Siyini Siphrofetho?

Lokushiwo liBhayibheli

Siphrofetho ngumlayeto lophefumlelwe nguNkulunkulu, nobe sembulo lesivela ezulwini. LiBhayibheli litsi baphrofethi “bebakhuluma lokuvela kuNkulunkulu njengobe bebacondziswa ngumoya longcwele.” (2 Phetro 1:20, 21) Umphrofethi ngumuntfu lowemukela umlayeto kuNkulunkulu bese uwendlulisela kulabanye.​—Imisebenti 3:18.

Baphrofethi bebawutfola njani umlayeto lovela kuNkulunkulu?

Nkulunkulu wasebentisa tindlela letehlukahlukene kuze endlulisele imicabango yakhe kubaphrofethi bakhe:

• Lokubhaliwe. Nkulunkulu wayisebentisa cishe kanye lendlela ngekutsi anikete Mosi Imitsetfo Lelishumi lebhaliwe.​—Eksodusi 31:18.

• Ngekukhuluma asebentisa tingilosi. Sibonelo nje, Nkulunkulu wasebentisa ingilosi kuze itjele Mosi umlayeto lebekufanele awumikise kuFaro waseGibhithe. (Eksodusi 3:2-4, 10) Nangabe lomlayeto bekufanele wendluliswe njengobe unjalo, Nkulunkulu bekacondzisa letingilosi kutsi tisho lomlayeto njengobe tiwuvile, njengobe enta nakatjela Mosi: “Lamavi kufanele uwabhale phansi, ngobe ngalamavi ngenta sivumelwane nawe kanye nema-Israyeli.”​—Eksodusi 34:27.a

• Imibono. Ngaletinye tikhatsi baphrofethi bebabona imibono babe bangakalali. (Isaya 1:1; Habakhuki 1:1) Leminye imibono beyiba ngokocobo kangangekutsi labanye baphrofethi bebaba nencenye kuyo. (Lukha 9:28-36; Sembulo 1:10-17) Ngaletinye tikhatsi, baphrofethi bebabona imibono bangakalali, kodvwa kube shengatsi bayaphupha. (Imisebenti 10:10, 11; 22:17-21) Nkulunkulu bakaphindze endlulisele umlayeto asebentisa emaphupho, labaphrofethi nabalele.​—Danyela 7:1; Imisebenti 16:9, 10.

• Kucondziswa kwemicabango. Nkulunkulu wacondzisa imicabango yebaphrofethi bakhe kuze bendlulisele umlayeto wakhe. Bufakazi baloko ngulamavi laseBhayibhelini latsi: “Yonkhe imiBhalo iphefumulelwe nguNkulunkulu.” Emavi latsi “iphefumulelwe nguNkulunkulu” angaphindze asho kutsi Nkulunkulu uwaphefumulele.” (2 KuThimothi 3:16; The Emphasised Bible) Nkulunkulu wasebentisa umoya wakhe longcwele nobe emandla lasebentako kuze “aphefumulele” imibono yakhe etingcondvweni tetinceku takhe. Lomlayeto bewuwaNkulunkulu, kodvwa labaphrofethi bebawubeka ngemavi abo.​—2 Samuweli 23:1, 2.

Siphrofetho siveta loko lokutokwenteka esikhatsini lesitako kuphela yini?

Cha, siphrofetho seliBhayibheli asikhulumi ngelikusasa nje kuphela. Nobe kunjalo, imilayeto leminyenti levela kuNkulunkulu ikhuluma ngelikusasa ngisho nobe loko kungavetwa ngalokucondzile. Nasi sibonelo, baphrofethi baNkulunkulu bebahlale becwayisa ema-Israyeli asendvulo ngetindlela tawo letimbi. Letecwayiso betiveta tibusiso lebebatatitfola nabalalela kanye netintfo letimbi lebetitobavelela nabangalaleli. (Jeremiya 25:4-6) Umphumela lebebatawutfola bewutokuya ngekutsi ema-Israyeli akhetse kulalela yini nobe cha.​—Dutheronomi 30:19, 20.

Tibonelo tetiphrofetho letiseBhayibhelini letingakhulumi ngelikusasa

• Ngalesinye sikhatsi lapho ema-Israyeli acela Nkulunkulu kutsi awasite, Nkulunkulu watfumela umphrofethi lowawachazela kutsi akakawasiti ngenca yekutsi akawulaleli umtsetfo wakhe.​—Tikhulu 6:6-10.

• Ngesikhatsi Jesu akhuluma nemfati waseSamariya, waveta tintfo lomfati latenta esikhatsini lesendlulile lebekutintfo lebekangatati kuphela ngesembulo lesivela ezulwini. Lomfati wabona kutsi Jesu ngumphrofethi ngisho nobe bekangakakhulumi lutfo ngelikusasa.​—Johane 4:17-19.

• Nakutekwa licala laJesu, titsa takhe tamumbonya buso tase titsi kuye: “Phrofetha-ke! Ngubani lokushayile?” Betingafuni kutsi Jesu aphrofethe ngelikusasa kunaloko betifuna asebentise emandla lavela ezulwini kuze asho kutsi ngubani lona lomshayile.​—Lukha 22:63, 64.