Ekuhambeleni Kwekucala, Umkhombisile Yini Indlela Sifundvo SeliBhayibheli Lesichutjwa Ngayo?
Nabacelwa kuchutjelwa sifundvo seliBhayibheli, labanye banikati bemakhaya batsi bete inshisekelo nobe batsi sebavele banaso esontfweni. Ngesizatfu sekutsi abati kutsi sifundzisa liBhayibheli ngendlela leyehlukile kuyalamanye emacembu enkholo, abati kutsi bangakhanyiseleka futsi bajabule kakhulu nasibachubela sifundvo. Ngako-ke, kunekumane umtjele ngesifundvo seliBhayibheli, kungani ungetami kucitsa imizuzu lembalwa ekuhambeleni kwekucala umkhombise indlela lesichutjwa ngayo? Nasi sibonelo: Ungamane ubatjele ngesifundvo seliBhayibheli, kodvwa bakhombise kafishane. Nayi indlela longakwenta ngayo loku ngemizuzu lembalwa, usebentisa kwatiswa lokucala ekhasini 5 le-Msebenti Wetfu WeMbuso wa-March 2006:
“Ucabanga kutsi litawufika yini lilanga lapho kutawugcwaliseka khona lamavi? [Fundza Isaya 33:24, futsi ulindzele imphendvulo.] Asengikukhombise lokutsite lokujabulisako.” Niketa umnikati welikhaya incwadzi letsi Lokufundziswa LiBhayibheli, bese umcela kutsi avule likhasi 36 sigaba 22. Fundza umbuto losentansi kwelikhasi, bese umcela kutsi abuke imphendvulo njengobe wena ufundza sigaba. Phindze umbute umbuto, bese uyayilalelisisa imphendvulo yakhe. Fundzani lomunye walemibhalo ndzawonye. Phakamisa umbuto lotawuphendvula esikhatsini lesilandzelako, futsi ubeke lilanga lelicondzile lotawubuya ngalo. Sewusicalile-ke sifundvo seliBhayibheli!