Itawufika Nini Imphi Ye-Amagedoni?

“Ngabona sicumbi lesikhulu sebantfu lesingeke sibalwe ngumuntfu. Kwakubantfu lababephuma etiveni tonkhe, nasemindenini yonkhe, nasemaveni onkhe, nasetilimini tonkhe . . . labaphume ekuhluphekeni lokukhulu.”—SEMBULO 7:9, 14.

INKHUNDLA seyime ngemumo kute imphi ye-Amagedoni icale. Ngubani lowente loko?

Licembu lebantfu labakhonta Jehova emhlabeni wonkhe labaphila ngemitsetfo yeliBhayibheli, selivele likhona. Ngekusekelwa nguNkulunkulu, tigidzi letivela kuto tonkhe tive, tinhlanga netilwimi tihlangana ndzawonye takhe buzalwane bemhlaba wonkhe. Lobuzalwane bemhlaba wonkhe buyatfolakala kuboFakazi BaJehova.—Johane 13:35.

Masinyane, Sathane utawuhlanganisa emabutfo akhe ahlasele labantfu labanekuthula futsi lababonakala bangakavikeleki. (Hezekeli 38:8-12; Sembulo 16:13, 14, 16) Singaciniseka njani ngaloko? LiBhayibheli likhuluma ngetintfo letitakwenteka letitasisita sati kutsi imphi ye-Amagedoni itawufika nini. Linyenti taletintfo setiyagcwaliseka.

Tintfo Lotibona Tigcwaliseka

Bafundzi baJesu bambuta kutsi bantfu bebatawukwati njani kutsi sekusondzele ‘kuphela kwetikhatsi.’ (Matewu 24:3) Jesu wabaphendvula ngekubatjela ngesikhatsi lesitako nakatsi, “ngobe sive siyawuvukela lesinye sive, nembuso uyawuvukela lomunye umbuso. Kuyawuba khona tindlala nekutamatama kwemhlaba tindzawo ngetindzawo.” Waphindze watsi: “Konkhe loku kukucala kwemihelo.” (Matewu 24:7, 8) Umphostoli Pawula wachaza lesikhatsi ngekutsi ‘ngemalanga ekugcina,’ watsi lawo malanga “tikhatsi letimatima.” (2 Thimothi 3:1) Uyabona yini kutsi letiphrofetho tichaza tintfo lotibona tigcwaliseka lamuhla?

Kungani kutawuba sikhatsi lesimatima kangaka lesi? Umphostoli Johane usitjela sizatfu saloko. Watsi kutawuba ‘nesikhatsi lesifishane,’ lapho imisebenti yaSathane neyemademoni akhe itawenteka emhlabeni kuphela. Kulesikhatsi lesiphila kuso, Sathane uchazwa ‘njengalonentfukutselo lenkhulu.’ (Sembulo 12:7-12) Uyabona yini kutsi lamuhla bantfu banelulaka nebudlova lobukhulu, hhayi endzaweni letsite kuphela kodvwa emhlabeni wonkhe?

Jesu waphindze watsi kulesikhatsi sebumatima lobukhulu, kutawufezwa nemsebenti lobaluleke kakhulu. Watsi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe, bese-ke kuyefika kuphela.” (Matewu 24:14) BoFakazi BaJehova lamuhla bashumayela lelivangeli ngeMbuso emaveni langetulu kwa-235 ngetilwimi letingetulu kwa-500. Bashicilela bomagazini lababili, Sicongosekulindza ne-“Phaphama!,” lokubomagazini labasekelwe eBhayibhelini labasakatwa kakhulu emhlabeni wonkhe. BoFakazi sebahumushe liBhayibheli ngetilwimi letingaba ngu-100. Umsebenti wabo wentiwa ngemavolontiya futsi usekelwa ngeminikelo yekutitsandzela. Kungenteka yini kutsi lomkhankaso wekushumayela lobaluleke kangaka ukugcwaliseka kwesiphrofetho saJesu?

LiBhayibheli liveta tintfo letitawuholela emphini letawubasemkhatsini waNkulunkulu Jehova kanye nebantfu labamphikisako. Cabanga nganati tiphrofetho letintsatfu lotatibona tigcwaliseka.

Tintfo Lotatibona Tenteka Ngekushesha

Siphrofetho 1. LiBhayibheli litsi tive titawukhipha simemetelo lesibalulekile ‘sekuthula nenhlalakahle.’ Tingase ticabange kutsi tikhonile kusombulula tinkinga letinkhulu. Nanobe kunjalo, tintfo letitawulandzela ngemuva kwalesimemetelo ngeke tikhombise kutsi kunekuthula.—1 Thesalonika 5:1-3.

Siphrofetho 2. Lokutawulandzela, bohulumende labehlukahlukene batawuncuma kutitsatsela sinyatselo tinhlangano tetinkholo letisemhlabeni wonkhe. EBhayibhelini, labohulumende bamelelwa silo lesibovu futsi tonkhe tinkholo temanga emhlabeni timelelwa ngumfati logibele lesilo lesibovu. (Sembulo 17:3, 15-18) Lesilo lesisifananiso sitawenta loko lokufunwa nguNkulunkulu ngekubhubhisa tinkholo temanga letitsi timelela Nkulunkulu.

Ngenkhulumo lesifananiso, umphostoli Johane uyichaza ngalendlela lendzaba: “Letimphondvo letilishumi lotibonile nesilo tiyawuyitondza lengwadla; tiyawukutsatsa konkhe lenako tiyishiye ingcunu, tidle inyama yayo, tiyishise ngemlilo. Ngobe Nkulunkulu ukufake etinhlitiyweni tato kutsi tifeze injongo yakhe.”—Sembulo 17:16, 17.

Siphrofetho 3. Ngemuva kwekuphumelela kuhlasela inkholo yemanga, Sathane utawuhlanganisa tive kute tihlasele bantfu labakhonta Nkulunkulu Jehova.—Sembulo 7:14; Matewu 24:21.

Wena Utawutsintseka Njani?

Nangabe ungakaze ube nelitfuba lekutadisha liBhayibheli ngekucophelela, kungase kube matima kukholelwa kutsi letiphrofetho lesisandza kukhuluma ngato titawugcwaliseka. Sikhona sizatfu lesiphatsekako sekwetsemba kutsi yonkhe imininingwane yato itawugcwaliseka futsi loko kutawenteka masinyane. Tiphrofetho teliBhayibheli letinyenti lesetigcwalisekile tiyasicinisekisa ngaloko.a

Kungaba njani nawungatiniketa sikhatsi ubute boFakazi BaJehova kutsi kungani bona baciniseka kutsi “imphi yelilanga lelikhulu laNkulunkulu, Somandla” isedvute futsi kungani kungakafaneli kutsi uyesabe? Bavumele kutsi bacoce nawe ngalokushiwo liBhayibheli mayelana nalokufanele ukwente kute ube semkhatsini webantfu labavikelwa nguNkulunkulu Jehova. (Sembulo 16:14) Lotakutfola kungase kuwushintje umbono wakho ngelikusasa.

[Umbhalo longentansi]

[Emavi lacashuniwe lasekhasini 8]

Kungenteka yini kutsi umsebenti waboFakazi BaJehova ungulesinye setiphrofetho teliBhayibheli letigcwalisekako?