphindze abe nemandla?

¹¹ Cabanga ngendlela litsemba lelamdvudvuta futsi lamcinisa ngayo lomunye dzadze lokutsiwa nguJoy, lonekugula lokungapheli. Utsi: “Nangicindzetelekile, ngitfulula sifuba sami kuJehova ngobe ngiyati kutsi uyayicondza indlela lengitiva ngayo. Jehova ubese unginika ‘emandla lamakhulu kakhulu.’” (2 Khor. 4:7) Joy uphindze atibone ngeliso lengcondvo aseveni lelisha lapho khona “kute lohlala khona loyawutsi: ‘Ngiyagula.’” (Isa. 33:24) Nangabe natsi sitfulula sifuba setfu kuJehova futsi sinake litsemba letfu, singaphindze sibe nemandla.

12. Yini leyenta sitetsembe kakhulu tetsembiso taJehova? (Buka nesitfombe.)

¹² Njengobe kwenteka ngemaJuda latfunjiwe, natsi Jehova usinikete tizatfu letinyenti tekutsi sitetsembe tetsembiso takhe. Cabanga ngetiphrofetho lesitibona tigcwaliseka. Sibonelo nje, sibona umbuso wemhlaba ‘lonencenye licinile katsi lenye ibutsakatsaka.’ (Dan. 2:42, 43) Siphindze sive ‘ngekutamatama kwemhlaba etindzaweni letehlukahlukene,’ futsi sishumayela kuto “tonkhe tive.” (Mat. 24:7, 14) Letiphrofetho naletinye letinyenti tenta sitetsembe kakhulu tetsembiso taJehova letisetawufezeka.

JEHOVA WENTA KUTSI SINGESABI

13. (a) Ngutiphi tinkinga emaJuda bekatawubhekana nato nakakhululwa? (b) Njengobe kuchazwe ku-Isaya 41:10-13, Jehova wawadvudvuta njani emaJuda lebekatfunjiwe?

¹³ Nanobe Jehova advudvuta emaJuda lebekatfunjiwe ngelitsemba lelihle, bekati kutsi bekatawubhekana netinkinga nakakhululwa. Jehova watsi nasekatawukhululwa, bekunalotsite lebekatawuncoba tive letibomakhelwane beBhabhulona bese uhlasela neBhabhulona. (Isa. 41:2-5) EmaJuda bekufanele esabe yini? Jehova wadvudvuta bantfu bakhe kusesele sikhatsi kutsi kwenteke loko, watsi: “Ungesabi ngobe mine nginawe. Ungakhatsateki ngobe mine nginguNkulunkulu wakho.” (Fundza Isaya 41:10-13.) Bekasho kutsini nakatsi “NginguNkulunkulu wakho”? Bekangawakhumbuti kutsi amkhonte, loko bekakwati. Kunaloko bekawakhumbuta kutsi solo unawo.​—Hla. 118:6.

14. Jehova waphindze wawasita njani emaJuda latfunjiwe kutsi angesabi?

¹⁴ Jehova waphindze wasita lamaJuda kutsi angesabi ngekutsi awakhumbute ngemandla akhe lamakhulu kakhulu nangelwati lwakhe lolumangalisako. Wawatjela kutsi abuke tinkhanyeti esibhakabhakeni. Wawatjela nekutsi akagcinanga nje ngekudala tinkhanyeti kodvwa uphindze atati tonkhe ngemagama. (Isa. 40:25-28) Nangabe ati inkhanyeti ngayinye, kusebaleni kutsi wati emagama abo bonkhe labamkhontako! Nangabe anemandla ekudala tinkhanyeti, unawo emandla ekusita bantfu bakhe. LamaJuda bekete sizatfu sekwesaba.

15. Nkulunkulu wawasita njani emaJuda latfunjiwe kutsi alungele loko bekuseta?

¹⁵ Jehova waphindze wasita bantfu bakhe kutsi balungele loko bekuseta. Ngasekucaleni kwencwadzi ya-Isaya, Nkulunkulu watjela lesive watsi: ‘Ngenani emakamelweni enu langekhatsi, nivale iminyango ngemuva kwenu. Bhacani sikhashana kuze kwendlule lulaka lwami.’ (Isa. 26:20) Kungenteka lelivesi lagcwaliseka kwekucala ngesikhatsi iBhabhulona incotjwa yiNkhosi Khuresi. Lesinye sati semlandvo lesingumGriki sitsi ngesikhatsi Khuresi angena eBhabhulona “watjela [emasotja akhe] kutsi abulale nobe ngubani latamtfola ngephandle.” Cabanga nje kutsi bantfu labahlala eBhabhulona besaba kanganani! Kodvwa kungenteka asindza emaJuda latfunjiwe ngobe alalela ticondziso taJehova.

16. Yini leyenta singakwesabi loko lokuseta? (Buka nesitfombe.)

¹⁶ Yini lesiyifundzako? Ngekushesha sitawubhekana nekuhlupheka lokukhulu lokungazange sekube khona kusukela bantfu baba khona. Nakucala, bantfu batawudideka futsi besabe. Kodvwa hhayi bantfu baJehova. Siyati kutsi Jehova unguNkulunkulu wetfu. Sitawuma sicine, sibe sati kutsi “kusindziswa [kwetfu] kutawube sekusedvute.” (Luk. 21:28) Sitawuma sicine ngisho tive letihlangene tisihlasela. Jehova utasivikela asebentisa tingilosi neticondziso letisindzisa kuphila. Sitatitfola njani leticondziso? Kutawudzingeka silindze kuze sibone. Kodvwa kungenteka sititfole emabandleni lesikuwo. Ngandlela tsite, kungenteka lawa ‘ngulamakamelo’ lasitawuvikeleka khona. Yini lesingayenta kuze silungele loko lokuseta? Kufanele sisondzelane nebazalwane betfu nabodzadze, silalele ticondziso letivela enhlanganweni ngekutitsandzela futsi setsembe mbamba kutsi nguJehova locondzisa lenhlangano yetfu.​—Heb. 10:24, 25; 13:17.

17. Yini longayenta kuze Jehova akudvudvute?

¹⁷ Ngisho nobe emaJuda lebekatfunjiwe abhekana nesimo lesimatima, Jehova wawanika indvudvuto lebekayidzinga. Utawenta lokufanako nakitsi. Ngako ngisho nobe kungentekani esikhatsini lesitako, chubeka ufuna indvudvuto kuJehova. Wetsembe umusa wakhe lomkhulu. Gcina litsemba lakho liphila. Khumbula, njengobe Jehova anguNkulunkulu wakho, kute longakwesaba.