Ukhona Yini Hulumende Lonekuthula Longabusa Umhlaba?​—Litsini LiBhayibheli?

Bohulumende emhlabeni wonkhe badidekile. Ngisho nemave labonakala ngatsi anekuthula, bohulumende bawo bahlaziswe yimibiko lemibi ngabosopolitiki, tinkinga telukhetfo, kungevani etindzabeni tepolitiki kanye netiphitsiphitsi.

LiBhayibheli liveta kutsi munye-vo hulumende lonekuthula. Kungenteka sewuke weva ngalohulumende. Ngulowo Jesu Khristu lakhuluma ngawo emthantazweni losibonelo.

• “Ngako-ke kufanele nithantaze ngalendlela:‘Babe wetfu losemazulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.’”​—Matewu 6:9, 10.

Litsini liBhayibheli ngaloMbuso?

LoMbuso nguhulumende lonekuthula

LoMbuso ubusa usezulwini.

• Jesu wabita lohulumende ngekutsi ‘nguMbuso wemazulu.’ (Matewu 4:17; 5:3, 10, 19, 20) Kungaleso sizatfu atsi: “UMbuso wami awusiyo incenye yalelive.”​—Johane 18:36.

LoMbuso utawutsatsa sikhundla sabohulumende bebantfu.

• LiBhayibheli litsi: ‘LoMbuso . . . utawupitjita yonkhe lemibuso [yebantfu] uyicedze, futsi ngiwo wodvwa lotawuma kuze kube phakadze.’​—Danyela 2:44.

LoMbuso lotawubuswa nguJesu Khristu njengeNkhosi, angeke ubhujiswe.

• LiBhayibheli litsi: “Kubusa kwakhe kutawuhlala phakadze futsi angeke kuphele, nembuso wakhe angeke ubhujiswe.”​—Danyela 7:13, 14.

LoMbuso utawuletsa kuthula kanye nekulondzeka emhlabeni.

• LiBhayibheli litsi: “Bonkhe bantfu bayawuhlala ngekuthula, ngulowo nalowo esivinini sakhe nasemikhiweni yakhe, kubete lobesabisako.”​—Mikha 4:4, LiBhayibheli LesiSwati Lelivamile.

Fundza lokunyenti ngaloMbuso

Ngesikhatsi Jesu alapha emhlabeni, wacitsa sikhatsi sakhe “ashumayela tindzaba letimnandzi letimayelana neMbuso.” (Matewu 9:35) Waphindze waphrofetha watsi:

• “Letindzaba letimnandzi teMbuso titawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.”​—Matewu 24:14.

Lamuhla, letindzaba letimnandzi teMbuso tishunyayelwa emaveni langetulu kwalangu-240. Sikumema kutsi ufundze kabanti ngalohulumende futsi ubone nekutsi ungazuza njani ekubuseni kwawo.

Sicela ubukele i-video letsi Uyini UMbuso WaNkulunkulu?