“Lemphi YaJehova”

Lendzaba yacala ngasekupheleni kwabo-1990 ngesikhatsi hulumende waseFrance afuna ligatja laseFrance kutsi likhiphe umtselo weminikelo leliwutfole kusukela nga-1993 kuya ku-1996. Lendzaba sayimikisa etinkantolo taseFrance, kodvwa asizange siphumelele. Ngemuva kwekutsi sikhalo setfu sijikwe ngelifasitelo, hulumende watsatsa imali ku-account yeligatja lengetulu kwa-E117 million. Litsemba letfu beseliku-ECHR. Kodvwa ngaphambi kwekutsi i-ECHR iteke lendzaba yetfu, yatsi tsine nebameli bahulumende asihlangane sikhulumisane kuze sifike esivumelwaneni ngaphambi kwekutsi lendzaba iyiswe eNkantolo.

Besilindzele kutsi loyo bekasikhulumisa bekatasicindzetela kutsi silungise lenkinga ngekutsi sivume kubhadala incenye yalemali beyifunwa nguhulumende. Nanobe kunjalo, besati kahle kutsi kubhadala ngisho imali lencane bekungeke kuvumelane netimiso teliBhayibheli. Bazalwane nabodzadze bebanikele kuze kusekelwe umsebenti weMbuso, ngako leminikelo yabo beyingasiyo yahulumende. (Mat. 22:21) Nanobe kunjalo, saya kulomhlangano ngobe besifuna kuhlonipha loko lokushiwo yiNkantolo.

Sahlangana kulelinye likamelo laleNkantolo. Lomhlangano awuzange ucale kahle. Emavini akhe ekuvula, lona bekasikhulumisa watsi ulindzele kutsi BoFakazi BaJehova baseFrance babhadale incenye yalemali beyifunwa nguhulumende. Ngekushesha sativa siphocelelekile kutsi simbute sitsi: “Uyati yini kutsi hulumende sewuvele utsetse imali lengetulu kwa-E117 million ku-account yetfu?”

Wamangala kakhulu. Ngesikhatsi bameli bahulumende bavuma kutsi bayitsetse lemali, simo sakhe sashintja ngalokuphelele. Wabatsetsisa futsi wawuvala ngaleso sikhatsi lomhlangano. Ngabese ngiyabona kutsi Jehova bekacondzise tintfo ngendlela tsine besingakayicabangi. Sahamba lapho sijabulile, singakukholwa loko bekwentekile.

NgaJune 30, 2011, sijubo se-ECHR sasijabulisa kakhulu. Saveta kutsi lomtselo bewungekho emtsetfweni, futsi satsi hulumende akayibuyisele yonkhe lemali bekayitsetse futsi afake nentalo! Lesijubo lesiyincophamlandvo sikuvikele kukhonta lokuhlantekile eFrance kuze kube ngulamuhla. Lombuto munye lebesingakahleli kutsi sitawubuta, wafana nelitje lelabulala Goliyathi. Yini leyenta saphumelela? Kungenca yekutsi “lemphi yaJehova,” njengobe Davide atjela Goliyathi.​—1 Sam. 17:45-47.

Bekungasiko kwekucala sincoba. Nanobe siphikiswa bohulumende labanemandla kanye netinkholo, sikhonile kuncoba emacaleni langu-1 225 etinkantolo letiphakeme letisemaveni langu-70, kanye nasetinkantolo temhlaba. Lokuncoba kuvikela emalungelo etfu labalulekile lanjengekutsatfwa njengenkholo, kwenta umsebenti wekushumayela, nekwala kungenela imicimbi yelive kanye nekwala kumpontjelwa ingati.

Kwenteka njani kutsi ngisebente emacala aseYurophu ngibe ngisebenta eNdlunkhulu yaBoFakazi BaJehova eNew York, eMelika?

NGAKHULISWA BATALI LABATITFUNYWA TELIVANGELI

Batali bami, lokunguGeorge naLucille, baphotfula eklasini lesi-12 laseGileyadi futsi babelwa e-Ethiopia langatalelwa khona nga-1956. Bangetsa batsi nginguFiliphu, basusela kuFiliphu umvangeli. (Imis. 21:8) Ngemnyaka lolandzelako, hulumende wawumisa umsebenti waboFakazi. Nanobe bengisemncane, kodvwa ngiyakhumbula ngesikhatsi umndeni wakitsi ukhonta Jehova ngasense. Bekungichaza loku njengobe bengisengumntfwana! Lokubuhlungu kutsi hulumende wasiphocelela kutsi sihambe kulelive nga-1960.

Ngesikhatsi umndeni wakitsi utfutsela eWichita, eKansas, eMelika, batali bami bahamba nawo umoya webuvangeli. Bebaliphila liciniso futsi bafundzisa mine, sisi wami lomdzala Judy, nabhuti wami lomncane Leslie, nabo labatalelwa e-Ethiopia kutsi sitsandze Jehova futsi simkhonte ngenhlitiyo yetfu yonkhe. Ngabhajatiswa nangineminyaka lengu-13. Ngemuva kweminyaka lemitsatfu, umndeni wakitsi watfutsela endzaweni lebeyinesidzingo lesikhulu sebamemeteli e-Arequipa, ePeru.

Nga-1974, nangineminyaka lengu-18 nje kuphela, ligatja lasePeru lacela mine kanye nalabanye bazalwane labane kutsi sibe ngemahlahlandlela lakhetsekile. Bekufanele sishumayele etindzaweni lokungazange sekushunyayelwe kuto, etintsabeni taseCentral Andes. Loku bekufaka ekhatsi kushumayela bantfu labakhuluma siQuechua nesi-Aymara. Besihamba ngemoto lebesiphindze silale kuyo lebesiyibita ngekutsi Ngumkhumbi ngenca yekutsi beyifana nelibhokisi lelikhulu. Ngiyatikhumbula tikhatsi letimnandzi lapho besisebentisa khona liBhayibheli kuze sikhombise bantfu bemdzabu kutsi Jehova utabucedza ngekushesha buphuya, kugula kanye nekufa. (Semb. 21:3, 4) Labanyenti bawemukela umlayeto weMbuso.

NGIYA ENDLUNKHULU

Ngesikhatsi Albert Schroeder, lebekalilunga leSigungu Lesibusako saBoFakazi BaJehova avakasha ePeru nga-1977, wangikhutsata kutsi ngifake sicelo sekuyosebenta eBethel endlunkhulu. Ngenta njalo. Ngekushesha ngemuva kwaloko, ngaJune 17, 1977, ngacala kusebenta eBethel leseBrooklyn. Kwaphela iminyaka lemine ngisebenta etikweni Letekuhlanta Nekulungisa tintfo.

NgaJune 1978, ngahlangana na-Elizabeth Avallone emhlanganweni wetive lebewuseNew Orleanse, eLouisiana. Naye bekakhuliswe batali lebebaphila ngeliciniso. Besekuphele iminyaka lemine Elizabeth alihlahlandela lelivamile, futsi bekawutsandza umsebenti wasikhatsi sonkhe, afuna kuwenta kuphila kwakhe konkhe. Sachubeka sichumana. Kungakapheli sikhatsi lesinganani, satsandzana sabutsana phansi. Sashada nga-October 20, 1979, futsi naye weta eBethel.

Bazalwane nabodzadze basebandleni laseBrooklyn Spanish lesefikela kulo bebasitsandza kakhulu. Kuyo yonkhe leminyaka, sibe semabandleni lamatsatfu lapho bazalwane betfu nabodzadze bebasikhutsata kutsi sichubeke nemsebenti wetfu waseBethel. Sibonga kakhulu ngekusisita kwabo kanye nekusisekela kwebangani nemalunga emindeni yetfu lasisitile kuze sinakekele batali betfu lasebakhulile.

NGISEBENTA EHHOVISINI LEMTSETFO

Ngamangala nanginikwa umsebenti wekuyosebenta eHhovisini Letemtsetfo eBethel ngaJanuary 1982. Ngemuva kweminyaka lemitsatfu, ngacelwa kutsi ngiyofundzela umtsetfo kuze ngibe ngummeli losemtsetfweni. Ngamangala nangifundza esikolweni kutsi inkhululeko bantfu labanyenti labangayinaki eMelika kanye nakulamanye emave bayitfole ngenca yekutsi BoFakazi BaJehova bancobile emacaleni abo. Lamacala lamakhulu bekadzingidvwa eklasini.

Nga-1986 nangineminyaka lengu-30, ngabelwa kutsi ngibuke leliHhovisi Letemtsetfo. Ngenca yekutsi bengisemncane futsi bengingati kutsi bengihlalelwe ngumsebenti lomnyenti kangakanani, ngativa ngijabulile ngesikhatsi lesifanako ngesaba.

Ngaba ngummeli losemtsetfweni nga-1988, kodvwa bengingati kutsi lemfundvo ingitsintse kangakanani mine kanye nebuhlobo bami naJehova. Imfundvo lephakeme ingenta umuntfu atikhukhumete futsi ative ancono kunalabanye labangakafundzi njengaye. Elizabeth wangisita. Wangisita kutsi ngiphindze ngente tintfo lebengitenta kuze ngigcine buhlobo bami naJehova bucinile ngaphambi kwekutsi ngiye enyuvesi. Kona kwatsatsa sikhatsi, kodvwa kancane kancane kwalunga. Ngitibonele kutsi imfundvo lephakeme akusiyo intfo lebaluleke kakhulu ekuphileni. Intfo lebaluleke kakhulu buhlobo lobuhle naJehova, kumtsandza ngalokujulile nekutsandza bantfu bakhe.

KUVIKELA NEKUCALISA TINDZABA LETIMNANDZI NGALOKUSEMTSETFWENI

Ngemuva kwekucedza enyuvesi, ngacala kunaka kusita lihhovisi letfu kuze linakekele tindzaba temtsetfo eBethel nekutsi livikele inhlangano kanye nelilungelo letfu lekushumayela tindzaba letimnandzi. Kusekela inhlangano yetfu lehamba ngesivinini lesisetulu, lekhulako naletfutfukako kwangijabulisa kodvwa ngesikhatsi lesifanako bekungasimelula. Sibonelo nje, ngasekucaleni kwabo-1990, liHhovisi Letemtsetfo lacelwa kutsi lihole ekushintjeni intfo lebeyisolo isebentiswa sikhatsi lesidze yekucela imali letsite nasinika bantfu tincwadzi tetfu. Ngemuva kwaloko, BoFakazi BaJehova besebanika bantfu tincwadzi ngaphandle kwekubabhadalisa. Loku kwenta umsebenti waba melula eBethel nasemabandleni, futsi kuze kube ngulamuhla kusisite sagwema tinkinga tekubhadala umtselo. Labanye bebacabanga kutsi sitawuba nemali lencane futsi kuphazamiseke umsebenti wekushumayela. Kodvwa kwenteka lokwehlukile. Linani lalabo labakhonta Jehova kusukela nga-1990 likhule kakhulu laze labangetulu kwelinani leliphindvwe kabili, futsi lamuhla bantfu bangatifundza letincwadzi letisekelwe eBhayibhelini ngaphandle kwekubhadala imali. Ngitibonele ngewami kutsi lolushintjo kanye nalolunye lolunyenti enhlanganweni luphumelele ngenca yelusito lwaJehova nangenca yesicondziso lasinika sisebenti lesetsembekile.​—Eks. 15:2; Mat. 24:45.

Kuphumelela kwetfu etinkantolo akwentiwa kutsi sinebameli labakahle. Ngalokuvamile, lokutsintsa tiphatsimandla yindlela bantfu baJehova labatiphatsa kahle ngayo. Ngatibonela sibonelo saloku nga-1998 ngesikhatsi emalunga lamatsatfu eSigungu Lesibusako kanye nabomkabo basemhlanganweni wesifundza lokhetsekile eCuba. Umusa wabo kanye nenhlonipho yabo kwenta tiphatsimandla tabona kutsi asitingeneli tepolitiki futsi loko kwabatsintsa kakhulu kwendlula loko lesivame kukusho nasihlangene nabo.

Nanobe kunjalo, nangabe tindzaba temtsetfo tingacatululeki kahle, ‘sivikela tindzaba letimnandzi futsi siticalise ngalokusemtsetfweni’ etinkantolo. (Fil. 1:7) Sibonelo nje, kuphele iminyaka leminyenti tiphatsimandla taseYurophu netaseSouth Korea tingalihloniphi lilungelo letfu leungavumi kungenela imphi. Ngenca yaloko, bazalwane labangaba ngu-18 000 baseYurophu kanye nebazalwane labangetulu kwa-19 000 baseSouth Korea baboshiwe ngobe bangafuni kuya emphini ngenca yanembeza wabo.

Ekugcineni, ngaJuly 7, 2011, i-ECHR yakhipha sijubo lesiyincophamlandvo endzabeni ya-Bayatyan v. Armenia lebesitsi onkhe emave aseYurophu kufanele avumele labo labangafuni kuya emphini ngenca yenkholo kutsi bente leminye imisebenti esikhundleni saloko. Lesincumo salandzelwa ngulesinye lesentiwa yinkhantolo yaseSouth Korea ngaJune 28, 2018. Besingeke siphumelele ngalendlela kube kwenteka nje kutsi linani lelincane lebazalwane lingetsembeki.

Lihhovisi lemtsetfo lelisendlunkhulu kanye nalawo lasemagatjeni emhlabeni wonkhe asebenta kamatima kuze avikele lilungelo letfu lekukhonta Jehova nelekushumayela ngeMbuso. Siyajabula ngekumelela bazalwane betfu nabodzadze labaphikiswa nguhulumende. Ngisho siphumelela etinkantolo nobe singaphumeleli, kuya kwetfu etinkantolo kuniketa bufakazi kubameleli bembuso, emakhosini nasetiveni. (Mat. 10:18) Emajaji, labamelele hulumende, betindzaba kanye nabo bonkhe bantfu kufanele bacabangisise ngemibhalo lesiyifakako etindzabeni lesitiletsa etinkantolo. Bantfu labanetinhlitiyo leticotfo bayafundza kutsi babobani BoFakazi BaJehova nekutsi tinkholelo tetfu sitisekela eBhayibhelini. Labanye balabantfu sebabazalwane betfu nabodzadze.

NGIYABONGA JEHOVA!

Kuyo yonkhe leminyaka lengetulu kwalengu-40, ngikujabulele kusebenta nemahhovisi labuke tindzaba temtsetfo emagatjeni lasemhlabeni wonkhe, kuya etinkantolo letiphakeme letinyenti nekubonana netiphatsimandla letinyenti. Ngiyabatsandza futsi ngiyabahlonipha bazalwane bami nabodzadze lengisebenta nabo eHhovisini letemtsetfo endlunkhulu kanye nalabo labasebenta etikweni letemtsetfo emhlabeni wonkhe. Kuphila kwami kugcwele tibusiso letinyenti futsi kuyangenetisa.

Elizabeth ungisekele ngekwetsembeka nangelutsandvo kuyo yonkhe liminyaka lengu-45, wangisekela etikhatsini letimnandzi naletimatima. Ngimtsandza kakhulu ngobe loko ukwente ngisho nobe anesifo lesimenta aphelelwe ngemandla.

Sitibonele kutsi emandla kanye nekuncoba akuyi ngemakhono lesinawo. Kunjengobe nje Davide asho nakatsi: “Jehova uniketa bantfu bakhe emandla.” (Hla. 28:8) Vele “lemphi yaJehova.”