Liciniso Nge-Amagedoni
“Bekungimimoya yemadimoni . . . Beyiphumele kuyawuhlanganisa emakhosi emhlaba wonkhe . . . Lemimoya yabutsela ndzawonye emakhosi endzaweni lekutsiwa yi-Amagedoni ngesiHebheru.”—SEMBULO 16:14, 16.
I-AMAGEDONI ligama lendzawo kodwa-ke lendzawo akukho lapho yake yatfolakala khona emhlabeni.
Limelelani-ke leligama lelitsi “Amagedoni”? Kwentiwa yini kutsi ngaletinye tikhatsi lihlotjaniswe nesentakalo lesifanana nemphi?
Kubutselwa Endzaweni Lokutsiwa Yi-Amagedoni
Ligama lesiHebheru lelitsi Har–Magedon lisho “iNtsaba yaseMegido.” Ngisho nome ingazange seyike ibe khona lentsaba kodvwa ikhona indzawo lebitwa ngekutsi yiMegido. Lendzawo itfolakala endzaweni lebekuhlangana kuyo imigwaco lesemkhatsini weNyakatfo neNshonalanga yendzawo lobekuhlala kuyo sive saka-Israyeli endvulo. Timphi letinyenti betilwelwa eceleni kwaleyondzawo. Kungaleso sizatfu-ke, ligama lelitsi Megido lahlotjaniswa nemphi.a
Nanobe kunjalo, lokumelelwa yiMegido akusiko kutsi ngutiphi timphi letalwa kuyo kodvwa kutsi kungani talwelwa lapho. IMegido beyiyincenye yeLive Lesetsembiso Nkulunkulu Jehova laliniketa ema-Israyeli. (Eksodusi 33:1; Joshuwa 12:7, 21) Wafunga kuwo kutsi abetawavikela etitseni tawo, futsi loko wakwenta. (Dutheronomi 6:18, 19) Nasi sibonelo, Jehova wavikela ema-Israyeli eMigido ngesikhatsi ahlaselwa libutfo leNkhosi yaseKhanani Jabini nendvuna yakhe yelibutfo, Sisera.—Tikhulu 4:14-16.
Ngako-ke ligama lelitsi “Har–Magedon” nobe “Amagedoni,” limelela lokutsite lokubalulekile. Lihlotjaniswa nemphi lesemkhatsini wemabutfo lamabili lanemandla.
Siphrofetho lesikuSembulo sikhuluma ngesikhatsi lesitako lapho Sathane nemadimoni akhe enta bohulumende bebantfu kutsi bahlanganise emabutfo abo kute balwe nebantfu baNkulunkulu. Umphumela walokuhlasela utawuba kufa kwetigidzi tebantfu ngalesikhatsi Nkulunkulu abhubhisa labalwa nebantfu bakhe.—Sembulo 19:11-18.
Kungani Nkulunkulu, liBhayibheli lelimchaza ngekutsi ‘unesihawu, uyephuta kutfukutsela, futsi ugcwele lutsandvo,’ atawubhubhisa bantfu labanyenti kangaka? (Nehemiya 9:17) Kute sicondze tento taNkulunkulu, kudzingeka siphendvule imibuto lemitsatfu: (1) Ngubani lotawucala lemphi? (2) Kungani Nkulunkulu atawungenela kuyo? (3) Lemphi, itawuba namiphi imiphumela letawutsatsa sikhatsi lesidze kulomhlaba nakubantfu labahlala kuwo?
1. NGUBANI LOTAWUCALA LEMPHI?
Imphi ye-Amagedoni, akusiso sento selunya lesitakwentiwa nguNkulunkulu. Esikhundleni saloko, Nkulunkulu utawuvikela bantfu labalungile kulabo labafuna kubapitjita. Bahlaseli kulemphi ‘ngemakhosi emhlaba wonkhe.’ Kungani ahlasela? Ngesizatfu sekutsi Sathane utawulawula bohulumende bebantfu kanye nelibutfo lakhe kutsi bahlasele bantfu labakhonta Nkulunkulu Jehova.—Sembulo 16:13, 14; 19:17, 18.
Njengobe kulamanye emave inkhululeko yekukhuluma kanye nenkholo kutsatfwa njengalokubalulekile, umbono wekutsi bohulumende bangativimbela nobe batiyekelise tinkholo ungabonakala uyintfo lengeke yenteke kodvwa kuhlaselwa lokunjalo kwenteka esikhatsini lesengcile futsi kuyenteka nanyalo.b Nome kunjalo, kunemehluko lokabili emkhatsini wekuhlaselwa lokwenteka esikhatsini lesengcile kanye naloko lokuhlobene ne-Amagedoni. Kwekucala, kuhlasela kwe-Amagedoni kutawuba semhlabeni wonkhe. Kwesibili, sinyatselo lesitawutsatfwa nguNkulunkulu Jehova sitawuba sikhulu kwendlula nome ngabe ngusiphi sinyatselo lake wasitsatsa esikhatsini lesengcile. (Jeremiya 25:32, 33) Nalichaza lemphi liBhayibheli litsi ‘yimphi yelilanga lelikhulu laNkulunkulu, Somandla.’
2. KUNGANI NKULUNKULU ATAWUNGENELA?
Jehova uyala labo labamkhontako kutsi babe nekuthula futsi batsandze titsa tabo. (Mikha 4:1-3; Matewu 5:43, 44; 26:52) Ngaleso sizatfu, bantfu bakhe ngeke batsatse tikhali tekutivikela nasekufika lokuhlaselwa lokubi kangaka. Nangabe Nkulunkulu angabavikeli bantfu bakhe, batawucotfulwa. Nakungenteka loko, kungona libito laNkulunkulu Jehova. Nangabe labantfu labanelunya baphumelela kucotfula bantfu baKhe, loko kungenta kutsi Jehova abonakale angumuntfu lote lutsandvo, longakalungi nobe longasitani. Intfo lenjalo ngeke yenteke!—Tihlabelelo 37:28, 29.
Nkulunkulu akafuni kubhubhisa nome ngabe ngubani. Ngaleso sizatfu, uniketa bantfu secwayiso ngaloko latakwenta. (2 Phetro 3:9) Ngekulandzisa lokuseBhayibhelini, ukhumbuta bonkhe bantfu kutsi esikhatsini lesengcile abeyingena nangabe bantfu bakhe bahlaselwa. (2 Emakhosi 19:35) LiBhayibheli liphindze lecwayise ngekutsi esikhatsini lesitako ngesikhatsi Sathane nelibutfo lakhe lelibantfu bahlasela bantfu baNkulunkulu, Jehova utawungenela alwe nalabo labalwa nebantfu bakhe. Ecinisweni liVi laNkulunkulu kadze lasho kutsi Jehova utawubhubhisa lababi. (Taga 2:21, 22; 2 Thesalonika 1:6-9) Ngaleso sikhatsi bahlaseli ngeke bangabate kutsi sebacale kulwa naSomandla.—Hezekeli 38:21-23.
3. NGUMIPHI IMIPHUMELA LETAWUTSATSA SIKHATSI LESIDZE LETAWULETFWA NGULEMPHI?
Emphini ye-Amagedoni kutawusindziswa tigidzi tebantfu. Ecinisweni, lemphi iyindlela letasiholela emhlabeni lonekuthula.—Sembulo 21:3, 4.
Incwadzi yeSembulo ikhuluma ‘ngesicumbi lesikhulu’ lesitawusindza kulemphi. (Sembulo 7:9, 14) Ngekucondziswa nguNkulunkulu, lesicumbi lesikhulu sebantfu sitawenta umhlaba ube liPharadisi lebekuyinjongo yaNkulunkulu yasekucaleni.
Siyati yini kutsi kuhlaselwa kwebantfu baNkulunkulu kutawufika nini?
[Imibhalo lengentansi]
a Kuhlotjaniswa kwendzawo nemphi kuyintfo levamile. Sibonelo saloko kutsi, lidolobha laseJapan iHiroshima, lelabhonjwa ngemabhomu, nyalo seliluphawu lwekwesatjiswa ngemphi yemabhomu.
b Kubulawa kwetigidzi temaJuda eMphini Yemhlaba Yesibili kusibonelo semetamo yabohulumende yekucedza tinkholo netinhlanga tebantfu. Ngesikhatsi sekubusa kwemaKhomanisi, onkhe emacembu etinkholo labengephansi kwe-Union of Soviet Socialist Republic abecindzetelwe kakhulu. Fundza sihloko lesitsi “Abantu Abanokuthula Balwela Igama Labo Elihle,” ku-Sicongosekulindza sa-May 1, 2011, lesishicilelwe boFakazi BaJehova, lesitfolakala ngesiZulu.
[Sitfombe ekhasini 6]
Nkulunkulu Jehova wavikela bantfu bakhe endvulo
[Sitfombe ekhasini 7]
Jehova utawuphindze abavikele bantfu bakhe emphini ye-Amagedoni