I-Amagedoni—Batsi Iyini Labanye Bantfu?

“Lemimoya yabutsela ndzawonye emakhosi endzaweni lekutsiwa yi-Amagedoni ngesiHebheru.”—SEMBULO 16:16.

YINI loyicabangako nawuva ligama lelitsi “Amagedoni”? Kungenteka kutsi ucabanga inhlekelele lenkhulu. Nanobe ligama lelitsi Amagedoni livela kanye eBhayibhelini, betindzaba nebaholi bemasontfo balisho kanyenti.

Imibono leyatiwa bantfu labanyenti yaloko labacabanga kutsi kuyi-Amagedoni iyahambisana yini neliBhayibheli? Imphendvulo yalombuto ibalulekile. Kungani kunjalo? Ngesizatfu sekutsi kutfola emaciniso nge-Amagedoni kungakukhulula ekwesabeni lite, kukhanyise umbono wakho ngelikusasa, kuphindze kushintje umbono lonawo ngaNkulunkulu.

Ase ucabangele lemibuto lemitsatfu lelandzelako uphindze ucatsanise imibono ledvumile nge-Amagedoni naloko lokufundziswa liBhayibheli nge-Amagedoni.

1. I-AMAGEDONI IYINHLEKELELE LETAWUBANGELWA BANTFU YINI?

Tintsatseli nebacwaningi bavame kusebentisa ligama lelitsi “Amagedoni” nabachaza tinhlekelele letibangelwa bantfu. Sibonelo saloko kutsi Timphi Temhlaba letimbili tivame kubitwa ngekutsi tiyi-Amagedoni. Ngemuva kwaleto timphi, bantfu bebakhatsatekile ngekutsi live laseMelika kanye neSoviet Union atakulwa asebentisa tikhali tembubhiso. Tintsatseli tibita lemphi lecatjangwako ngekutsi “yi-Amagedoni yemabhomu.” Esikhatsini salamuhla, bacwaningi labesaba kutsi kungcoliswa kwemhlaba kutawubanga tingucuko letinkhulu esimeni selitulu, becwayisa bantfu ngaloko labakubita ngekutsi “yi-Amagedoni yesimo selitulu.”

Loko lokushiwo yimibono yabo nge-Amagedoni: Bantfu banemandla laphelele ekulawula likusasa lemhlaba nako konkhe lokuphila kuwo. Nangabe bohulumende behluleka kusitsatsa ngekushesha sinyatselo lesikhombisa kuhlakanipha, umhlaba utawukonakala ungasalungiseki.

Loko lokufundziswa liBhayibheli: Nkulunkulu ngeke avumele bantfu kutsi babhubhise umhlaba. LiBhayibheli lisitjela kutsi Jehovaa ‘akawudalelanga kutsi ubete lutfo’ umhlaba “kodvwa wawubumbela kutsi uhlale bantfu.” (Isaya 45:18) Kunekutsi avumele umhlaba kutsi woniwe bantfu, Nkulunkulu ‘utawubhubhisa babhubhisi bemhlaba.’—Sembulo 11:18.

2. I-AMAGEDONI IYINHLEKELELE YEMVELO YINI?

Ngaletinye tikhatsi, tintsatseli tisebentisa ligama lelitsi “Amagedoni” kute tichaze tehlakalo temvelo letinkhulu. Sibonelo saloko kutsi nga-2010 lomunye umbiko wakhuluma nge-“‘Amagedoni’ yaseHaiti.” Lombiko bewuchaza kuhlupheka, umonakalo, nekufa kwebantfu lobekubangelwe kutamatama kwemhlaba lokukhulu lokwahlasela lonkhe lelolive. Tintsatseli kanye nalabakha emafilimu basebentisa leligama hhayi kuphela nabachaza tintfo lesetentekile kodvwa baphindze balisebentise nabachaza loko labacabanga kutsi kusetakwenteka. Sibonelo saloku kutsi basebentise leligama lelitsi “Amagedoni” kute bachaze lokucatjangwa kutsi kutawuba yimiphumela ngesikhatsi lenye yemaplanethi lamancane ishayisana nemhlaba.

Loko lokushiwo yimibono yabo: I-Amagedoni sehlakalo lesitawubulala wonkhe umuntfu ngekungakhetsi, ngisho nalabamsulwa. Kuncane longakwenta kute utivikele kuyo.

Loko lokufundziswa liBhayibheli: I-Amagedoni akusiyo imphi letawubulala bonkhe bantfu ngekungakhetsi. Esikhundleni saloko, bantfu lababi kuphela labatawubhujiswa nge-Amagedoni. LiBhayibheli letsembisa kutsi “emvakwesikhashana benti balokubi bayawunyamalala, uyakutsi uyabafuna bangabe basatfolakala.”—Tihlabelelo 37:10.

3. NGE-AMAGEDONI, NKULUNKULU UTAWUBHUBHISA YINI UMHLABA?

Bantfu labanyenti labakholwako bakholelwa kutsi kutawuba nelilanga lekugcina lapho buhle kanye nebubi butawukulwa lokutawuphumela ekubhujisweni kwemhlaba. Luhlolo lolwentiwa yinhlangano lokutsiwa yi-Princeton Survey Research Associates eMelika, lwaveta kutsi emaphesenti langu-40 ebantfu labakhulile lokwacocwa nabo bakholelwa kutsi umhlaba utawubhubha “emphini ye-Amagedoni.”

Loko lokushiwo yimibono yabo: Bantfu abadalelwanga kuphila emhlabeni phakadze futsi nemhlaba awudalelwanga kuhlala phakadze. Nkulunkulu wadala bantfu anemgomo wekutsi bafe bonkhe ngekuhamba kwesikhatsi.

Loko lokufundziswa liBhayibheli: LiBhayibheli lifundzisa kutsi Nkulunkulu “wasimisa umhlaba etikwetisekelo tawo, kuze ungatanyatanyiswa, phakadze naphakadze.” (Tihlabelelo 104:5) Mayelana nebantfu, liBhayibheli litsi: “Labalungile bayawudla lifa lemhlaba, bahlale kulo kuze kube phakadze.”—Tihlabelelo 37:29.

Kuyacaca kutsi timfundziso teliBhayibheli tehlukile emibonweni yebantfu levamile nge-Amagedoni. Kodvwa-ke litsini liciniso ngalendzaba?

[Umbhalo longentansi]