Iyini Imphi Ye-Amagedoni?

Lokushiwo liBhayibheli

Imphi ye-Amagedoni yimphi yekugcina letawuba khona emkhatsini wabohulumende bebantfu naNkulunkulu. Labohulumende bebantfu kanye nalabo lababasekelako bamelene naNkulunkulu ngisho kwamanje, ngobe abafuni kutitfoba ngephansi kwekubusa kwakhe. (Tihlabelelo 2:2) Imphi ye-Amagedoni itawucedza kubusa kwabohulumende bebantfu.​—Danyela 2:44.

Ligama lelitsi “Amagedoni” livela kanye kuphela eBhayibhelini, kuSembulo 16:16. Ngekusho kwetiphrofetho, incwadzi yeSembulo iveta kutsi ‘emakhosi emhlaba wonkhe’ atawubutselwa ndzawonye emphini yelilanga lelikhulu laNkulunkulu Somandla, “endzaweni ngesiHebheru lebitwa ngekutsi yi-Amagedoni.”​—Sembulo 16:14.

Bobani labatawulwa nge-Amagedoni? Jesu Khristu utawuhola libutfo lasezulwini lelitawuncoba titsa taNkulunkulu. (Sembulo 19:11-16, 19-21) Letitsa tifaka ekhatsi labo labamelene neligunya laNkulunkulu kanye nalabo labangamhloniphi.​—Hezekeli 39:7.

Itawuba se-Middle East yini imphi ye-Amagedoni? Cha. Imphi ye-Amagedoni itawuba semhlabeni wonkhe hhayi endzaweni yinye nje kuphela.​—Jeremiya 25:32-34; Hezekeli 39:17-20.

Ligama lelitsi Amagedoni, ngaletinye tikhatsi lelibitwa ngekutsi “Har–​Magedoni” (NgesiHebheru Har Meghiddohnʹ), lisho “iNtsaba yaseMegido.” IMegido bekulidolobha lebelisendzaweni yaka-Israyeli wasendvulo. Umlandvo usitjela ngetimphi letalwiwa madvutane nalelidolobha, lokufaka letinye lokubhalwe ngato eBhayibhelini. (Tikhulu 5:19, 20; 2 Emakhosi 9:27; 23:29) Nobe kunjalo, ligama lelitsi Amagedoni angeke kwenteke lisho lendzawo mbamba lebeyisedvute naseMegido yasendvulo. Kute intsaba lenkhulu kulendzawo, ngisho Nendzawo Lebekile yaseJezreyeli yincane kakhulu kutsi ingamumatsa onkhe lamabutfo latawulwa naNkulunkulu. Kunaloko, i-Amagedoni isho sento sekugcina lesitawutsatfwa tive temhlaba wonkhe kuze timelane nekubusa kwaNkulunkulu.

Titawuba njani timo ngesikhatsi semphi ye-Amagedoni? Ngisho nobe singati kutsi Nkulunkulu utawasebentisa njani emandla akhe kodvwa angasebentisa loko lakusebentisa esikhatsini lesindlulile lokufaka ekhatsi, sangcotfo, kutamatama kwemhlaba, imvula lehambisana netikhukhula, umlilo nesibabule, umbane, kanye nesifo. (Jobe 38:22, 23; Hezekeli 38:19, 22; Habakhuki 3:10, 11; Zakhariya 14:12) Ngenca yekudideka, letinye titsa taNkulunkulu titawubulalana todvwa, kodvwa ekugcineni kwako konkhe titawubona kutsi nguNkulunkulu lolwa nato.​—Hezekeli 38:21, 23; Zakhariya 14:13.

I-Amagedoni itawusho kuphela kwelive yini? Ayisho kubhujiswa kwemhlaba ngobe umhlaba wentelwe kutsi sihlale kuwo kuze kube phakadze. (Tihlabelelo 37:29; 96:10; Umshumayeli 1:4) I-Amagedoni angeke ibhubhise bonkhe bantfu, kunaloko itawubasindzisa ngobe “sicumbi lesikhulu” setikhonti taNkulunkulu sitawusindza.​—Sembulo 7:9, 14; Tihlabelelo 37:34.

Nanobe ligama lelitsi “live” lisho umhlaba eBhayibhelini, kodvwa ngaletinye tikhatsi lingasho bantfu lababi labavukela Nkulunkulu. (1 Johane 2:15-17) Ngako i-Amagedoni itawuletsa ‘kuphela kwalelive.’​—Matewu 24:3, King James Version.

Itawucala nini imphi ye-Amagedoni? Nakakhuluma ‘ngekuhlupheka lokukhulu’ lokutawuholela emphini ye-Amagedoni, Jesu watsi: “Macondzana nalelolanga neli-awa, kute lowatiko, tingilosi emazulwini atati ngisho neNdvodzana ayati, kodvwa nguBabe kuphela lowatiko.” (Matewu 24:21, 36) Nobe kunjalo, liBhayibheli liyaveta kutsi i-Amagedoni itawucala ngesikhatsi sekuba khona kwaJesu ngalokungabonakali lesacala nga-1914.​—Matewu 24:37-39.