Bosopolitiki Becwayisa Ngekusondzela Kwe-Amagedoni—Litsini LiBhayibheli?

NgeMsombuluko ekuseni, mhlaka-10 October 2022, iRussia ibhombe emadolobha lehlukahlukene ase-Ukraine njengobe beyitiphindziselela kuloko i-Ukraine lekwentile emalangeni lamabili ngembikwaloko, lokukubhomba libhuloho lelikhulu lelihlanganisa iRussia neCrimea. Letentakalo tenteke ngekushesha nje ngemuva kwekutsi kube netecwayiso tabosopolitiki tekutsi kungenteka madvutane kube ne-Amagedoni.

• “Asikaze sicabange kutsi sitawuphindze sisondzele kangaka ku-Amagedoni kusukela kuloko lokwenteka endzabeni [yaMengameli wase-U.S., John F.] Kennedy kanye neTikhali Temphi LebetiseCuba. . . . Angicabangi kutsi umuntfu [angasebentisa] sikhali se-nuclear ngaphandle kwekutsi loko kubangele i-Amagedoni.”—Mengameli wase-U.S. Joe Biden, nga-October 6, 2022.

• Mengameli wase-Ukraine, Volodymyr Zelensky nakabutwa ngemiphumela yekusebentisa tikhali te-nuclear, watsi: “Ngiyavuma kutsi lena yi-Amagedoni, futsi loko kubeka umhlaba wonkhe engotini.”—Tindzaba te-BBC, tanga-October 8, 2022.

Kusetjentiswa kwetikhali te-nuclear kutawubangela i-Amagedoni yini? Litsini liBhayibheli?

Tikhali Te-Nuclear Titawubangela I-Amagedoni Yini Vele?

Cha. Ligama lelitsi “Amagedoni” livela kanye nje kuphela eBhayibhelini kuSembulo 16:16. Alisho imphi lesemkhatsini wetive, kodvwa lisho imphi lesemkhatsini waNkulunkulu kanye ‘nemakhosi emhlaba wonkhe.’ (Sembulo 16:14) Nkulunkulu utawusebentisa imphi ye-Amagedoni kuze acedze kubusa kwebantfu.—Danyela 2:44.

Kuze utfole lokunyenti ngekutsi yini letakwenteka emhlabeni ngesikhatsi se-Amagedoni, fundza sihloko lesitsi Iyini Impi Ye-Armagedoni? lesitfolakala ngesiZulu.

Umhlaba kanye nako konkhe lokukuwo kutawubhujiswa yimphi ye-nuclear yini?

Cha. Ngisho nobe babusi lababantfu bangasebentisa tikhali te-nuclear esikhatsini lesitako, Nkulunkulu angeke abavumele kutsi babhubhise umhlaba. LiBhayibheli litsi:

• “Umhlaba utawuhlala ukhona kuze kube phakadze.”—Umshumayeli 1:4.

• “Labalungile batawudla lifa lemhlaba, futsi bahlale kuwo kuze kube phakadze.”—Tihlabelelo 37:29.

Nobe kunjalo, siphrofetho seliBhayibheli kanye netintfo letentekako kulamalanga kuyakhombisa kutsi sisondzela esikhatsini selushintjo emlandvweni webantfu. (Matewu 24:3-7; 2 KuThimothi 3:1-5) Tfola kutsi liBhayibheli litsini ngelikusasa ngekutsi usebentise sifundvo seliBhayibheli samahhala.