Indlela Yekucecesha Labasebasha Kutsi Bashumayele
1. Wativa njani ngesikhatsi ucala kuhlanganyela emsebentini wekushumayela?
1 Usasikhumbula yini sikhatsi lowacala ngaso kuhlanganyela emsebentini wekushumayela endlini ngendlu? Kufanele kutsi wawetfukile. Nangabe wawuhamba nemuntfu lobekakufundzela nobe lomunye ummemeteli, wawukujabulela kutfola lusito lwakhe. Nyalo sewunalokuhlangenwe nako enkonzweni, sewungakwati kucecesha labasebasha kutsi nabo bashumayele.
2. Yini lokudzingeka bamemeteli labasebasha bayifundze?
2 Bamemeteli labasebasha kudzingeka bafundze indlela yekucala singeniso nemnikati welikhaya, kusebentisa liBhayibheli ensimini, kubuyela kubantfu labacoce nabo, kanye nekuchuba tifundvo teliBhayibheli. Kufanele baphindze bafundze kushumayela ngetindlela letehlukehlukene, njengekufakaza emgwacweni nasetindzaweni temabhizinisi. Ungabasita kutsi batfutfuke kuloku ngesibonelo kanye nangemibono yakho.
3. Singabasita njani labanye ngesibonelo setfu?
3 Fundzisa Ngesibonelo: Jesu wakhombisa bafundzi bakhe indlela yekushumayela. (Luk. 8:1; 1 Phet. 2:21) Nangabe uhlela kusebenta nemmemeteli localako, lungiselela kusebentisa inshumayelo lemelula lommemeteli langakwati kuyilingisa, mhlawumbe usebentise lenye yaleto letitfolakala etincwadzini tetfu. Ngemuva kwaloko, hlela kutsi kukhulume wena emtini wekucala newesibili kute lommemeteli akuve kahle loko lokushoko. Njengobe niphuma emtini, ungase umbute kutsi uyibone iphumelela yini lenshumayelo yakho. Loku kutawumsita abone kubaluleka kwekusebenta nalabanye ensimini, futsi kutawukwenta kube melula ngaye kwemukela imibono longase uyivete ngemuva kwekutsi etfule inshumayelo yakhe.
4. Singamsita njani ummemeteli losemusha ngemuva kwekulalela inshumayelo yakhe?
4 Veta Imibono: Jesu waphindze waniketa bafundzi bakhe ticondziso letimayelana nendlela yekushumayela. (Mat. 10:5-14) Nawe ungabasita ngendlela lefananako bamemeteli labasebasha. Nasekusikhatsi sekutsi kukhulume yena, lalelisisa. Ngemuva kwekuphuma kuloyo muti, bani nemusa nawuveta imibono letsite, ngisho nalapho ubona kutsi kunesidzingo sekutsi atfutfukise inshumayelo yakhe. Usengakayiveti imibono yakho, ungase ukhetse kubona kucala kutsi uyayitfutfukisa yini inshumayelo yakhe emtini lolandzelako. Ngobe kungenteka kutsi abetfukile. Kufanele futsi ukhumbule kutsi bamemeteli bete emakhono lafananako, kantsi futsi tinyenti tindlela tekwenta intfo letsite.—1 Khor. 12:4-7.
5. Yini lesingayisho nangabe sitsatsa sinyatselo kucala sekuveta umbono lotsite?
5 Ngalesinye sikhatsi, ummemeteli losemusha angase acele imibono yakho. Kodvwa nangabe angayiceli, tsatsa sinyatselo kucala kute umsite. Ungakwenta njani loku ngekuhlakanipha? Labanye bamemeteli labanalokuhlangenwe nako bangase batsi: “Ngicela kuveta nje umbono wami” nobe batsi: “Ucabanga kutsi kuhambe njani?” Lenye indlela longakwenta ngayo loku kutsi utsi: “Ngesikhatsi nami ngisacala kushumayela ngangikutfola kumatima ku . . . kodvwa ngitfole loku kungisita. . . . ” Ngaletinye tikhatsi kungaba kuhle kutsi nihlole ndzawonye incwadzi letsi “Ukubonisana.” Kute ungamdidi, mvetele imibono letsintsa sinye sici senshumayelo yakhe.
6. Mayelana nenkonzo yasensimini, ‘insimbi iyilola njani lenye insimbi’?
6 Insimbi Ilola Lenye Insimbi: Thimothi, labengumvangeli lonalokuhlangenwe nako, wakhutsatwa nguPawula kutsi achubeke atinikela ekufundziseni futsi achubekele embili. (1 Thim. 4:13, 15) Nanobe kungenteka kutsi sekwendlule iminyaka wacala kuya enkonzweni yasensimini, kufanele ungayekeli kwetama kutfutfukisa emakhono akho. Fundza kubamemeteli loshumayela nabo, ngisho nakulabo labanalokuhlangenwe nako lokuncane enkonzweni. Kuphaphamele kusita labanye ngemusa, ikakhulukati labo labasebasha, kute nabo babe bafundzisi betindzaba letinhle labanelikhono.—Taga 27:17.