SIHLOKO LESIFUNDVWAKO 42
INGOMA 44 Umthantazo Wenceku YaNkulunkulu
Ungayenta Njani Imithantazo Yakho Ibe Ncono Kakhulu?
“Awu Jehova, ngiphendvule, ngobe ngikubita ngenhlitiyo yami yonkhe.”—HLA. 119:145.
LOKUTAWUCOCWA NGAKO
Kulesihloko, sitawufundza emithantazweni yetinceku taJehova lebhalwe eBhayibhelini.
1-2. (a) Yini lengenta kutsi singamtfululeli Jehova sifuba? (b) Sati njani kutsi Jehova uyayilalelisisa imithantazo yetfu?
KUYENTEKA yini ngalesinye sikhatsi uve ngatsi uphindzaphindza intfo yinye nawuthantaza, awumtfululeli Jehova sifuba, nobe usho tintfo letifanako njalo nawuthantaza? Nangabe kunjalo, awusiwedvwa. Ngenca yekutsi sihlale simatasatasa, kungenteka sihlale sifuna kusheshe sicedze nasithantaza. Nobe kungenteka sikutfola kumatima kutfululela sifuba setfu kuJehova ngobe siva ngatsi akusifaneli kukhuluma naye.
2 LiBhayibheli liyasicinisekisa kutsi lokubalulekile kuJehova, kuthantaza ngalokusuka enhlitiyweni, hhayi kukhombisa kutsi sinelikhono lekukhuluma. Nkulunkulu uyatilalela ‘ticelo talabatfobekile.’ (Hla. 10:17) Ukulalelisisa konkhe lesikushoko ngenca yekutsi unendzaba mbamba natsi.—Hla. 139:1-3.
3. Ngumiphi imibuto lesitayiphendvula kulesihloko?
3 Ngako singatibuta: Yini lengasenta sikhululeke sithantaze kuJehova? Singathantaza njani ngendlela lengasenta sisondzelane naJehova? Kucabanga ngemithantazo lesuka enhlitiyweni lebhalwe eBhayibhelini kungasisita njani sente imithantazo yetfu ibe ncono? Yini lesingayenta nangabe sikhatsateke kakhulu size singakhoni kusho indlela lesitiva ngayo? Ase sicoce ngetimphendvulo talemibuto.
KHULULEKA UTHANTAZE KUJEHOVA
4. Yini lengasisita kutsi sikhululeke sithantaze kuJehova? (Tihlabelelo 119:145)
4 Nasicondza kutsi Jehova ungumngani lowetsembekile lofuna siphumelele, sitawubona kutsi singakhululeka sithantaze kuye. Umbhali weTihlabelelo 119 wetama kuba nebungani lobunjalo naJehova. Lombhali bekanetinkinga. Bekaphetfwe kabi bantfu labakhohlisako. (Hla. 119:23, 69, 78) Ngetulu kwaloko, naye bekenta emaphutsa. (Hla. 119:5) Nobe kunjalo, akazange esabe kutfululela sifuba sakhe kuJehova.—Fundza Tihlabelelo 119:145.
5. Kubaluleke ngani kutsi singavumeli lutfo lusivimbe kutsi sithantaze? Fanekisa.
5 Jehova ucela ngisho nalabo labente tono letinkhulu kutsi bathantaze kuye. (Isa. 55:6, 7) Ngako kute lokufanele sikuvumele kusivimbe kutsi sithantaze. Nasi sibonelo, umuntfu loshayela indiza uyati kutsi angakhuluma nalabo labalawula kuhamba kwetindiza emoyeni nangabe adzinga lusito. Kufanele yini esabe kuchumana nabo ngenca yekutsi wesaba kutsi utawuhlazeka kutsi ulahlekile nobe wente liphutsa? Cha! Ngendlela lefanako, nangabe ngalesinye sikhatsi siva ngatsi silahlekile nobe nangabe sonile, kufanele sikhululeke sithantaze kuJehova.—Hla. 119:25, 176.
SINGATHANTAZA NJANI NGENDLELA LETAWUSENTA SISONDZELANE NAJEHOVA?
6-7. Kucabanga ngebuntfu baJehova kusisita njani kutsi sente imithantazo letasenta sisondzelane naye? Shano sibonelo. (Buka nembhalo longentasi.)
6 Nasimtjela konkhe Jehova, simtjele loko lesikucabangako nendlela lesitiva ngayo, sitawusondzelana kakhulu naye. Ngako yini lesingayenta kuze sente imithantazo yetfu ibe ncono kakhulu?
7 Cabanga ngebuntfu baJehova.a Nasichubeka sicabanga ngebuntfu bakhe, sitawukhona kakhulu kuyiveta ngalokukhululekile imicabango yetfu. (Hla. 145:8, 9, 18) Cabanga ngesibonelo salomunye dzadze lokutsiwa nguKristine, lebekanababe lonebudlova. Ngenca yekutsi Babe wakhe bekanebudlova, bekumatima ngaKristine kwetsemba kutsi Jehova unguBabe lonelutsandvo, futsi bekakutfola kumatima kukhuluma naye. Utsi: “Bengiva ngatsi emaphutsa ami bekatawenta angilahle.” Ngubuphi buntfu baJehova lobumsitile? Utsi: “Lutsandvo lwaJehova lolucotfo lungenta ngitive ngivikelekile. Ngiyati kutsi ngeke ayekele kubamba sandla sami. Ngisho nobe ngingawa, utangivusa ngelutsandvo. Loku kungisita kutsi ngimvulele sifuba, ngimtjele ngenjabulo yami lesekujuleni kanye nebuhlungu bami lobusekujuleni.”
8-9. Kusita ngani kucabanga ngaloko lofuna kukusho ngaphambi kwekutsi uthantaze? Fanekisa.
8 Cabanga ngaloko lotakusho. Ngaphambi kwekutsi uthantaze, ungatibuta imibuto letsite. Sibonelo nje, ungatibuta: ‘Ngutiphi tinkinga lengibhekene nato nyalo? Ukhona yini umuntfu lokufanele ngimcolele? Ngibhekene nenkinga lensha yini ledzinga kutsi Jehova angisite ngiyincobe?’ (2 Khos. 19:15-19) Singaphindze sikhumbule indlela Jesu lasifundzisa kutsi sithantaze ngayo, ngekutsi sicabange ngaloko lesingakucela kuJehova lokuhambisana nelibito lakhe, uMbuso wakhe nentsandvo yakhe.—Mat. 6:9, 10.
9 Ngesikhatsi lomunye dzadze lokutsiwa ngu-Aliska atfola kutsi indvodza yakhe inamdlavuza webucopho, bekakutfola kumatima kuthantaza. Utsi: “Bengikhatsateke kakhulu kangangekutsi bengikutfola kumatima kucabanga kahle kutsi ngingaze ngithantaze.” Yini lemsitile? Utsi: “Ngitinika sikhashana ngaphambi kwekutsi ngithantaze kuze ngicabange ngaloko lengitakusho, futsi loku kungisita kutsi ngingakhulumi ngami nje kuphela nangithantaza. Nangenta njalo, ngehlisa umoya futsi ngibese ngiyakhona kuthantaza kuJehova ngetintfo letehlukahlukene.”
10. Kubaluleke ngani kutsi sitinikete sikhatsi nasithantaza? (Buka netitfombe.)
10 Tinike sikhatsi nawuthantaza. Ngisho nobe imithantazo lemifishane isisondzeta kuJehova, kodvwa manyenti ematfuba ekutsi sivete lokusenhlitiyweni nasitiniketa sikhatsi nasithantaza.b Indvodza ya-Aliska lokutsiwa ngu-Elijah, itsi: “Ngetama kuthantaza tikhatsi letinyenti ngelilanga, futsi kungajaki nangithantaza kungisondzeta kakhulu kuJehova. Jehova akahlali agadze kutsi ngisheshe ngicedze kuthantaza, ngako ngitsatsa sikhatsi sami.” Yetama naku: Funa sikhatsi lesikahle nendzawo lekahle lawutawuthantazela khona, mhlawumbe uze uthantaze uphumisele ngaphandle kwekuphatamiseka, futsi tetayete kutinika sikhatsi nawuthantaza.
Tfola sikhatsi nendzawo lawutawukhona kutinika khona sikhatsi uthantaza (Buka sigaba 10)
CABANGA NGEMITHANTAZO LESUKA ENHLITIYWENI LESEBHAYIBHELINI
11. Kusisita ngani kucabanga ngemithantazo lesuka enhlitiyweni lebhalwe eBhayibhelini? (Buka nelibhokisi lelitsi “Utiva Ngendlela Lefanako Yini Nalesimo Lebebakuso?”)
11 Ungakutfola kulusito kucabanga ngemithantazo lesuka enhlitiyweni leseBhayibhelini kanye netingoma letingcwele, nobe tihlabelelo. Njengobe ucabanga ngekutsi tikhonti taNkulunkulu tayiveta njani imicabango yato lejulile, loko kungakukhutsata kutsi uvulele Jehova sifuba sakho. Mhlawumbe ungatfola lamanye emagama ekudvumisa longawafaka emithantazweni yakho. Ngetulu kwaloko, kungenteka utfole imithantazo lehambisana netimo takho.
12. Ngumiphi imibuto lesingatibuta yona nasifundza imithantazo leseBhayibhelini?
12 Njengobe ucabanga ngemithantazo lebhalwe eBhayibhelini, tibute: ‘Ngubani lowasho lamagama futsi bekakutiphi timo? Ngitiva ngendlela lefanako yini ngaloko lakusho kulomthantazo? Ngutiphi tifundvo lengingatifundza kuwo?’ Kungahle kudzingeke kutsi ucwaninge kuze utfole timphendvulo talemibuto, futsi angeke utisole. Cabanga nganati tibonelo letimbalwa.
13. Ngusiphi sifundvo lesimayelana nemthantazo lesingasifundza kuHana? (1 Samuweli 1:10, 11) (Buka nesitfombe lesisekhasini lekucala.)
13 Fundza 1 Samuweli 1:10, 11. Ngesikhatsi Hana asho lomthantazo, bekanetinkinga letinkhulu letimbili. Bekangabatfoli bantfwana, futsi zakwabo bekenta kuphila kwakhe kube munyu. (1 Sam. 1:4-7) Nangabe ubhekene nenkinga lengapheli, yini longayifundza kulomthantazo waHana? Wativa ancono ngemuva kwekutiniketa sikhatsi athantaza futsi atfululele sonkhe sifuba sakhe kuNkulunkulu. (1 Sam. 1:12, 18) Natsi singativa sincono nangabe ‘silahlela umtfwalo wetfu kuJehova’ ngekutsi simchazele kutsi sitiva njani ngenca yenkinga letsite.—Hla. 55:22.
Hana watfululela sifuba sakhe kuJehova njengobe bekangabatfoli bantfwana, futsi ahlale ahlushwa nguzakwabo (Buka sigaba 13)
14. (a) Yini lenye lesiyifundza esibonelweni saHana? (b) Kucabangisisa ngemiBhalo kungasisita njani kutsi sibe nalokunyenti lesingakusho emithantazweni yetfu? (Buka umbhalo longentasi.)
14 Ngemuva kweminyaka lembalwa Samuweli atelwe, Hana wammikisa kumPhristi Lophakeme Eli. (1 Sam. 1:24-28) Hana wathantaza ngalokusuka enhlitiyweni, aveta indlela lebekaciniseka ngayo kutsi Jehova uyativikela tikhonti takhe letetsembekile futsi atinakekele.c (1 Sam. 2:1, 8, 9) Kungenteka bekasolo anato tinkinga ekhaya, kodvwa wakhetsa kunaka indlela Jehova lebekambusise ngayo. Yini lesiyifundzako? Sitawukhona kutibeketelela kancono tinkinga tetfu letingapheli nangabe sinaka kakhulu indlela Jehova lasisekele ngayo kwaze kwaba ngunyalo.
15. Nangabe singaphatfwa kahle, yini lesingayifundza emthantazweni wemphrofethi Jeremiya? (Jeremiya 12:1)
15 Fundza Jeremiya 12:1. Ngalesinye sikhatsi ekuphileni kwakhe, umphrofethi Jeremiya bekumkhatsata kubona bantfu lababi baphumelela. Beyimkhatsata nendlela lamanye ema-Israyeli bekamphatsa ngayo. (Jer. 20:7, 8) Kungenteka natsi sitiva ngendlela lefanako nasibona bantfu labangaketsembeki baphumelela nobe nasihlekwa. Nanobe Jeremiya ayiveta indlela lebekakhatsateke ngayo, kodvwa akazange asole Nkulunkulu ngekutsi akehluleli kahle. Njengobe abona indlela Jehova lajezisa ngayo bantfu bakhe labavukelako, kungenteka waciniseka kakhulu kutsi Nkulunkulu wehlulela ngekulunga. (Jer. 32:19) Natsi singakhululeka sithantaze kuJehova simtjele loko lokusikhatsatako, setsemba kutsi ngesikhatsi sakhe utawulungisa nobe ngukuphi kungalungi lesibhekene nako nyalo.
16. Nangabe singakhoni kwenta loko lesifise kukwenta, yini lesingayifundza kulomthantazo wemLevi lebekatfunjiwe? (Tihlabelelo 42:1-4) (Buka netitfombe.)
16 Fundza Tihlabelelo 42:1-4. Lengoma yabhalwa ngumLevi lebekatfunjiwe, lebekangakhoni kukhonta Nkulunkulu ethempelini nalamanye ema-Israyeli. Lesihlabelelo sakhe siveta indlela lebekativa ngayo. Kungenteka natsi sitiva ngendlela lefanako ngenca yekutsi sivaleleke emakhaya nobe siboshiwe ngenca yekukholwa kwetfu. Indlela lesitiva ngayo ingahle ishintjashintje, kodvwa senta kahle ngekuyiveta nasithantaza. Loko kungasisita kutsi siyicondze kancono indlela lesitiva ngayo, futsi kusisite sibe nembono lokahle ngesimo lesikuso. Sibonelo nje, lomLevi wabona kutsi utawuba nematfuba lamasha ekudvumisa Jehova. (Hla. 42:5) Waphindze wacabanga ngendlela Jehova lebekamnakekela ngayo. (Hla. 42:8) Kuthantaza ngalokusuka enhlitiyweni kuNkulunkulu kungasisita sicondze kancono kutsi yini leyenta sitive ngendlela lesitiva ngayo, sehlise umoya futsi sitfole emandla ekucinisela.
LomLevi lowabhala Tihlabelelo 42 watfululela sifuba sakhe kuNkulunkulu. Nasiveta indlela lesitiva ngayo nasithantaza, loko kungasisita kutsi sibuke tintfo ngendlela lefanele (Buka sigaba 16)
17. (a) Yini lesingayifundza emthantazweni wemphrofethi Jona? (Jona 2:1, 2) (b) Angasisita njani lamanye emagama lasencwadzini yeTihlabelelo nasibhekene netikhatsi letimatima? (Buka nembhalo longentasi.)
17 Fundza Jona 2:1, 2. Umphrofethi Jona washo lomthantazo ngesikhatsi asesiswini senhlanti lenkhulu. Nanobe Jona bekangakamlaleli Jehova, bekaciniseka kutsi utaliva livi lakhe. Ngesikhatsi athantaza, wasebentisa emagama lamanyenti lasencwadzini yeTihlabelelo.d Kungenteka bekawajwayele lamavi. Ngako kuwakhumbula, futsi acabange ngawo kwamsita kutsi aciniseke kutsi Jehova utamsita. Ngendlela lefanako, nangabe setama kubamba lamanye emavesi ngengcondvo, kungenteka siwakhumbule futsi asidvudvute nasithantaza kuJehova ngetikhatsi letimatima.
CHUBEKA USONDZELANA NAJEHOVA NGEMTHANTAZO
18-19. Nangabe sihle sikutfola kumatima kuthantaza sisho indlela lesitiva ngayo, asicinisekisa ngani emavi lasembhalweni waKubaseRoma 8:26, 27? Niketa sibonelo.
18 Fundza KubaseRoma 8:26, 27. Ngalesinye sikhatsi singativa sicindzeteleke kakhulu size singakhoni kusho indlela lesitiva ngayo. Kodvwa nakwenteka loko, likhona lusito. Etikhatsini letinjalo, umoya longcwele waNkulunkulu “uyasincengela.” Kanjani? Asebentisa umoya wakhe, Jehova wente kutsi imithantazo leminyenti ibhalwe eVini lakhe. Nangabe singakhoni kuyiveta ngalokucacile imicabango yetfu, Jehova angahle emukele lamanye emagama lakulemithantazo kube ngatsi ticelo lesifuna kutisho, futsi angayiphendvula.
19 Loko kwamsita lomunye dzadze waseRussia lokutsiwa nguYelena. Waboshelwa kuthantaza nekufundza liBhayibheli. Yelena wakhatsateka kakhulu kangangekutsi bekakutfola kumatima kuthantaza. Utsi: “Ngabese ngiyakhumbula kutsi nangikhatsateke kakhulu futsi ngingati kutsi ngithantazele ini, Jehova utawemukela imithantazo yetikhonti takhe tasesikhatsini lesendlulile kube . . . ngatsi nguloko lebengifuna kukusho. . . . Loku kwangidvudvuta kakhulu ngesikhatsi lebesimatima kakhulu.”
20. Yini lesingayenta kuze sente tingcondvo tetfu tilungele kuthantaza nasicindzetelekile?
20 Nangabe sicindzetelekile, kungaba matima kutsi ingcondvo ingazuli nasithantaza. Kuze silungise simo setfu sengcondvo, singalalela kufundvwa kwencwadzi yeTihlabelelo lokurekhodiwe. Singaphindze siyibhale phasi indlela lesitiva ngayo njengobe kwenta iNkhosi Davide. (Hla. 18, 34, 142; imibhalo lengenhla.) Kuliciniso kutsi kute imitsetfo lecinile yaloko lesingakwenta kuze silungele kuthantaza. (Hla. 141:2) Yenta loko lokukulungelako.
21. Yini lengenta sithantaze ngenhlitiyo yetfu yonkhe?
21 Kuyasijabulisa kwati kutsi Jehova uyayicondza indlela lesitiva ngayo ngisho nangaphambi kwekutsi sivule umlomo. (Hla. 139:4) Nanobe kunjalo, ujabula kakhulu nakasiva siveta kutsi siyametsemba. Ngako ungangabati kuthantaza kuBabe wakho wasezulwini. Fundza emithantazweni lebhalwe eVini lakhe. Thantaza ngenhlitiyo yakho yonkhe. Mtjele ngetintfo letikujabulisile nangetintfo letikuvisa buhlungu. Njengobe Jehova anguMngani wakho mbamba, utawuhlale akusekela!
INGOMA 45 Kuzindla Kwenhlitiyo Yami
a Ngephansi kwesihloko lesitsi “Jehova,” buka sihlokwana lesitsi “Lobunye buntfu baJehova lobuhle,” encwadzini letsi ImiBhalo Lecondzisa Kuphila KwemaKhristu.
b Imithantazo leyentelwa libandla ivame kuba mifisha.
c Ngesikhatsi Hana athantaza, wasebentisa emagama lafanako nalawo latfolakala etincwadzini taMosi. Ngako kusebaleni kutsi bekatinika sikhatsi sekucabangisisa ngemiBhalo. (Dut. 4:35; 8:18; 32:4, 39; 1 Sam. 2:2, 6, 7) Eminyakeni leminyenti leyalandzela, Mariya, longumake waJesu, wasebentisa emavi ekudvumisa lafanako nalawo lashiwo nguHana.—Luk. 1:46-55.
d Sibonelo nje, catsanisa Jona 2:3-9 umcatsanise neTihlabelelo 69:1; 16:10; 30:3; 142:2, 3; 143:4, 5; 18:6; na–3:8, ngekulandzelana njengobe kwenta Jona.