Ukhona Mbamba Yini Develi?
Lokushiwo liBhayibheli
Yebo, Develi ukhona mbamba. ‘Ungumbusi walelive,’ usidalwa semoya lesabasibi futsi savukela Nkulunkulu. (Johane 14:30; Kubase-Efesu 6:11, 12) LiBhayibheli liveta buntfu baDeveli ngalamagama netinchazelo:
Sathane, lokusho “Umphikisi.”—Jobe 1:6.
Develi, lokusho “Umnyundzeli.”—Sembulo 12:9.
Inyoka, lelisetjentiswa eBhayibhelini kuze lisho “Umdukisi.”—2 KubaseKhorinte 11:3.
Umlingi.—Matewu 4:3.
Umcambimanga.—Johane 8:44.
Akasibo bubi nobe bukhulu bebubi
Labanye batsi Sathane Develi umane nje ububi nobe bukhulu bebubi lobukitsi. Nobe kunjalo, liBhayibheli likhuluma ngencociswano leyabakhona emkhatsisini waNkulunkulu naSathane. Nkulunkulu ute sono, ngako-ke ngeke kwenteke kutsi bekakhuluma nalokutsite lokubi lokukuye. (Dutheronomi 32:4; Jobe 2:1-6) Ngendlela lefanako, Sathane walinga Jesu lebekete sono. (Matewu 4:8-10; 1 Johane 3:5) Ngako liBhayibheli likhombisa kutsi ukhona mbamba futsi akesiyo nje intfo lemelela bubi.
Kufanele kusimangalise yini kutsi bantfu labanyenti abakholelwa kutsi Develi ukhona mbamba? Chake, ngobe liBhayibheli litsi Sathane usebentisa kuyenga kuze afeze tinjongo takhe. (2 KubaseThesalonika 2:9, 10) Lelinye lichinga lakhe lelikhulu, kwenta bantfu bacabange kutsi akekho.—2 KubaseKhorinte 4:4.
Lokunye lokungasilo liciniso ngaDeveli
Lokuliciniso: Ligama lesiHebheru lelihunyushwe ngekutsi “Lusifa” kulamanye emaBhayibheli lisho “lomanyatelako.” (Isaya 14:12) Indlela leligama lelisetjentiswe ngayo ikhombisa kutsi libhekisela eluhlwini lwemakhosi aseBhabhulona, lawo Nkulunkulu lebekatawahlaza ngenca yekutiphakamisa kwawo. (Isaya 14:4, 13-20) Leligama lelitsi “lomanyatelako” lasetjentiswa kuze kuhlekiswe ngemakhosi aseBhabhulona ngemuva kwekuncotjwa kwalo.
Lokuliciniso: Develi usitsa saNkulunkulu hhayi sisebenti sakhe. Sathane Develi uphikisa futsi acambele bantfu labakhonta Nkulunkulu emanga.—1 Phetro 5:8; Sembulo 12:10.