Umbono WeliBhayibheli Ngedivosi Nangekuhlala Ngekwehlukana

Jehova ulindzele kutsi labo labashadile bahlale batsembekile etifungweni tabo temshado. Ngesikhatsi ashadisa indvodza yekucala nemfati wekucala, Jehova watsi: ‘Ngako-ke indvodza . . . iyawunamatsela kumfati wayo, bese baba nyamanye.’ Ngekuhamba kwesikhatsi, Jesu Khristu naye waphindza emavi lafananako, futsi wengeta: “Ngako-ke loko lakuhlanganisile Nkulunkulu, akungabe kusehlukaniswa ngumuntfu.” (Genesisi 2:24; Matewu 19:3-6) Ngako-ke, Jehova naJesu babheka umshado njengebuhlobo baphakadze lobuphela lapho lomunye walabo labashadile afa. (1 Khorinte 7:39) Ngenca yekutsi umshado ulilungiselelo lelingcwele, idivosi akukafaneli itsatfwe melula. Ecinisweni, Jehova uyayitondza idivosi lengakasekelwa imiBhalweni.​—Malakhi 2:15, 16.

Ngutiphi tizatfu letisemBhalweni tekudivosa? Jehova uyabutondza bundlundlulu nekuphinga. (Genesisi 39:9; 2 Samuweli 11:26, 27; Tihlabelelo 51:4) Uyabunyanya bundlundlulu kangangekutsi uyayivumela idivosi lapho loshadile aye wahlanganyela kubo. (Kute ubone kutsi buhlanganisani bundlundlulu, catsanisa neSehluko 9, sigaba 7, lapho bundlundlulu buchazwe khona.) Jehova uniketa lona loshadile lowoniwe lilungelo lekukhetsa kutsi uyamcolela yini lona lashade naye lowonile nobe ufuna kumdivosa. (Matewu 19:9) Ngako-ke, lapho lona loshadile lowoniwe akhetsa kudivosa, usuke angenti intfo letondvwa nguJehova. Ngesikhatsi lesifananako, libandla lebuKhristu lite lilungelo lekumkhutsata kutsi adivose. Ecinisweni, kuletinye timo lona lowetsembekile angase akhetse kumtsetselela loyo lashade naye, ikhakhulukati nangabe aphendvuka ngebucotfo. Ekugcineni labo labanetizatfu letisemiBhalweni tekudivosa kufanele batincumele bona, futsi kufanele bakulungele kubhekana nemiphumela yaloko.​—Galathiya 6:5.

Etimeni letingetulu kwemandla, lamanye emaKhristu aye akhetsa kuhlala ngekwehlukana nobe kudivosa loyo lashade naye ngisho nobe angakenti bundlundlulu. Etimeni letinjalo, liBhayibheli litsi loyo lowehlukana naloyo lashade naye kufanele ‘ahlale angashadi nome ke abuyisane naye.’ (1 Khorinte 7:11) UmKristu lonjalo akukafaneli acabangele kushada nalomunye umuntfu. (Matewu 5:32) Asewucabangele nati timo letimbalwa letingetulu kwemandla, labanye labaye batitsatsa njengetizatfu tekwehlukana.

Kungondli ngemabomu. Umndeni ungase uphuye, weswele ngisho netidzingo letibalulekile tekuphila, ngenca nje yekutsi indvodza ayifuni kuwondla ngisho nobe ingakwati kwenta njalo. LiBhayibheli litsi: “Nangabe umuntfu anganakekeli . . . umndeni wakhe, sewukulahlile kukholwa; futsi kwenta kwakhe kubi kakhulu kunekwemuntfu longakholwa.” (1 Thimothi 5:8) Nangabe lowo muntfu angafuni kugucuka, umfati angase akhetse kuphephisa inhlalakahle yakhe neyebantfwana bakhe ngekutsi atfole imvume lesemtsetfweni yekuhlala ngekwehlukana. Labadzala labangemaKhristu kufanele baluhlolisise kahle ludzaba lwendvodza lengumKhristu lengafuni kondla umndeni wayo. Kungondli umndeni wakho kungaholela ekususweni ekuhlanganyeleni.

Kuhlukumeteka lokukhulu. Umuntfu loshadile lonebudlova angase abeyingoti kangangekutsi imphilo yalona lashade naye ibe sengotini. Nangabe lona lonebudlova angumKhristu, labadzala belibandla kufanele bayihlolisise lendzaba. Lulaka kanye nebudlova mikhuba lengabangela umuntfu asuswe ekuhlanganyeleni.​—Galathiya 5:19-21.

Kuphikisa lokumatima lokungenta buhlobo bemuntfu naJehova bube sengotini. Umuntfu loshadile angase avimbele loyo lashade naye kutsi angahlanganyeli ekukhonteni kweliciniso, nobe etame kumenta ephule imitsetfo yaNkulunkulu. Esimeni lesinjalo, loyo lophikiswako kuyawudzingeka ancume kutsi indlela lekukuphela kwayo ‘yekulalela Nkulunkulu kunekulalela bantfu’ kutfola imvume lesemtsetfweni yekuhlala ngekwehlukana yini.​—Imisebenti 5:29.

Kuto tonkhe timo letingetulu kwemandla njengaleti lesicoce ngato, akekho lonelilungelo lekuphocelela loyo loshadile lote licala kutsi ahlale ngekwehlukana naloyo lashade naye nobe achubeke ahlala naye. Ngisho nobe bangani labavutsiwe kanye nalabadzala belibandla bangase basekele futsi banikete seluleko lesiseBhayibhelini, angeke batati tonkhe tintfo letenteka emkhatsini wendvodza nemfati. NguJehova kuphela lobona konkhe lokwentekako. Kuliciniso kutsi umfati longumKhristu utawube angamhloniphi Nkulunkulu nobe lilungiselelo lemshado nangabe ecisa lapho akhuluma ngetinkinga temndeni wakhe kute nje ahlale ngekwehlukana nendvodza yakhe. Kuyafanana nangendvodza lengumKhristu lapho yenta loku kute nje ihlale ngekwehlukana nemkayo. Jehova ukwati konkhe lokubangela kuhlala ngekwehlukana, ngisho nobe umuntfu angetama kangakanani kukufihla. Phela “kute sidalwa lesifihlakele kuNkulunkulu, kodvwa konkhe kusebaleni kwembuliwe emehlweni alowo lekufanele sitilandze kuye.” (Hebheru 4:13) Kepha nangabe lesimo lesiyingoti siloko sichubeka, kute lokufanele amsole umKhristu logcina ancume kuhlala ngekwehlukana naloyo lashade naye. Ekugcineni, “sonkhe siyakuma embikwesihlalo sekwehlulela saNkulunkulu.”​—Roma 14:10-12.