Siyini Sifundvo SeliBhayibheli Lesichutjwa BoFakazi BaJehova?
BoFakazi BaJehova banendlela lengakusita utfole loko lokufundziswa liBhayibheli. Loluhlelo lwetfu lwekutadisha liBhayibheli lungakusita kutsi:
Ube nemphilo lejabulisako
Ube ngumngani waNkulunkulu
Ufundze loko liBhayibheli lelisifundzisa kona ngelikusasa
Kuleli likhasi
Ngingacala yini ngetifundvo letimbalwa kuze ngibone kutsi ngiyakujabulela yini kufundza?
Ngingalisebentisa yini lihumusho lami leliBhayibheli nangifundza?
Yini leyentekako nasitadisha nemuntfu liBhayibheli?
Umuntfu lotadisha nawe liBhayibheli utakusita ulati kancono. Usebentisa incwadzi letsi Jabulela Kuphila Kuze Kube Phakadze! kancane kancane utawufundza loko lokushiwo liBhayibheli kanye nendlela lelingakusita ngayo. Kuze utfole lokunyenti, bukela le-video.
Kufanele ngibhadale yini kuze ngifundze?
Cha. Silandzela umyalo Jesu lawuniketa balandzeli bakhe: “Niphiwe mahhala, nani phanini mahhala.” (Matewu 10:8) Labo labatadisha nebantfu liBhayibheli ababhadalwa, futsi akudzingeki ukhokhe imali kuze utfole liBhayibheli nobe incwadzi letsi Jabulela Kuphila Kuze Kube Phakadze!
Sidze kangakanani lesifundvo?
Lencwadzi inetifundvo letingu-60. Kutawuya ngawe kutsi ufuna kufundza kangakhi, kodvwa bantfu labanyenti bajabulela kufundza sifundvo sinye nobe letimbalwa ngeliviki.
Ngingenta njani kuze ngicale kufundza?
1. Gcwalisa lifomu leliku-internet. Lemininingwane yakho loyibhale kulelifomu sitayisebentisela kuphela kukutfolela umuntfu lotawutadisha nawe liBhayibheli.
2. Loyo lotakusita utadishe liBhayibheli utawuchumana nawe. Utakuchazela loko lokufanele ukulindzele njengobe nitadisha liBhayibheli, utawuphindze akunikete timphendvulo tayo yonkhe imibuto lonayo.
3. Ninaloyo lenitadisha naye ningahlela kutsi nitawutadisha nini futsi kanjani. Ningatadisha nibonana nobe ngelucingo, nge-video call, ngekubhalelana incwadzi, nobe nge-email. Lokutadisha liBhayibheli kungatsatsa li-awa, kodvwa kungaba kudze nobe kube kufisha kunaloko, kuye ngekutsi ngukuphi lokukulungelako.
Ngingacala yini ngetifundvo letimbalwa kuze ngibone kutsi ngiyakujabulela yini kufundza?
Yebo. Loko ungakwenta ngekutsi ugcwalise lifomu leliku-internet. Lona lotawutadisha nawe nakachumana nawe, matise kutsi ufuna kutadisha sikhashana kuze ubone kutsi ungakujabulela yini. Utawusebentisa incwajana letsi Jabulela Kuphila Kuze Kube Phakadze! lenetifundvo letintsatfu tekucalisa kuze akusite ubone kutsi ungakujabulela yini lokufundza.
Nangivuma kufundza liBhayibheli angeke yini bese ngicindzetelwa kutsi ngibe ngulomunye waBoFakazi BaJehova?
Cha. Tsine BoFakazi BaJehova siyakutsandza kufundzisa bantfu liBhayibheli, kodvwa asicindzeteli muntfu kutsi ajoyine inkholo yetfu. Kunaloko, siveta loko lokushiwo liBhayibheli ngenhlonipho ngobe siyati kutsi wonkhe umuntfu unelilungelo lekutikhetsela loko lafuna kukukholelwa.—1 Phetro 3:15.
Ngingalisebentisa yini lihumusho lami leliBhayibheli nangifundza?
Yebo, ungasebentisa nobe ngabe nguliphi lihumusho leliBhayibheli lolitsandzako. Nanobe sikujabulela kusebentisa Lihumusho Lemhlaba Lomusha LemiBhalo Lengcwele ngobe licacile fusi lishaya emhlolweni, siyati kutsi bantfu labanyenti bakhetsa kusebentisa emahumusho abo ngobe ngiwo labawetayele.
Ngingabamema yini labanye kutsi nabo babe khona nasifundza?
Yebo. Ungawubita wonkhe umndeni wakho nobe bangani bakho kutsi babe khona nawufundza.
Nangabe ngike ngafundza liBhayibheli naBoFakazi BaJehova esikhatsini lesendlulile, ngingaphindze ngifundze yini?
Yebo. Ecinisweni, ungakujabulela kakhulu kufundza manje kunangalesikhatsi ugcina ngobe indlela yekufundza nyalo seyitfutfukisiwe kuze ivumelane netidzingo tebantfu lamuhla. Sekunetitfombe letinyenti kanye nema-video futsi sekucocwa kakhulu nyalo kunasetincwadzini betisetjentiswa esikhatsini lesendlulile.
Ikhona yini indlela yekutsi ngitifundzele mine liBhayibheli ngaphandle kwekusitwa ngulomunye umuntfu?
Yebo. Ngisho nobe labanye bantfu bafundza kahle nakunalobasitako, kodvwa labanye bakhetsa kutifundzela bona nabasacala. Likhasi letfu lelitsi Emathulusi Ekutadisha LiBhayibheli liveta emathulusi kanye nalokunye lokungakusita utadishe liBhayibheli mahhala. Nanka emathulusi longawatfola alusito:
I-Online Bible Study Lessons. Letifundvo letiyincociswano tiphendvula leminye yemibuto lebalulekile ekuphileni njengaletsi, Ungubani Nkulunkulu? Kungani kunekuhlupheka kanye nebubi? Nkulunkulu uyoke akucedze yini kuhlupheka?
Ema-Video EliBhayibheli. Lama-video lamafisha achaza timfundziso letibalulekile letiseBhayibhelini.
Timphendvulo Temibuto Lemayelana NeliBhayibheli. Letihloko tiniketa timphendvulo temibuto leminyenti lemayelana neliBhayibheli.
Tihloko letitsi Bible Verses Explained. Tichaza emavesi eliBhayibheli lamanyenti latiwako.