Sihloko Lesisha Sekucalisa Tifundvo TeliBhayibheli
1. Ngusiphi sihloko lesisha lesitawuvela ku-Sicongosekulindza, futsi sentelweni?
1 Kusukela nga-February, kutawuvela sihloko lesisha ku-Sicongosekulindza lesitawusisita sicalise tifundvo teliBhayibheli. Lesihloko sitsi “Fundza EVini LaNkulunkulu.” Ngisho nobe labanye ensimini yetfu batawukujabulela kutifundzela lesihloko, kahle-kahle sentelwe kutsi sisisebentise nasicoca nemnikati welikhaya.
2. Yini lecuketfwe ngulesihloko?
2 Lesikucuketse: Lesihloko kanye netihlokwana taso tibhalwe taba mibuto kute ukwati kubuta umnikati welikhaya nawucoca naye. Imibhalo leyinhloko ikhonjiwe, kodvwa ayikacashunwa, kute umnikati welikhaya atewujabulela kuyifundza ngalokucondzile eVini laNkulunkulu. Lesihloko sinetigaba letimfishane longatifundza ngisho ume emnyango. Ngasinye sikucondzisa encwadzini letsi Lokufundziswa LiBhayibheli kute ukwati kwendlulela kuyo nasekufanele.
3. Nasishumayela emtini ngemuti, singasicalisa njani sifundvo seliBhayibheli sime emnyango sisebentisa lesihloko?
3 Indlela Yekusisebentisa: Nawuhambisa bomagazini ungase ubute umbuto lovusa inshisekelo lomayelana nalesihloko. Nasi sibonelo: Kumagazini wa-February 1, lesihloko sikhuluma ngekubaluleka kweliBhayibheli. Ungase umbute utsi: “LiBhayibheli ulitsatsa njengeliVi laNkulunkulu yini, nobe njengencwadzi lenhle nje kuphela? [Lindzela imphendvulo.] Ngikuphatsele lokutsite lokujabulisako lokukhuluma ngalendzaba.” Mkhombise umbuto wekucala, ufundze sigaba sekucala, bese ufundza umbhalo lokhonjiwe. Phindze ufundze lombuto, bese umcela kutsi aphendvule. Cocani ngekwatiswa lokulingene sikhatsi leninaso, futsi niphendvule lemibuto ngekulandzelana kwayo. Ngembikwekutsi uhambe, buta umbuto lolandzelako bese uhlela kuphindze ubuyele kute nicoce ngawo. Buyela kuye liviki ngalinye, futsi uchubeke ucoca naye ngalesihloko kute kube ngulapho sewetfula magazini lolandzelako. Lenye indlela longayisebentisa kuvele ucele kumchubela sifundvo seliBhayibheli. Sebentisa lesihloko kute umkhombise indlela sifundvo seliBhayibheli lesichutjwa ngayo.
4. Singasisebentisa njani lesihloko nasibuyela kubantfu?
4 Lesihloko lesisha ungasisebentisa kubantfu lobahambisela magazini njalo kanye nakulabo lobuyela kubo. Ungase utsi: “Kunesihloko lesisha lesiku-Sicongosekulindza. Ngicela kukukhombisa indlela yekusisebentisa.” Sithandazela kutsi lesihloko lesisha sisite bantfu labanyenti “bafinyelele ekulatini liciniso.”—1 Thim. 2:4.