Kulwela Inkhululeko Yekukhonta Etindzaweni Tebantfu Bemdzabu

Kubantfu labangemakhulu etigidzi labahlala eLatin America, kunetigidzi tebantfu letikhuluma tilwimi temdzabu tiphindze tiphile ngemasiko endzawo. Labanyenti balabantfu bemdzabu bazalwane nabodzadze wetfu, labawatsandzako emasiko abo. Bahumushe baphindze basakata tincwadzi taBoFakazi BaJehova ngetilwimi temdzabu taseLatin America letingetulu kwa-130, kuze bafundzise bantfu liciniso leliseBhayibhelini.a Nobe kunjalo, labanye baye baphikiswa ngobe bakhetse kukhonta Jehova, futsi bangahlanganyeli emasikweni lavamile endzawo langavumelani nalokushiwo liBhayibheli. Iminikelo yenu isetjentiswe njani kuze basitwe?

Basitwa Kutsi Babuyele Emakhaya

EMexico, bazalwane nabodzadze wetfu labahlala emphakatsini waseHuichol losetintsabeni taseJalisco State, ngenhlonipho bala kuhlanganyela emasikweni enkholo lebebeva ungatsi awavumelani naloko lokushiwo liBhayibheli.b Loko kwabatfukutselisa labanye kulendzawo. NgaDecember 4, 2017, sicumbi sebantfu lebesitfukutsele sahlasela licembu laboFakazi kanye nalabanye lebebanabo. Lesicumbi sabacosha kulendzawo sabhidlita emakhaya abo, sabulala netintfo tabo futsi sabasongela ngekubabulala nabangabuya.

BoFakazi labahlala emadolobheni ladvutane basita labazalwane nabodzadze wetfu ngetintfo lebebatidzinga. Yini lebeyingentiwa kuze babuyele emakhaya? Umzalwane Agustín utsi “besite imali leyenele kuze sicashe ummeli, futsi besingati nekutsi singaya kuphi kuze sitfole sicondziso lesisemtsetfweni.”

Ligatja laseCentral America latsatsa sinyatselo ngekushesha ngenca yekutsi inkhululeko yekukhonta yebazalwane betfu beyihlaselwa. Lacala ngekucela tiphatsimandla tendzawo kutsi tente luphenyo ngaloko lokwentiwa kulabazalwane. Labese litfola imvume eKomidini Yebachumanisi YeSigungu Lesibusako saBoFakazi BaJehova kutsi lisebente neLitiko Letemtsetfo lelisendlunkhulu yemhlaba wonkhe kuze livule licala ngalendzaba yebazalwane nabodzadze wetfu baseHuichol. Lelicala lagcine lifike e-Supreme Court of Justice of the Nation, lokuyinkantolo lenkhulu yaseMexico.

Licembu lebameli labavela emhlabeni wonkhe lachaza kutsi njengobe lemiphakatsi ifuna labanye bahloniphe emasiko ayo emdzabu, nayo kufanele ihloniphe futsi ivikele inkhululeko yabo bonkhe bantfu labahlala kuyo. Bonkhe bantfu banemalungelo latsite ngisho nobe bahlala kuphi.

NgaJuly 8, 2020, i-Supreme Court of Justice yavumelana ngavilinye futsi yasekela BoFakazi BaJehova. Bakhipha umyalo wekutsi bonkhe lebebacoshiwe ababuyele emakhaya abo. Nakachaza indlela yena kanye nalabanye labativa ngayo, Agustín lokukhulunywe ngaye ekucaleni utsi: “Siyabonga futsi siyajabula ngaloko bazalwane labasentele kona. Kute besingakwenta ngaphandle kwelusito lwabo.”

“Kwentela Bantfu Labambalwa Tintfo Letinkhulu”

Ngesikhatsi lesifanako, bazalwane betfu baseSan Juan de Ilumán, indzawo lehlala bantfu bemdzabu lese-Otavalo Valley, e-Ecuador, nabo bebaphikiswa. Nga-2014, ngemuva kwekutfola tonkhe timphepha letidzingekile, bacala kwakha liHholwa leMbuso. Kwatsi kusenjalo, umfundisi lebekahola sicumbi sebantfu labangetulu kwa-100 wamisa kwakhiwa kwaleliHholwa. Bantfu bendzawo batjela BoFakazi BaJehova kutsi abayekele kuhlangana ndzawonye kuze bakhonte Nkulunkulu.

Litiko letemtsetfo lelisegatjeni lase-Ecuador kanye nalelisendlunkulu yemhlaba wonkhe ahlangana kuze avikele lelibandla ekwephulweni kwelilungelo lenkhululeko yalo yekukhonta. Bazalwane betfu bayisa lendzaba enkantolo. Loku kwenta kutsi bantfu bendzawo bayekele kubaphikisa futsi bavumela lelibandla kutsi lichubeke nekuhlangana ndzawonye liphindze licedzele kwakha leliHholwa leMbuso. Kuze kuvikelwe emalungelo ebazalwane esikhatsini lesitako, labo lebebabamelele bacela inkantolo lenkhulu kutsi yente sincumo ngembuto lobalulekile lotsi: Akukafaneli yini kutsi bantfu bemdzabu bahloniphe emalungelo ebantfu lahlonishwa emhlabeni wonkhe?

NgaJuly 16, 2020, i-Constitutional Court of Ecuador, lokuyinkantolo lephakeme kulelive, yalalela lelicala. Lelibandla lamelelwa bazalwane baseEcuador lababameli. Ngetulu kwaloko, bazalwane labane lesebanesikhatsi lesidze babameli bachazela inkantolo ngalendzaba. Ngenca yemincele yeCOVID-19, bakhuluma nalenkantolo basemaveni lahlukahlukene basebentisa i-videoconference. Bekukwekucala kutsi inkatolo ivumele licembu lelisemtsetfweni lelimelela BoFakazi BaJehova emhlabeni wonkhe kutsi lichaze indzaba yalo kusetjentiswa i-videoconference.c Lelicembu lacaphuna lokwashiwo ngemagunya lasemtsetfweni emhlabeni wonkhe kuze licinisekise kutsi angeke kunyatselwe emalungelo ebantfu bemdzabu ngenca nje yekutsi baphila etindzaweni temdzabu.

Bazalwane betfu e-Otavalo Valley balangatelela kuva sincumo lesitawukhishwa yi-Constitutional Court. Kwanyalo, babonga kakhulu ngelusito labalutfolile. César longulomdzala welibandla lase-Ilumán Quichua, utsi: “NguJehova kuphela longentela bantfu labambalwa tintfo letinkhulu, asebentisa inhlangano yakhe.”

Bonkhe labameli labasebenta lendzaba bebaBoFakazi BaJehova futsi bayakujabulela kusita ngetindzaba temtsetfo mahhala. Nobe kunjalo, kumikisa lamacala enkantolo, kuwalungiselela kanye nekuwateka kudzinga sikhatsi nemali. Bameli betfu kanye nalabanye bazalwane bacitsa ema-awa langetulu kwa-380 balungiselela loko labatakusho enkantolo baphindze bacitse ema-awa langu-240 bahumusha timphepha telicala laseMexico. Bameli labacishe babengu-40 labavela emhlabeni wonkhe bacitse ema-awa lamanyenti kulelicala laseEcuador. Sikhone njani kubhadala tonkhe letindleko tekuvikela bazalwane betfu? Tibhadelwe ngenca yeminikelo yenu leniyenta ngetindlela letehlukahlukene letichazwe ku-website letsi donate.jw.org. Siyabonga ngekwephana kwenu.