Khumbula Kuthantazela Labanye

1. Sati njani kutsi imithantazo yetfu ibalulekile kuJehova?

UMTHANTAZO usipho lesihle kakhulu. Cabanga nje: Jehova unikete tingilosi imisebenti letsite. (Hla. 91:11) Uphindze waniketa iNdvodzana yakhe imisebenti lebalulekile. (Mat. 28:18) Nobe kunjalo, uwunikete bani umsebenti wekulalela imithantazo? Utentela yena lomsebenti. Jehova “uyayiva imithantazo,” nguye matfupha losilalelako.​—Hla. 65:2.

2. Ngusiphi sibonelo umphostoli Pawula lasibekela sona mayelana nekuthantazela labanye?

² Ngisho nobe sithantaza ngekukhululeka ngetinkinga lesinato, kufanele sibathantazele nalabanye. Umphostoli Pawula wakwenta loko. Sibonelo nje, wabhalela libandla lase-Efesu watsi: “Ngiyachubeka nginithantazela.” (Ef. 1:16) Pawula bekathantazela nebantfu labatsite. Nasi sibonelo, watjela Thimothi watsi: “Ngiyambonga Nkulunkulu, . . . angikukhohlwa nangincusa busuku nemini.” (2 Thim. 1:3) Tikhona tintfo lebetikhatsata Pawula lebekangathantaza ngato. (2 Khor. 11:23; 12:7, 8) Nobe kunjalo, watiniketa sikhatsi sekuthantazela labanye.

3. Yini lengenta sikhohlwe kuthantazela labanye?

³ Ngalesinye sikhatsi siyakhohlwa kuthantazela labanye. Kwentiwa yini? Lomunye dzadze lokutsiwa nguSabrinaa usho lesinye sizatfu. Utsi: “Sihlale simatasatasa. Siphazanyiswa tinkinga tetfu, lokwenta kutsi bese sithantazela nje kuphela loko lesikudzingako.” Ukile yini wakubona loko kwenteka kuwe? Nangabe kunjalo, lesihloko sitakusita. Sitawuchaza kutsi (1) kubaluleke ngani kuthantazela labanye, nekutsi (2) singakwenta njani loko.

LOKO LOKWENTA SITHANTAZELE LABANYE

4-5. Sisho ngani kutsi kuthantazela labanye “kunemandla kakhulu”? (Jakobe 5:16)

⁴ Kuthantazela labanye “kunemandla kakhulu.” (Fundza Jakobe 5:16.) Kuthantazela labanye kungasifaka yini sandla kuloko lokutawenteka kubo? Yebo. Njengobe Jesu bekati kutsi umphostoli Phetro utamphika ngekushesha, watsi kuye: “Ngikuncusele kutsi kukholwa kwakho kungapheli.” (Luk. 22:32) Pawula bekati kutsi umthantazo ungawenta umehluko. Ngesikhatsi angakehlulelwa kahle futsi waboshwa eRoma, wabhalela Filemoni watsi: “Ngetsemba kutsi ngemithantazo yenu ngitawubuyela kini.” (Flm. 22) Nguloko lokwenteka, Pawula wakhululwa ngekushesha futsi waphindze wachubeka nemsebenti wakhe wekushumayela.

⁵ Kuliciniso kutsi loko akusho kutsi nasithantaza singamcindzetela Jehova kutsi ente loko lesikucelako. Uyanaka kutsi kusikhatsata kangakanani loko lesikuthantazelako, futsi ngalesinye sikhatsi angakhetsa kwenta loko lesikucelako. Kukwati loko kungasisita kutsi sithantaze ngalokusuka enhlitiyweni kuJehova ngesimo lesikuso futsi sishiyele konkhe etandleni takhe.​—Hla. 37:5; buka na-2 KubaseKhorinte 1:11.

6. Kuthantazela labanye kungayitsintsa njani indlela lesitiva ngayo ngabo? (1 Phetro 3:8)

⁶ Kuthantazela labanye kusisita kutsi sibe “nesihawu.” (Fundza 1 Phetro 3:8.) Sihawu sisho kwati ngekuhlupheka kwalotsite futsi sibe nesifiso sekumsita. (Mak. 1:40, 41) Lomunye lomdzala welibandla lokutsiwa nguMichael utsi: “Nangithantazela labanye ngaloko labakudzingako, ngibese ngiyatati tinkinga tabo, futsi loko kwenta kutsi ngibatsandze kakhulu. Ngitiva ngisondzelene kakhulu nabo ngisho nobe bona bangakwati loko.” Lomunye lomdzala welibandla lokutsiwa nguRichard usho lenye indlela lokusita ngayo kuthantazela labanye. Utsi: “Nasithantazela lotsite, siba nesifiso lesikhulu sekumsita.” Wengeta utsi: “Nangabe simsita lomuntfu lesimthantazele, kuba ngatsi sifaka sandla ekuphendvuleni lomthantazo lesimentele wona.”

7. Kuthantazela labanye kusisita njani kutsi sibe nembono lokahle ngetinkinga tetfu? (KubaseFiliphi 2:3, 4) (Buka netitfombe.)

⁷ Kuthantazela labanye kusisita kutsi sibe nembono lokahle ngetinkinga tetfu. (Fundza KubaseFiliphi 2:3, 4.) Sonkhe sibhekene netinkinga letitsite ngenca yekuphila kulelive lelilawulwa nguDeveli. (1 Joh. 5:19; Semb. 12:12) Nangabe sivamile kuthantazela labanye, loko kusikhumbuta kutsi “bonkhe bazalwane [betfu] emhlabeni babeketelela kuhlupheka lokufanako.” (1 Phet. 5:9) Lomunye dzadze lolihlahlandlela lokutsiwa nguKatherine utsi: “Kuthantazela labanye kungikhumbuta kutsi nabo banetinkinga. Loko kungisita kutsi nginganaki kakhulu tinkinga tami.”

BAYAYIDZINGA IMITHANTAZO YETFU

8. Niketa sibonelo sekutsi bobani lesingabafaka emithantazweni yetfu.

⁸ Bobani lesingabafaka emithantazweni yetfu? Singathantazela licembu lebantfu, sibonelo nje, singathantazela labo labagulako, labasebasha labahlekwako futsi labacindzetelwa bontsanga yabo esikolweni, nobe labo lababhekene netinkinga tekukhula ngeminyaka. Linyenti lebazalwane betfu nabodzadze libeketelela kuphikiswa, kungaba kuphikiswa ngemalunga emndeni nobe bohulumende. (Mat. 10:18, 36; Imis. 12:5) Labanye babo kudzingeke bashiye emakhaya abo ngenca yetiyaluyalu letibangwa tepolitiki. Labanye behlelwe tehlakalo temvelo. Kungenteka asibati labazalwane nabodzadze, kodvwa nasibathantazela sisuke sikhombisa kutsi silalela umyalo waJesu wekutsi ‘sitsandzane.’​—Joh. 13:34.

9. Kubaluleke ngani kutsi sithantazele labo labaholako enhlanganweni yaJehova kanye nebafati babo?

⁹ Singaphindze sithantazele labo labaholako enhlanganweni yaJehova. Loku kufaka ekhatsi Sigungu Lesibusako nebasiti baso, emalunga eKomidi Yeligatja, bazalwane lababuke ematiko emahhovisini eligatja, babonisi betigodzi, labadzala bemabandla netinceku letisebentako. Linyenti lalabazalwane kunetintfo letibakhatsatako njengobe benta imisebenti lesisekelako. (2 Khor. 12:15) Sibonelo nje, lomunye umbonisi wesigodzi lokutsiwa nguMark utsi: “Lenye intfo lengikhatsata kakhulu kuba khashane nebatali bami lasebakhulile. Bobabili bayagula. Nanobe sisi wami nemyeni wakhe babanakekela, kungivisa buhlungu kutsi angikhoni kwenta loko lengifise kukwenta kuze ngibasite.” Ngisho nobe sitati letintfo letikhatsata labazalwane labasebenta kamatima nobe singatati, senta kahle ngekubathantazela. (1 Thes. 5:12, 13) Singaphindze sithantazele bafati babo njengobe babasekela ngekwetsembeka kuze babasite kutsi bachubeke benta imisebenti yabo.

10-11. Kuthantazela bazalwane betfu nabodzadze ngemacembu lehlukahlukene kuyamjabulisa yini Jehova? Chaza.

¹⁰ Njengobe sesibonile, sivame kuthantazela emacembu ebazalwane betfu nabodzadze. Sibonelo nje, singahle sicele Jehova kutsi asite labo lababoshiwe nobe advudvute labo labashonelwe ngulabo lababatsandzako, kube kute umuntfu lesimcabangako engcondvweni. Lomunye lomdzala welibandla lokutsiwa nguDonald utsi: “Kunebazalwane nabodzadze labanyenti labanetinkinga, kangangekutsi ngalesinye sikhatsi nasithantaza sibafaka bonkhe labo lababhekene netinkinga, sibabophe ngabhande linye.”

¹¹ Imithantazo lenjalo iyamjabulisa yini Jehova? Yebo! Ngetulu kwako konkhe, asati ngalokucondzile kutsi umzalwane ngamunye nobe dzadze udzingani. Ngako kukahle kutsi sibathantazele bazalwane nabodzadze ngalamacembu lahlukahlukene. (Joh. 17:20; Ef. 6:18) Imithantazo lenjalo ibufakazi bekutsi ‘sitsandza bonkhe bazalwane.’​—1 Phet. 2:17.

NASITHANTAZELA UMUNTFU NGAMUNYE

12. Kunaka kungasisita njani kutsi sikhone kuthantazela umuntfu ngamunye?

¹² Naka. Ngetulu kwekuthantazela emacembu ebazalwane nabodzadze, kukahle nekuthantazela umuntfu ngamunye, umusho ngeligama. Ukhona yini ebandleni lokulo lonekugula lokungapheli? Ukhona yini losemusha lodvumatekile ngenca yekutsi lafundza nabo bamcindzetela kutsi ente lokubi? Ukhona yini umtali lokhulisa umntfwana ayedvwa, lodvonsa kamatima kuze akhulise lomntfwana ‘ngekumyala nangesicondziso saJehova?’ (Ef. 6:4) Nangabe unaka, utawubatsandza kakhulu labanye, lokutawenta ube nesifiso lesikhulu sekubathantazela.b​—Rom. 12:15.

13. Yini lengasisita sithantazele labo lesingabati?

¹³ Thantazela labanye ubasho ngemagama. Singabathantazela ngisho nalabo lesingabati. Sibonelo nje, cabanga ngebazalwane betfu nabodzadze lababoshiwe kulamanye emave, njengaseCrimea, e-Eritrea, eRussia naseSingapore. Ku-jw.org, ungatfola emagama alabo labasemajele.c Lomunye umbonisi wesigodzi lokutsiwa nguBrian utsi: “Ngitfole kutsi kulibhala phasi ligama lemzalwane nobe dzadze loboshiwe bese ngiyalisho ngiphumisele kuyangisita kutsi ngimkhumbule futsi ngimfake emithantazweni yami.”

14-15. Yini lesingayenta kuze sente imithantazo lecondzile?

¹⁴ Kusho ngalokucondzile loko lobacelela kona. Michael, lesike sakhuluma ngaye utsi: “Nangifundza ku jw.org ngebazalwane lababoshiwe, ngetama kucabanga kutsi bengingativa njani kube bengisesimeni sabo. Ngiyati kutsi bengingakhatsateka ngemfati wami futsi bengingafuna kuciniseka kutsi unakekelekile. Loko kungisita kutsi ngikusho ngalokucondzile loko lengibacelela kona bazalwane lababoshiwe labashadile.”​—Heb. 13:3, umbhalo longentasi.

¹⁵ Nasicabanga kutsi kungenteka kunjani kuphila kwebazalwane betfu nabodzadze lababoshiwe, loko kungasisita kutsi sicabange ngalokunye lesingakusho emithantazweni yetfu. Sibonelo nje, singathantazela bogadzi basejele kutsi babaphatse kahle futsi sithantazele nalabo labasemagunyeni kutsi bavumele bazalwane betfu nabodzadze kutsi bakhonte Nkulunkulu ngekukhululeka. (1 Thim. 2:1, 2) Singaphindze sithantazele labo labasemabandleni alabazalwane nabodzadze lababoshiwe kutsi bakhutsateke ngekubona sibonelo sabo sekwetsembeka, nobe sithantazele labo labangasibo boFakazi kutsi banake indlela bazalwane betfu lababoshiwe labatiphatsa kahle ngayo futsi balalele umlayeto wetfu. (1 Phet. 2:12) Singenta lokufanako ngisho nalapho sithantazela bazalwane betfu nabodzadze lababeketelela letinye tinkinga. Nangabe sinaka, sibasho ngemagama labanye nasithantaza, sikusho ngalokucondzile loko lesibacelela kona, kutawukhombisa kutsi ‘siyatsandzana.’​—1 Thes. 3:12.

BANI NEMBONO LOKAHLE NGEMITHANTAZO YAKHO

16. Yini lengasisita kutsi sichubeke sinembono lokahle ngemithantazo yetfu? (Matewu 6:8)

¹⁶ Njengobe sesibonile, imithantazo yetfu ingawushintja umphumela wesimo lesitsite. Nobe kunjalo, kufanele sibe nembono lokahle. Nasithantaza, sisuke singatjeli Jehova intfo langayati, futsi akukafaneli simtjele kutsi kufanele asilungise njani simo lesitsite. Jehova uyakwati loko lokudzingwa tinceku takhe, ngisho nangaphambi kwekutsi tikwati loko, nobe sikwati loko lesikudzingako. (Fundza Matewu 6:8.) Ngako-ke yini leyenta sithantazele labanye? Ngetulu kwaletizatfu lesesikhulume ngato kulesihloko, nguloko bantfu labakhatsalelanako labakwentako. Lutsandvo lusenta kutsi sithantazele labanye. Ngetulu kwaloko, Jehova uyajabula nangabe tikhonti takhe tikhombisa lutsandvo lwakhe.

17-18. Ingafananiswa nani imithantazo lesiyentela bazalwane betfu nabodzadze?

¹⁷ Ngisho nobe imithantazo yetfu ingalwenti lushintjo kuloko lokuba ngumphumela, kepha ikhombisa kutsi siyabatsandza bazalwane betfu nabodzadze, futsi Jehova uyakunaka loko. Singayibekisa kanjena lendzaba: Asesitsi kunemndeni lonebantfwana lababili labancane, umfana nentfombatane. Lomfana ugula kakhulu. Lentfombatanyana incenga babe wayo itsi: “Ngicela usite bhuti wami. Ugula kakhulu!” Lobabe kukhona lasavele akwentile ngalesimo; uyayitsandza indvodzana yakhe futsi uyinakekela kahle. Nobe kunjalo, kuyamjabulisa kubona lentfombatanyana yakhe inendzaba nabhuti wayo kangangekutsi ize imncenge kutsi amsite.

¹⁸ Nguloko Jehova lasikhutsata kutsi sikwente, kutsi sikhatsalelane futsi sithantazele lomunye nalomunye. Njengobe sikwenta loko, imithantazo yetfu iveta kutsi asitikhatsaleli tsine kuphela, kodvwa sikhatsalela nalabanye, futsi Jehova uyakubona loko. (2 Thes. 1:3; Heb. 6:10) Ngetulu kwaloko, njengobe sesibonile, kuletinye timo imithantazo yetfu ingalwenta lushintjo kuloko lokuba ngumphumela. Ngako-ke, shengatsi singenta konkhe lesingakwenta kuze sikhumbule kuthantazela lomunye nalomunye.