Kutfutfukisa Emakhono Etfu Emsebentini Wekushumayela—Kuniketa Bantfu Incwadzi Letsi Lokufundziswa LiBhayibheli

Kubaluleke Ngani?: Incwadzi letsi Lokufundziswa LiBhayibheli ilithulusi letfu lelihamba embili lekufundzisa. Umuntfu kufanele simnike ikhophi yakhe singakacali kufundza naye. Ngako nasishumayela, sonkhe kufanele setame kuba nelikhono lekukhuluma nebantfu ngendlela letabenta bayitsatse lencwadzi nasibanika yona. (Taga 22:29) Tinyenti tindlela tekukwenta loko futsi bamemeteli kufanele bakhetse indlela labayibona iphumelela.

Indlela Yekukwenta:

Buta umuntfu umbuto lotanenta nicoce ngesehluko lesikulencwadzi. Ungase ukhetse munye umbuto kuleyo lesekucaleni kwesehluko ngasinye. Nasakuphendvulile, fundza umbhalo lohambisana naloko lenikhuluma ngako bese umkhombisa sigaba lesimayelana naleyo ndzaba, mhlawumbe niphindze nicoce ngaso kafishane.
Lokunye longakwenta, ungasebentisa umbuto munye kulesemakhasini ekucala kulencwadzi kute wente umuntfu abe nesifiso sekucoca nawe bese umkhombisa lapho uphendvulwa. Nasi sibonelo: Ungase ukhulume ngenhlekelele lesandza kwenteka lekukhulunywe ngayo etindzabeni bese uyachaza kutsi bantfu labanyenti bafisa kutfola timphendvulo temibuto lesekhasini 3 kulencwadzi. Nobe utsi, uvakashela bomakhelwane bakho kute ucoce nabo ngetintfo letinhle likusasa lelisiphatsele tona. Ngemuva kwaloko, mkhombise titfombe letisekhasini 4 na-5 bese umbuta kutsi, “ngusiphi setsembiso longatsandza kusibona sifezeka kuleti?” Lokunye longakusho kungaba kutsi, uvakashela bantfu sikhashana kute ubasite batfole timphendvulo temibuto lekhatsata bantfu labanyenti. Ngemuva kwaloko, mkhombise imibuto lesekugcineni ekhasini 6 bese uyambuta kutsi ngumuphi langatsandza kutfola imphendvulo yawo.
Vele ucele kufundza naye liBhayibheli. Ungase utsi: “Sikhombisa bomakhelwane betfu lencwadzi lesisita ekufundzeni liBhayibheli. Uke wayibona yini? [Lindzela imphendvulo.] Nawunesikhashana, ngingatsandza kukukhombisa kutsi ungayifundza njani usebentisa liBhayibheli lakho.”

Yetama Loku Kulenyanga:

Loku kuphrakthizeni ngesikhatsi sekukhonta kwemndeni.
Nawusensimini coca nalabanye bamemeteli ngenshumayelo lohlele kuyisebentisa. (Taga 27:17) Yishintje inshumayelo yakho nangabe ungayiboni imiphumela lemihle.