**Litsini LiBhayibheli Ngemphi Ye-Nuclear?**

Umhlaba uchubeka nekuba sengotini yekuba nemphi ye-nuclear ngenca yekutsi babusi bemhlaba bayachubeka nekwakha futsi bandzise tikhali te-nuclear. Bantfu bakhatsatekile ngekwenyuka kwelinani letikhali te-nuclear ngobe loko kusho kwenyuka kwematfuba ekutsi kube nemphi ye-nuclear. Bantfu baphindze bakhatsateke ngekutsi uma live lingasebentisa ibhomu lencane ye-nuclear, loko kungasusa imphi lenkhulu ye-nuclear lengalimata umhlaba. I-Bulletin of the Atomic Scientists itsi, “siphila esikhatsini lapho amanyenti ematfuba ekutsi kube nemphi ye-nuclear.”

Kungenteka yini kube nemphi ye-nuclear? Nangabe kunjalo, umhlaba utawusindza yini? Singabhekana kanjani nekwesaba kutsi kungenteka kube nemphi ye-nuclear? Litsini liBhayibheli?

Kulesihloko

LiBhayibheli liyabiketela yini ngemphi ye-nuclear?

LiBhayibheli alikhulumi ngalokucondzile ngemphi ye-nuclear. Nobe kunjalo, ematfuba ekutsi kube nemphi ye-nuclear angumphumela wesimo sengcondvo sebantfu kanye netentakalo letabiketelwa liBhayibheli.

Catsanisa lamavesi lalandzelako kanye naloko lokwentekako emhlabeni lamuhla:

Emavesi laseBhayibhelini: Bafundzi baJesu babuta kutsi: “Titawenteka nini letintfo, futsi sitawubona ngani kutsi sesikhatsi sekuba khona kwakho nesekuphela kwalelive?” Jesu wabaphendvula watsi: “sive sitawuvukela lesinye sive, nembuso uvukele lomunye umbuso.”—Matewu 24:3, 7.

Lokwentekako emhlabeni: Emave lafaka ekhatsi nalawo lakha tikhali te-nuclear achubeka alwa ngato letikhali.

“Eminyakeni yakamuva umhlaba sewugcwele budlova kakhulu futsi nekulwa sekwandzile.”—The Armed Conflict Location & Event Data Project.

Livesi leliseBhayibhelini: “Esikhatsini sekuphela, inkhosi yaseningizimu itawufucana [nenkhosi yasenyakatfo].”—Danyela 11:40.

Lokwentekako emhlabeni: Tive letilwisanako kanye nebasiti bato tilwela kuba nemandla lamakhulu ekubusa njengobe liBhayibheli labiketela. Nanobe lamuhla imibuso lenetikhali te-nuclear ingalwisani kodvwa iyachubeka icinisa tikhali tayo te-nuclear kutsi tibe nemandla nakakhulu.

“Kuleminyaka lengu-10 leyendlulile kube nekungavani emkhatsini wemave lamanyenti. Lamanye alamave lalwako asekelwa ngemave lanemandla.”—The Uppsala Conflict Data Program.

Emavesi laseBhayibhelini: ‘Kepha yati kutsi emalangeni ekugcina kutawuba netikhatsi letibucayi lokumatima kubhekana nato. Ngobe bantfu . . . . Ngeke bavume kwenta tivumelwane, banyundzele, bangatibambi, babe nelulaka.’—2 KuThimothi 3:1-3.

Lokwentekako emhlabeni: Njengabo bonkhe bantfu emhlabeni, nebabusi kuyenteka bangaboni ngasolinye. Kunekutsi betame kulungisa lokungevani ngekuthula, bangase betame kukulungisa ngemandla nobe ngekusongelana. Kwenta kwabo kanjalo kungase kubangele imphi ye-nuclear.

“Lababusi nabehluleka kusebentisana ngekuvana, lokungevani kutochubeka kuba kubi nakakhulu.”—S. Saran naJ. Harman, World Economic Forum.

Nkulunkulu angakuvumela yini kutsi kube nemphi ye-nuclear?

LiBhayibheli alisho. Litsi “tintfo letetfusako,” titokwenteka kulesikhatsi setfu. (Lukha 21:11) Sibonelo saloku sifaka ekhatsi kujikwa kwemabhomu e-atom ngesikhatsi seMphi Yelive Yesibili. LiBhayibheli liyachaza kutsi yini leyenta Nkulunkulu avumele timphi. Kuze utfole lokunyenti bukela i-video letsi, Kungani Nkulunkulu Avumela Kuhlupheka?

UMhlaba utawusindza yini?

Yebo. Ngisho nobe bantfu bebangaphindze basebentise tikhali te-nuclear, kodvwa Nkulunkulu ngeke abavumele kutsi babhubhise lomhlaba. LiBhayibheli litsi umhlaba utawusindza ekusongelweni futsi utawuhlala ulikhaya lebantfu phakadze.

“Umhlaba utawuhlala ukhona kuze kube phakadze.”—Umshumayeli 1:4.

“Nkulunkulu, loyo lowadala umhlaba, . . . longazange awudalele lite nje, kodvwa lawudalela kutsi kuhlalwe kuwo.”—Isaya 45:18.

Labanye bantfu bacabanga kutsi esikhatsini lesitako emhlabeni kutawuba nebantfu labambalwa labatakutfola kumatima kuphila kulomhlaba lotawube ungcoliswe yi-nuclear. Nobe kunjalo, liBhayibheli liveta kutsi nobe ngumuphi umonakalo lobangelwe timphi utawuphindze ulungiswe.

“Lihlane nendzawo leyomile kutawujabula, Indzawo lebekile lelugwadvule itawujabula kakhulu, ichakaze njengembali.”—Isaya 35:1.

Bantfu bajabulile futsi basebenta ndzawonye emhlabeni lolipharadisi. — Nkulunkulu ufuna siphile ngenjabulo emhlabeni lomusha

UMdali wetfu wenta umhlaba ngendlela yekutsi ukhone kutivusetela. Siyati nekutsi, Nkulunkulu utawusebentisa emandla akhe kuze alungise umhlaba, futsi utawuhlala ulikhaya lebantfu kuze kube phakadze.—Tihlabelelo 37:11, 29; Sembulo 21:5.

Ungabhekana kanjani nekukhatsateka ngemphi ye-nuclear?

Labanye bangase bacindzeteleke ngenca yekwesaba imphi ye-nuclear kanye nemiphumela yayo. Tetsembiso teliBhayibheli kanye neseluleko salo kungasita labo labacindzetelekile kutsi bakhone kubhekana nalesimo futsi kunciphise nekwesaba labanako. Kanjani?

LiBhayibheli letsembisa likusasa lelihle ngemhlaba kanye nangebantfu labahlala kuwo. Kufundza ngaletetsembiso kungaba “njengelihhuka lemkhumbi letimphilo tetfu,” lelisinciphisela kucindzeteleka. (KumaHebheru 6:19, umbhalo longentasi) Singaphindze sinciphise kukhatsateka ngekutsi sicabange ngetinkinga tangalelolanga kunekutsi sikhatsateke ngalokungahle kwenteke esikhatsini lesitako. Njengobe Jesu asho kutsi, ‘lilanga nelilanga litawuba netinkinga talo.’—Matewu 6:34.

Kubalulekile kutsi sitinakekele kuze sitokhona kucabanga kahle futsi sihlale sehlise umoya. Loku singakwenta ngekutsi sigweme kufundza, nobe kubukela kwatiswa lokungasenta kutsi sicindzeteleke, lokungafaka ekhatsi kwatiswa lokumayelana netindzaba takamuva letimayelana ne-nuclear. Loku akusho kutsi siyakubalekela kwati ngaloko lokwentekako. Kunaloko, senta konkhe lesingakwenta kuze sigweme kukhatsateka ngetintfo lesingeke sikhone kutilawula nalokungenteka tingenteki.

“Kukhatsateka kuyayicindzetela inhlitiyo yemuntfu, Kodvwa emavi lamnandzi ayayijabulisa.”—Taga 12:25.

Tinike sikhatsi sekungacabangi ngetindzaba letimbi, kunaloko ucabange ngetintfo letinhle letenteke ekuphileni kwakho.

“Shengatsi Nkulunkulu lonikana litsemba anganenta nijabule kakhulu futsi aninike nekuthula ngenca yekutsi netsembele kuye.”—KubaseRoma 15:13.

Titfombe: Indvodza ibuke embili ngekuciniseka. 1. Ngemuva kwayo kunemphi lokufaka ekhatsi indiza yemasotja, tikhali te-nuclear kanye nentfutfu lefana nemafu. 2. Embikwayo kunemhlaba lohlobile, lonekuthula, lonetintsaba, tihosha letiluhlata, imifula legeletako kanye netinyoni. — LiBhayibheli lisetsembisa likusasa lelihle

Kufundza lokunyenti ngetetsembiso taNkulunkulu kungakuniketa litsemba injabulo kanye nekuthula.

LiBhayibheli liyakhuluma yini nge-Amagedoni ye-nuclear?

Labanye bantfu bacabanga kutsi i-Amagedoni nemphi ye-nuclear yintfo yinye. Kungenteka bacabanga kanjalo ngenca yemiphumela yaletentakalo.

Nobe kunjalo, liBhayibheli lisebentisa ligama lelitsi “Amagedoni” nalisho imphi emkhatsini ‘wemakhosi emhlaba wonkhe’ nobe bohulumende bebantfu naNkulunkulu.a (Sembulo 16:14, 16) I-Amagedoni angeke ibhubhise sinoma kanjani yente umonakalo longabangwa yibhomu ye-nuclear. Kunaloko, nge-Amagedoni, Nkulunkulu utawubhubhisa bantfu lababi kuphela, lokutawenta kutsi kube nekuthula sibili kanye nekulondzeka.—Tihlabelelo 37:9, 10; Isaya 32:17, 18; Matewu 6:10.

Likhona yini likhambi ngetimphi eBhayibhelini?

“Ucedza timphi emhlabeni wonkhe. Wephula butjoki, ephule nesikhali sibe ticucu; Futsi ushisa tincola temphi ngemlilo.”—Tihlabelelo 46:9.

Jehovab Nkulunkulu utawusebentisa ligunya lakhe etikwe tive letilwako ngekutsi acedze kungevani kwato futsi abhubhise netikhali tato temphi. Loko utawukwenta ngekutsi asebentise uMbuso wakhe lokunguhulumende wasezulwini lotawubusa emhlabeni wonke.—Danyela 2:44.

UMbuso waNkulunkulu utawufundzisa bantfu indlela yekuphila ngekuthula nangebunye. Ngenca yekutsi kutawube kubusa hulumende munye kutawuba bete kungevani, nebantfu ngeke basafundza kulwa timphi! (Mikha 4:1-3) Utawuba yini umphumela? “Nguloyo naloyo utawuhlala ngephansi kwesihlahla sakhe semagilebisi nangephansi kwesihlahla sakhe semakhiwa, futsi kute lotabesabisa.”—Mikha 4:4.

a Fundza sihloko lesitsi, “Iyini Impi Ye-Armagedoni?”lesitfolakala ngesiZulu.

b Jehova ligama laNkulunkulu. (Tihlabelelo 83:18) Fundza sihloko lesitsi, “Ungubani Jehova?”

Incwadzi yeSembulo iyakhuluma yini ngemphi ye-nuclear?

Labanye bantfu bacabanga kutsi incwadzi yeSembulo ikhuluma ngemonakalo lobangelwa yimphi ye-nuclear. (Sembulo 6:14; 8:7-12; 16:1-21) Sibonelo nje, ikhuluma ‘ngemlilo lowehla uvela ezulwini ute emhlabeni.’ (Sembulo 13:11-13) BoFakazi BaJehova bayacondza kutsi loko kusho emabhomu e-atom lasetjentiswa ngeMphi Yelive Yesibili, hhayi imphi ye-nuclear.

Ngisho nobe incwadzi yeSembulo ikhuluma ngetintfo letentiwa yimphi ye-nuclear, kodvwa ayikhulumi ngemininingwane leyetfusako yalesentakalo. Nawufundza incwadzi yeSembulo khumbula kutsi:

Lencwadzi isebentisa tibonakaliso nobe timphawu lokungakafaneli sititsatse njengobe tinjalo.—Sembulo 1:1.
Lencwadzi ayikentelwa kutfusa bantfu. Kunaloko, umlayeto wayo uletsa injabulo kulabo labawucondzako futsi bawusebentise.—Sembulo 1:3.

Kuze utfole lokunyenti, fundza sihloko lesitsi, “Incwadi YesAmbulo—Isho Ukuthini?”lesitfolakala ngesiZulu.