Ungavumeli Emaphutsa Alabanye Kutsi Akukhube

1, 2. LiBhayibheli lakubiketela njani kwandza kwebantfu baJehova?

EMHLABENI wonkhe kunenhlangano leyakhiwa bantfu labatsandza Jehova nalabafuna kumkhonta. Labo bantfu BoFakazi BaJehova. Nanobe banemaphutsa, labantfu bakhe Jehova ubacondzisa ngemoya wakhe longcwele. Asesibone letinye tindlela lababusise ngato.

² Nga-1914, bebambalwa kakhulu bantfu lebebakhonta Jehova. Kodvwa Jehova uwubusisile umsebenti wekushumayela. Umphumela waloko ube kutsi tigidzi tebantfu tifundze liciniso leliseBhayibhelini futsi tibe BoFakazi bakhe. Jehova wakuchaza lokwandza lokumangalisako ngesikhatsi atsi: “Lomncane wenu uyawuba yinkhulungwane, lophansi kakhulu abe sive lesinemandla. NginguSimakadze, ngesikhatsi sako ngiyawukwenta loko ngekushesha lokukhulu.” (Isaya 60:22) Lamuhla kuyacaca kutsi lesiphrofetho sesigcwalisekile. Bantfu baJehova banjengesive lesikhulu. Tinyenti tive emhlabeni letinelinani lebantfu labangephansi kwelinani laBoFakazi BaJehova.

3. Tinceku taNkulunkulu tilukhombise njani lutsandvo?

³ Kulamalanga ekugcina, Jehova usite bantfu bakhe kutsi bakhulise lutsandvo labanalo emkhatsini wabo. “Nkulunkulu ulutsandvo,” futsi bayakulingisa loko. (1 Johane 4:8) Jesu watjela balandzeli bakhe kutsi ‘batsandzane.’ Waphindze watsi: “Nangabe nitsandzana, bonkhe batawukwati kutsi nibafundzi bami.” (Johane 13:34, 35) Muva nje, tinceku taJehova tikhombise lutsandvo emkhatsini wato ngisho nangesikhatsi tive tisemphini. Ngemphi yelive yesibili kwafa bantfu labacishe babe tigidzi letingu-55. Kodvwa bantfu baJehova abazange babulale ngisho namunye umuntfu kuleyomphi. (Fundza Mikha 4:1, 3.) Loku kubasite kutsi bahlale ‘bamsulwa engatini yabo bonkhe bantfu.’​—Imisebenti 20:26.

4. Kungani kwandza kwebantfu baJehova kumangalisa?

⁴ Bantfu baNkulunkulu bayachubeka bandza ngelinani ngisho nobe banesitsa lesinemandla lesinguSathane. ‘Ungunkulunkulu walelive.’ (2 Khorinte 4:4) Sathane ulawula tinhlangano tetepolitiki talomhlaba kanye nebetindzaba futsi usebentisa letintfo kute etame kumisa umsebenti wekushumayela tindzaba letimnandzi. Kodvwa angeke akhone kuwumisa lomsebenti. Nobe kunjalo, Sathane uyati kutsi sincane sikhatsi lesimsalele, ngako uchubeka etama kusiyekelisa kukhonta Jehova.​—Sembulo 12:12.

UTAWETSEMBEKA YINI NANGABE LABANYE BENTA EMAPHUTSA?

5. Kungani labanye bangasivisa buhlungu ngalesinye sikhatsi? (Buka sitfombe lesisekucaleni kwalesihloko.)

⁵ Tinceku taNkulunkulu tifundze kutsi kubaluleke kakhulu kutsandza Nkulunkulu kanye nalabanye bantfu. Jesu watsi: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngumtsetfo lomkhulu newekucala. Wesibili lofana nawo utsi: ‘Kufanele utsandze makhelwane wakho njengobe utitsandza wena.’” (Matewu 22:35-39) Nobe kunjalo, liBhayibheli libonisa kutsi bonkhe bantfu batalwa banesono ngenca yekona kwa-Adamu. (Fundza Roma 5:12, 19.) Ngako ngaletinye tikhatsi labanye ebandleni bangase basho nobe bente intfo lengasivisa buhlungu. Nangabe loko kwenteka, yini lesitayenta? Lutsandvo lwetfu ngaJehova lutawuchubeka lucinile yini? Sitawetsembeka yini kuye nakubantfu bakhe? LiBhayibheli lisitjela ngaletinye tinceku taNkulunkulu letakhuluma nobe tenta tintfo letavisa labanye buhlungu. Asesibone kutsi yini lesingayifundza kuloko lokwenteka.

6. Eli wehluleka njani kwekhuta emadvodzana akhe?

⁶ Eli abengumphristi lophakeme ka-Israyeli, kodvwa emadvodzana akhe lamabili akazange ayilalele imitsetfo yaJehova. LiBhayibheli litsi: “Emadvodzana a-Eli abengemadvodza lakhohlakele; abengenandzaba naSimakadze.” (1 Samuweli 2:12) Eli bekati kutsi emadvodzana akhe enta tintfo letimbi kakhulu, kepha akazange awekhute ngalokwenele. Jehova wabese uyamjezisa Eli kanye nalamadvodzana akhe lamabili. Ngekuhamba kwesikhatsi, Jehova akazange asivumele situkulwane sa-Eli kutsi sikhonte njengebaphristi. (1 Samuweli 3:10-14) Kube bewuphila ngesikhatsi sa-Eli futsi wati nekutsi uvumele emadvodzana akhe kutsi ente tintfo letimbi, bewutawukhubeka yini? Lesimo besitawenta kukholwa kwakho kuJehova kube butsakatsaka yini, bese uyayekela kumkhonta?

7. Davide wona ngayiphi indlela kuNkulunkulu, futsi yini Nkulunkulu layenta ngalokona kwakhe?

⁷ Davide abenebuntfu lobuhle futsi kungako Jehova abemtsandza kakhulu. (1 Samuweli 13:13, 14; Imisebenti 13:22) Kodvwa naye Davide wenta intfo lembi kakhulu. Ngesikhatsi Uriya ayolwa emphini, Davide walala nemka-Uriya longuBhatisheba, lowase uyakhulelwa. Davide bekangafuni kutsi kube khona lowatiko ngaloko labekwentile. Ngako watfumela kutsi kubitwe Uriya ete kuye futsi wamtjela kutsi aye ekhaya lakhe. Bekacabanga kutsi Uriya utawulala naBhatisheba khona bantfu batocabanga kutsi Uriya nguyise walomntfwana. Kodvwa Uriya wala kuya ekhaya. Ngako Davide wenta konkhe lokusemandleni akhe kutsi Uriya abulawe kulemphi. Ngenca yetono takhe letinkhulu, yena nemndeni wakhe bahlupheka kakhulu. (2 Samuweli 12:9-12) Kodvwa Jehova waba nemusa futsi wamcolela. Bekati kutsi Davide ufuna kwenta lokulungile. (1 Emakhosi 9:4) Kube bewuphila ngaleso sikhatsi, bewutativa njani ngaloko Davide lakwenta? Bewutawuyekela yini kukhonta Jehova?

8. (a) Umpostoli Phetro wehluleka njani kugcina emavi akhe? (b) Ngemuva kwekutsi Phetro ente liphutsa, kungani Jehova achubeka amsebentisa?

⁸ Lesinye sibonelo lesiseBhayibhelini semphostoli Phetro. Jesu abemkhetse kutsi abe ngumphostoli wakhe. Kodvwa, ngaletinye tikhatsi Phetro bekasho nobe ente tintfo letingakalungi. Nasi sibonelo: Phetro watsi angeke aze amshiye Jesu ngisho nobe labanye bebangamshiya. (Makho 14:27-31, 50) Kodvwa ngemuva kwekuboshwa kwaJesu, bonkhe baphostoli, lokufaka ekhatsi naPhetro, bamshiya. Phetro wabese uphika Jesu emahlandla lamatsatfu lehlukene. (Makho 14:53, 54, 66-72) Nobe kunjalo, Phetro weva buhlungu kakhulu ngaloko lebekakwentile. Ngako, Jehova wamcolela futsi wachubeka amsebentisa. Kube bewungumfundzi waJesu ngaleso sikhatsi futsi wati loko Phetro lakwenta, bewutawuchubeka yini umetsemba Jehova?

9. Kungani wetsemba kutsi Nkulunkulu ulungile?

⁹ Kuletibonelo, siyabona kutsi letinye tinceku taJehova tenta tintfo letimbi futsi tavisa labanye bantfu buhlungu. Nangabe loku kwenteka lamuhla, yini lotayenta? Utawuyekela yini kuya emihlanganweni nobe mhlawumbe uze ushiye Jehova kanye nebantfu bakhe ngalokuphelele? Utawubona yini kutsi Jehova unemusa nekutsi mhlawumbe umele loyo muntfu kutsi aphendvuke? Kodvwa ngaletinye tikhatsi kungase kwenteke kutsi umuntfu lowente sono lesikhulu angatisoli ngaloko lokwentekile. Utawetsemba yini kutsi Jehova uyakwati loko nekutsi ngesikhatsi sakhe utawenta lokutsite? Nakufanele, Jehova angamsusa loyo muntfu ebandleni lakhe. Uyakholelwa yini kutsi Jehova uhlale enta lokulungile?

HLALA WETSEMBEKILE

10. Yini Jesu labekayicondza ngemaphutsa lentiwa nguJudasi Skariyothi naPhetro?

¹⁰ EBhayibhelini, sifundza ngebantfu labanyenti labetsembeka kuJehova nakubantfu bakhe ngisho nobe labanye lebebabatungeletile bebenta emaphutsa lamakhulu. Jesu sibonelo lesihamba embili. Ngemuva kwekuthantaza busuku bonkhe kuYise acela lusito, Jesu wakhetsa baphostoli bakhe labangu-12. Kodvwa ngekuhamba kwesikhatsi, munye wabo lokunguJudasi Skariyothi wamtsengisa. Umphostoli Phetro naye waphika Jesu watsi akamati. (Lukha 6:12-16; 22:2-6, 31, 32) Jesu akazange asole Jehova nobe bafundzi bakhe ngesikhatsi labanye babo bamvisa buhlungu. Jesu wasondzelana neYise futsi wachubeka amkhonta ngekwetsembeka. Umphumela waloko waba kutsi Jehova wamvusa futsi ngekuhamba kwesikhatsi, wamenta waba yiNkhosi yeMbuso wasezulwini.​—Matewu 28:7, 18-20.

11. Yini leyashiwo liBhayibheli mayelana netinceku taJehova tesikhatsi sekuphela?

¹¹ Sibonelo saJesu sisifundzisa kutsi kufanele setsembeke kuJehova kanye nakubantfu bakhe. Sinetizatfu letinhle tekwenta njalo. Siyabona kutsi Jehova ucondzisa tinceku takhe kulesikhatsi sekuphela. Uyatisita kutsi tishumayele liciniso emhlabeni wonkhe futsi ngito kuphela letenta lomsebenti. Tinebunye mbamba futsi tiyajabula ngenca yako konkhe Jehova latifundzisa kona. Jehova wakuchaza loku ngesikhatsi atsi: “Tinceku tami tiyawuhlabela ngenca yekujabula lokuphuma etinhlitiyweni tato.”​—Isaya 65:14.

12. Kufanele siwatsatse njani emaphutsa alabanye?

¹² Sijabula kakhulu ngobe Jehova uyasicondzisa aphindze asisite kutsi sente tintfo letinyenti letinhle. Kepha, bantfu eveni laSathane abakajabuli futsi bete litsemba ngelikusasa. Angeke kube kuhlakanipha nobe kube yintfo lekahle kushiya Jehova nebantfu bakhe ngenca nje yekutsi umuntfu lotsite ebandleni wente nobe ukhulume intfo letsite lengakalungi! Esikhundleni saloko, kufanele sihlale setsembekile kuJehova futsi silalele ticondziso takhe. Kufanele siphindze sifundze nendlela lokufanele siwatsatse ngayo emaphutsa alabanye bantfu, kanye nendlela lokufanele sente ngayo.

INDLELA LOKUFANELE SENTE NGAYO

13, 14. (a) Kungani kufanele sibeketelelane? (b) Ngusiphi setsembiso lesifuna kuhlale sisikhumbula?

¹³ Yini lokufanele uyente nangabe umzalwane wakho asho nobe enta intfo lekuvisa buhlungu? LiBhayibheli lisiniketa nasi seluleko: “Ungasheshi ucansuke emoyeni wakho, ngobe intfukutselo ihlala esifubeni sesilima.” (Umshumayeli 7:9) Sonkhe sinesono futsi siyawenta nemaphutsa. Ngako ngeke silindzele kutsi bazalwane betfu batawuhlala bakhuluma futsi benta tintfo letikahle ngaso sonkhe sikhatsi. Ngeke kube kahle kutsi sihlale sicabanga ngemaphutsa abo. Nangabe senta njalo, kungenteka singasajabuli nasikhonta Jehova. Lokubi kakhulu kutsi kukhonta kwetfu Jehova kungase kube butsakatsaka futsi siyishiye inhlangano yakhe. Nakunjalo, angeke sisakhona kumkhonta Jehova nobe sichubeke sinelitsemba lekuphila emhlabeni lomusha.

¹⁴ Ngako, ungasitwa yini kutsi uhlale ujabulile nawukhonta Jehova nobe labanye benta tintfo letikukhubako? Ngaso sonkhe sikhatsi hlale ukhumbula setsembiso sakhe lesitsi: “Buka la, ngiyawudala emazulu lamasha nemhlaba lomusha. Tintfo takadzeni tingeke tikhunjulwe, futsi tingeke tisabuya nasengcondvweni.” (Isaya 65:17; 2 Phetro 3:13) Jehova utakupha letibusiso nangabe uhlala wetsembekile kuye.

15. Yini Jesu latsi kufanele siyente nangabe labanye benta emaphutsa?

¹⁵ Sisengakafiki eveni lelisha. Ngako nangabe umuntfu lotsite asivisa buhlungu, kufanele sizindle ngaloko Jehova lafuna sikwente. Cabanga ngaloko Jesu lakusho nakatsi: “Nangabe nitsetselela labanye tono tabo, neYihlo losezulwini utanitsetselela; kodvwa nangabe ningabatsetseleli labanye tono tabo, neYihlo losezulwini ngeke anitsetselele tono tenu.” Ngesikhatsi Phetro abuta Jesu kutsi kufanele sitsetselele “tikhatsi letisikhombisa yini,” Jesu waphendvula watsi: “Ngitsi kuwe, hhayi tikhatsi letisikhombisa, kodvwa letingemashumi lasikhombisa nesikhombisa.” Jesu wasifundzisa kutsi kufanele sihlale sikulungele kutsetselela labanye.​—Matewu 6:14, 15; 18:21, 22.

16. Ngusiphi sibonelo lesihle Josefa lasibekela sona?

¹⁶ Sibonelo saJosefa sisifundzisa indlela lokufanele sente ngayo nangabe labanye basidvumata. Josefa nemnakabo lomncane bekungibo kuphela emadvodzana aJakobe naRakheli. Jakobe bekanalamanye emadvodzana lalishumi, kodvwa bekatsandza kakhulu Josefa kwendlula bonkhe lalabanye. Loko kwenta lamadvodzana aba nemona. Ecinisweni amtondza kakhulu Josefa kangangekutsi aze amtsengisa waba sigcila, futsi watsatfwa wayiswa eGibhithe. Ngemuva kweminyaka leminyenti, inkhosi yaseGithithe yabeka Josefa kutsi abengundvunankhulu kulelo live ngenca yekutsi bewumjabulisa kakhulu umsebenti labewenta. Ngekuhamba kwesikhatsi, bomnakabo Josefa beta eGibhithe batotsenga kudla ngenca yekutsi ekhaya bekunendlala. Ngesikhatsi babona Josefa abazange babone kutsi nguye, kodvwa yena bekababona. Nanobe bamphatsa kabuhlungu, akazange abajezise. Kodvwa wabavivinya kuze abone kutsi bebashintje mbamba yini. Ngesikhatsi Josefa abona kutsi bashintjile, wabatjela kutsi ungumnakabo. Wabese uyabadvudvuta utsi: “Ningesabi. Nine nebantfwabenu ngitaniphatsa ngetandla letifutfumele.”​—Genesisi 50:21.

17. Yini lofuna kuyenta nangabe labanye benta emaphutsa?

¹⁷ Khumbula kutsi njengobe sonkhe siwenta emaphutsa, nawe kungenteka ubakhube labanye. Nangabe ubona kutsi kukhona umuntfu lomphatse kabi, landzela seluleko seliBhayibheli. Mcele kutsi akucolele futsi wetame kwakha kuthula naye. (Fundza Matewu 5:23, 24.) Siyajabula nangabe labanye basitsetselela. Ngako natsi kufanele sente intfo lefanako kubo. Kholose 3:13 utsi: “Chubekani nibeketelelana futsi nitsetselelana ngekukhululeka ngisho nobe umuntfu anesizatfu sekukhonona ngalomunye. Njengobe Jehova anitsetselele ngekukhululeka, nani yentani kanjalo.” Nangabe sibatsandza mbamba bazalwane betfu, angeke sibatfukutselele ngentfo labayenta esikhatsini lesendlulile. (1 Khorinte 13:5) Nangabe sibatsetselela labanye, natsi Jehova utasitsetselela. Ngako, nangabe labanye benta emaphutsa, shengatsi singabakhombisa umusa njengobe naBabe wetfu Jehova unemusa kitsi.​—Fundza Tihlabelelo 103:12-14.