Mariya NguMake WaNkulunkulu Yini?

Lokushiwo liBhayibheli

Chake, akasiye. LiBhayibheli alifundzisi kutsi Mariya ngumake waNkulunkulu, futsi aliwatjeli emaKhristu kutsi amkhulekele nobe amgcamise.a Cabanga ngaloku:

Mariya akazange sekatibite ngekutsi ungumake waNkulunkulu. LiBhayibheli lisitjela kutsi watala “iNdvodzana yaNkulunkulu,” hhayi Nkulunkulu.—Makho 1:1; Lukha 1:32.
Jesu Khristu akazange atsi Mariya ngumake waNkulunkulu nobe atsi kufanele ahlonishwe ngalokukhetsekile. Kunaloko, walungisa lokwashiwo ngulomunye wesifazane lobekacabanga kutsi Mariya kufanele aphatfwe njengemuntfu lobalulekile ngobe ungumake waJesu. Watsi: “Cha, bayajabula labo labeva livi laNkulunkulu futsi baligcine!”—Lukha 11:27, 28.
Ticu letitsi “Make waNkulunkulu” nalesitsi “Theotokos” (Lotala Nkulunkulu) atikho eBhayibhelini.
Lamagama latsi “iNkhosikati yeLizulu” latfolakala eBhayibhelini akabhekiseli kuMariya, kodvwa abhekisela kunkulunkulukati wemanga lobekakhulekelwa ngema-Israyeli labetihlubuki. (Jeremiya 44:15-19) ‘LeNkhosikati yeLizulu’ kungenteka bekungu-Ishtar (Astarte), lomunye nkulunkulukati waseBhabhilona.
EmaKhristu ekucala akazange akhonte Mariya, nome amnikete sikhundla lesitsite lesikhetsekile. Lesinye sati semlandvo nasikhuluma ngemaKhristu ekucala, satsi “abengeke avume kutihlanganisa neluhlelo lokunjalo lekukhonta, futsi kungenteka bekesaba kutsi kuniketa Mariya sikhundla kungase kuwente asolwe ngekukhonta nkulunkulukati lotsite.”—In Quest of the Jewish Mary.
LiBhayibheli litsi Nkulunkulu abesolo akhona. (Tihlabelelo 90:1, 2; Isaya 40:28) Njengobe ete sicalo, akanaye make. Ngetulu kwaloko, Mariya bekangeke sekakhone kutfwala Nkulunkulu esiswini sakhe; ngobe liBhayibheli likwenta kucace kutsi ngisho nemazulu akakwati kumtfwala.—1 Emakhosi 8:27.

Mariya—NguMake WaJesu Hhayi “Make WaNkulunkulu”

Mariya abengumJuda ngekutalwa, futsi abewesitukulwane seNkhosi Davide. (Lukha 3:23-31) Nkulunkulu wambonisa umusa lokhetsekile ngenca yekutsi abenekukholwa lokucinile futsi atinikele kuye. (Lukha 1:28) Nkulunkulu wamkhetsa kutsi abengumake waJesu. (Lukha 1:31, 35) Mariya kanye nendvodza yakhe Josefa, batala nalabanye bantfwana.—Makho 6:3.

Nanobe liBhayibheli lisitjela kutsi Mariya waba ngumfundzi waJesu, kute leminye imininingwane leliyishoko ngaye.—Imisebenti 1:14.

Yini leyenta labanye bantfu bacabange kutsi Mariya ngumake waNkulunkulu?

Bufakazi bekucala bekutinikela kwaMariya kuNkulunkulu busukela ngasekupheleni kwelikhulu lesine C.E. Ngaleso sikhatsi, liSontfo lemaKatolika laba yinkholo yeMbuso wemaRoma. Ngenca yaloko, labanyenti labebete umsuka webuKhristu, base baba ngemaKhristu. Lenye yetimfundziso lebeyikangakasekelwa eBhayibhelini leyemukelwa ngulelisontfo bekuyimfundziso yaMtsatfu Amunye.

Lemfundziso yaMtsatfu Amunye yenta labanyenti kulelisontfo baphetsa ngekutsi nangabe Jesu anguNkulunkulu, kusho kutsi Mariya ngumake waNkulunkulu. Nga-431 C.E., umkhandlu welisontfo lebelise-Efesu, lamemetela ngalokusemtsetfweni kutsi Mariya “nguMake waNkulunkulu.” I-Mariolatry, lokukugcamisa Mariya ngalokwecile—kwandza kakhulu ngemuva kwaloMkhandlu wase-Efesu. Njengoba bantfu labebete umsuka webuKhristu bajoyina lelisontfo lemaKatolika, kusetjentiswa kwetithico kanye netitfombe teNtfombi Mariya kwacala kwandza futsi kwatsatsa indzawo yabonkulunkulukati babo bentalo, labafaka ekhatsi Artemis (lobitwa ngekutsi nguDiana eRoma) kanye na-Isis.

Nga-432 C.E., Papa Sixtus III wakhokha umyalo wekutsi kwakhiwe lisontfo eRoma kute kuhlonishwe “Make waNkulunkulu.” Lelisontfo lakhiwa eceleni kwelithempeli lekucala lebelakhelwe kuhlonipha Lucina, lobekangunkulunkulukati wentalo yebantfwana waseRoma. Lomunye umbhali wachaza lelisontfo ngekutsi “laba luphawu lolucinile lekwemukela kukhontwa kwaMariya esikhundleni saMake Lomkhulu welicembu lenkholo yebantfu labebete umsuka webuKhristu, ngemuva kwekuguculwa kweRoma kutsi ibe yinkholo yebuKhristu.”—Mary—The Complete Resource.

a Tinkholo letinyenti tifundzisa kutsi Mariya ngumake waNkulunkulu. Ngalesinye sikhatsi bambita ngekutsi “yiNkhosikati yeLizulu” nome Theotokos; lokuligama lesiGriki lelisho kutsi “Lotala Nkulunkulu.”