Kutfutfukisa Emakhono Etfu Emsebentini Wekushumayela—Kuchuba Sifundvo SeliBhayibheli Ngencwadzi Letsi Lokufundziswa LiBhayibheli

Kubaluleke Ngani?: Bantfu labanyenti bangahle bangeva kutsi sisho kutsini nasitsi sicela kubachubela tifundvo teliBhayibheli tasekhaya tamahhala. Bangase bacabange kutsi kudzingeka bajoyine licembu lelitsite nobe bente letifundvo ngeliposi. Kunekutsi simane sicele kubachubela sifundvo, yini singaveli sibakhombise kutsi sichutjwa njani? Ngemizuzu nje lembalwa, ngisho nome ume emnyango, ungakhona kukhombisa umuntfu kutsi kungaba lula futsi kube lusito kangakanani kutadisha liBhayibheli.

Indlela Yekukwenta:

Nasewutetfulile, mbute lomuntfu kutsi uyakhatsateka yini ngelikusasa.
Shano kutsi bantfu labanyenti bakhatsateke ngetintfo letifanako, bese umkhombisa likhasi lelineluhla lwalokungekhatsi encwadzini letsi Lokufundziswa LiBhayibheli. Mchazele kutsi lencwadzi inetifundvo lokumelula kuticondza letikhombisa loko liBhayibheli lelikufundzisako mayelana nelikusasa kanye naletinye tintfo, bese umbuta kutsi ngusiphi sehluko lasitsandzako.
Mnikete ikhophi yalencwadzi bese umvulela sehluko lasikhetsile. Mchazele kutsi imibuto lesekucaleni kwalesehluko iphendvulwa etigabeni letitawulandzela.
Mcele kutsi afundze sigaba sekucala nangabe ativa akhululekile kutsi angasifundza. Ngemuva kwaloko, buta umbuto waleso sigaba, bese nicoca ngemphendvulo yawo nindzawonye. Fundzani futsi nicoce ngemibhalo lekhonjiwe lesekela imphendvulo. Mkhombise kutsi wena uyidvwebele njani imphendvulo encwadzini yakho.
Fundzani sigaba lesilandzelako, kodvwa nyalo cela lomnikati welikhaya kutsi etame kuphendvula umbuto waso ngemavi akhe.
Mncome, bese uhlela kutsi uphindze ubuye kuze nitewucedzela lesehluko.
Nangabe simo sivuma, mkhombise i-video leku-jw.org lenesihloko lesitsi Yini Leyentekako Nakuchutjwa Sifundvo SeliBhayibheli?

Yetama Loku Kulenyanga:

Thantaza kuJehova umcele kutsi abusise imetamo yakho yekucala sifundvo seliBhayibheli.—Fil. 2:13.
Yetama kukhombisa indlela sifundvo seliBhayibheli lesichutjwa ngayo usebentisa incwadzi letsi Lokufundziswa LiBhayibheli, nobe usebentise i-video letsi Yini Leyentekako Nakuchutjwa Sifundvo SeliBhayibheli? lokungenani kanye nawusemsebentini wekushumayela.