Tiyawuke Tiphele Yini Tento Tetidlamlilo?

Ngemuva kwekuhlasela kwetidlamlilo, ungase utibute: ‘Nkulunkulu unendzaba yini vele nebantfu? Kungani tintfo letinjena tenteka? Tiyawuke tiphele yini vele tento tetidlamliloa? Ngingaphila njani nalokwesaba?’ LiBhayibheli liniketa timphendvulo letenetisako talemibuto.

Nkulunkulu utiva njani ngetento tetidlamlilo?

Nkulunkulu uyabenyanya budlova kanye netento tetidlamlilo. (Tihlabelelo 11:5; Taga 6:16, 17) Jesu, ummeleli waNkulunkulu, wabekhuta bafundzi bakhe nabenta tento lekhombisa budlova. (Matewu 26:50-52) Akusuye Nkulunkulu loniketa bantfu lilungelo lekwenta tento tebudlova, ngisho nobe labanye batsi batenta egameni lakhe. Ecinisweni, akayilaleli ngisho nemithantazo yabo.—Isaya 1:15.

Nkulunkulu unendzaba nabo bonkhe bantfu labahluphekako, lokufaka ekhatsi labo labatsintfwe kuhlasela kwetidlamlilo. (Tihlabelelo 31:7; 1 Phetro 5:7) LiBhayibheli liphindze livete kutsi Nkulunkulu utabucedza budlova.—Isaya 60:18.

Tintfo letibangela tento tetidlamlilo

LiBhayibheli liveta sizatfu lesiyinhloko lesenta kube netidlamlilo: “Umuntfu ubuse lomunye umuntfu wase uyamlimata.” (Umshumayeli 8:9) Kuwo wonkhe umlandvo, labasemagunyeni besabise bantfu kuze babacindzetele. Ngenca yekucindzetelwa, labanye babe tidlamlilo kuze batiphindziselele.—Umshumayeli 7:7.

Kucedvwa kwetento tetidlamlilo

Nkulunkulu wetsembisa kucedza kwesaba nebudlova futsi aletse kuthula emhlabeni. (Isaya 32:18; Mikha 4:3, 4)

Utawususa tintfo letenta kube netidlamlilo. Nkulunkulu utawumisa hulumende wakhe lotawubusa umhlaba wonkhe, esikhundleni salabohulumende labakhona. Jesu Khristu, longuMbusi walohulumende, utawuphatsa bantfu ngekungakhetsi futsi asuse kucindzetelwa kanye nebudlova. (Tihlabelelo 72:2, 14) Ngaleso sikhatsi, kute loyawuba sidlamlilo. Bantfu “batawujabulela kuthula lokukhulu.”—Tihlabelelo 37:10, 11.
Utawususa bonkhe buhlungu lobubangelwe tento tetidlamlilo. Nkulunkulu utawubelapha bantfu labalinyetwe tento tetidlamlilo. (Isaya 65:17; Sembulo 21:3, 4) Wetsembisa ngisho nekubavusa ekufeni labo labafe ngenca yaletento kuze batophila emhlabeni lonekuthula.—Johane 5:28, 29.

LiBhayibheli lisiniketa tizatfu letinhle tekukholwa kutsi Nkulunkulu utawutsatsa sinyatselo madvutane. Nobe kunjalo, kungenteka uyatibuta, ‘Kungani Nkulunkulu solo angaticedzi tento tetidlamlilo?’ Kuze utfole imphendvulo, bukela i-video letsi Kungani Nkulunkulu Avumela Kuhlupheka?

a “Tento tetidlamlilo” ngalokuvamile tisho kusongela bantfu labavamile ngebudlova nekubesabisa kuze kufezwe imigomo yetepolitiki, yenkholo nobe kuze kube nelushintjo. Nobe kunjalo, labanye bantfu bangahle bangavumi kutsi sento lesitsite sisento setidlamlilo.

LiBhayibheli lisita bantfu babhekane nalesimo

Nati tintfo letimbili letiseBhayibhelini letingakusita.

Thantaza kuNkulunkulu.—KubaseFiliphi 4:6, 7.
Naka kakhulu litsemba lesiliniketwa liBhayibheli.—KumaHebheru 6:19.

Kuze utfole letinye tintfo letilusito eBhayibhelini, buka sihloko lesitsi “Indlela Yekulawula Kukhatsateka.”

BoFakazi BaJehova labatsintfwe tento tetidlamlilo basekelwe ngemaKhristu labakanye nabo. Cabanga nganati tibonelo letimbili:

Natalya na-Aslan, indvodzana yakhe leneminyaka lengu-9, bebasesikolweni eBeslan, eRussia, ngesikhatsi kufika tidlamlilo letihlomile tatfumba bantfu labangu-1 000. Lokubuhlungu kutsi kwafa bantfu labanyenti, liningi labo lokubantfwana. Ngisho nobe Natalya na-Aslan basindza, kodvwa betfuka kakhulu. Buka kutsi yini leyabasita babancono.
Pablo naSophie bafelwa yindvodzana yabo nakuhlaselwa i-Twin Towers, eNew York. Bukela le-video kuze ubone kutsi yini leyasita bona kanye nalabanye labatsintseka ngenca yalokuhlasela kwetidlamlilo.