Uyini Umbono WaBoFakazi BaJehova Ngedivosi?

Sinamatsela kuloko lokushiwo liBhayibheli ngemshado nangedivosi. Nkulunkulu wasungula umshado kutsi ubesibopho lesihlala njalo emkhatsini wendvodza nemfati. LiBhayibheli liveta kutsi sizatfu sedivosi sinye, bugwadla.​—Matewu 19:5, 6, 9.

BoFakazi bayabasita yini labashadene labanetinkinga emshadweni?

Yebo, bayabasita ngetindlela letehlukahlukene:

• Ngetincwadzi. Letincwadzi tiba netihloko leticinisa umshado, ngisho naleyo lebonakala ungatsi angeke isalungiseka. Nasi sibonelo, fundza nati tihloko “Ukuzibophezela Emshadweni Wakho,” “Indlela Yokuthethelela,” nalesitsi “Ukuphinde Wakhe Ukwethenjwa.” Letitfolakala ngesiZulu.

• Ngemihlangano. Kulemihlangano sifundza ngeteluleko letiseBhayibhelini longatisebentisa emshadweni. Loku sikwenta emihlanganweni yelibandla, emihlanganweni lemincane kanye nalemikhulu.

• Labadzala belibandla. Labadzala belibandla bahlala phansi nalaba labashadene kuze babanikete lusito loluseBhayibhelini. Bangabasita banake kakhudlwana seluleko lesiKubase-Efesu 5:22-25.

Labadzala belibandla bangamncumela yini Fakazi kutsi adivose nobe cha?

Cha. Ngisho nobe labadzala belibandla bangacelwa kutsi basite laba labashadene balungise tinkinga tabo temshado, kodvwa abakavumeleki kutsi babatsatsele sincumo. (KubaseGalathiya 6:5) Nobe kunjalo, nangabe lotsite ancuma kudivosa ngaphandle kwesizatfu lesiseBhayibhelini, imibhalo ayimvumeli loyo mutfu kutsi aphindze ashade.​—1 KuThimothi 3:1, 5, 12.

Uyini umbono waboFakazi ngekuhlala ngekwehlukana?

LiBhayibheli likhutsata labashadene kutsi bahlale ndzawonye ngisho nobe banetinkinga. (1 KubaseKhorinte 7:10-16) Tinkinga letinyenti tingacatululeka nangabe labalabashadene bathantaza, basebentisa timiso letiseBhayibhelini futsi bakhombisana kutsi bayatsandzana.​—1 KubaseKhorinte 13:4-8; KubaseGalathiya 5:22.

Nobe kunjalo, kunetimo letingetulu kwemandla letente lamanye emaKhristu ancuma kuhlala ngekwehlukana nalabo lashade nabo. Letimo tingafaka ekhatsi nati:

• Kungondli ngemabomu.​—1 KuThimothi 5:8.

• Kuhlukumeteka lokukhulu.​—Tihlabelelo 11:5.

• Kuphikiswa lokumatima lokungenta buhlobo bemuntfu naJehova bube sengotini. Sibonelo nje, Umuntfu loshade naFakazi angahle amcindzetele kutsi ephule imitsetfo yaNkulunkulu. Lona locindzetelwako angahle ancume kutsi kuhlala ngekwehlukana nalona lashade naye kuyindlela lencono yekulalela ‘Nkulunkulu njengobe angumbusi kunekutsi alalele bantfu.’​—Imisebenti 5:29.