Hlakanipha Funa ‘Likhono Lekucondzisa’
Kuphila kufananiswa nekuhamba ngemkhumbi. Nobe kunjalo, kuhlakanipha kwemuntfu kubonakala kukuncane ekusiteni labanye kutsi baphumelele ekuphileni. Labanyenti babhekene netinkinga letinyenti ekuphileni. (Hla. 107:23, 27) Kungani lesifananiso ngco sifaneleka kusetjentiswa lapha?
Kadzeni, kuhamba ngemkhumbi kwakungesimelula ngobe kwakudzinga kutsi ube nalokuhlangenwe nako. Kwakulikhono lobewulifundza kubantfu lasebanesikhatsi basebenta emkhunjini nobe kubashayeli bawo. (Imis. 27:9-11) Imidvwebo leminyenti yasendvulo beyigcizelela bumcoka bemshayeli wemkhumbi ngekutsi imvete amkhulu kunalabanye. Kute bahambe ngemkhumbi, bashayeli bawo kwakudzingeka bafundze ngetinkhanyeti, umoya naletinye tintfo letihlobene nawo. LiBhayibheli lichaza bashayeli labanjalo ‘njengalabanelikhono,’ lisebentisa ligama lelisho ‘kuhlakanipha.’—Hez. 27:8.
Kucatulula tinkinga tekuphila lamuhla kungaba matima kufanane nekuhamba ngemkhumbi esikhatsini sakadzeni. Yini lengasisita?
SINGALITFOLA NJANI ‘LIKHONO LEKUCONDZISA’?
Nawucabanga ngalesifaniso ngco lesicatsanisa kuphila nekuhamba ngemkhumbi, asewucabange nganali liciniso leliBhayibheli: “Labahlakaniphile batsi bangatilalela kwengeteke lwati lwabo; nalabanengcondvo batsi bangatifundza batente, batfole [likhono lekucondzisa].” (Taga 1:5, 6) Ligama lesiHebheru lelichazwe ngekutsi ‘likhono lekucondzisa’ lichaza loko lobekwentiwa ngukaputeni wemkhumbi kadzeni. Linemcondvo wekucondzisa ngelikhono.
Nobe kudzinga umetamo, singakhona kuba ‘nelikhono lekucondzisa’ futsi siphumelele ekuphileni. Njengobe Taga tisho, kufanele sivumele “kuhlakanipha,” ‘kucondza’ kanye ‘nebucotfo bengcondvo’ kutsi kusebente ndzawonye. (Taga 1:2-6; 2:1-9) Angeke siyekele kufuna sicondziso saNkulunkulu, ngobe ngisho nebantfu lababi bangase ‘baticondzise’ ekwenteni lokubi.—Taga 12:5.
Kubalulekile-ke kutsi sibe bafundzi labakhutsele beliVi laNkulunkulu. Nasenta njalo, singafundza emaciniso laligugu ngaJehova nangaloyo lofanana naYe longuJesu Khristu. (Joh. 14:9) Sitfola teluleko letinhle emihlanganweni yebuKhristu. Ngetulu kwaloko, singafundza kulokuhlangenwe nako kwalabanye nakubatali betfu.—Taga 23:22.
BONA TINTFO KUSENESIKHATSI FUTSI UHLELE
‘Likhono lekucondzisa’ libalulekile nasititfola sisenkingeni. Nasingabata kutsi kufanele senteni nasibhekene netinkinga kungasenta sidideke futsi kube nemiphumela lemibi.—Jak. 1:5, 6.
Kuyajabulisa kutsi ligama lelitsi ‘likhono lekucondzisa’ liphindze lisetjentiswe nasemphini. Siyafundza: “Ubotsatsa umyalo lohlakaniphile [likhono lekucondzisa], nawuphuma imphi; kuncoba kusekubeni nebeluleki labalungile labanyenti.”—Taga 20:18; 24:6.
Njengemuntfu lonelikhono lekuhlela imphi, senta kahle ngekubona tingoti letitawutsikameta buhlobo betfu naJehova. (Taga 22:3) Sibonelo saloku kutsi kungase kudzingeke uncume kutsi uwutsatse yini umsebenti lomusha loniketwa wona nobe uvume kukhushulwa emsebentini. Ungase ucabange ngemholo lotawutfola, sikhatsi lotawusicitsa uya nobe ubuya emsebentini, nangalokunye. Nobe kunjalo, kunaletinye tintfo lokufanele uticabangele: Lomsebenti awushayisani yini netimiso teliBhayibheli? Ema-awa lengiwacitsa kuloyo msebenti, mhlawumbe ngisebenta emashifu atawutsintsa njani umsebenti lengiwentela Jehova?—Luk. 14:28-30.
Lomunye Fakazi waJehova libito lakhe lokunguLoretta, abesebenta kahle enkapaneni letsite. Ngesikhatsi lenkapane itawutfutsa iye kulenye indzawo, waniketwa sikhundla lesiphakeme. Umcondzisi walenkapane watsi kuye: “Leli litfuba longeke uphindze ulitfole, neliHholwa leMbuso likhona kulendzawo lesitawutfutsela kuyo.” Loretta abefuna kuphila imphilo lengabiti futsi akhonte uMdali kakhudlwana. Wabona kutsi lesikhundla lesisha sitamenta abe bete sikhatsi sekwenta imisebenti yaJehova. Ngako wawuyekela lomsebenti nanobe umcondzisi walenkapane abemtjele ngasese kutsi usisebenti labafuna kusigcina. Loretta losaneminyaka lengu-20 alihlahlandlela lelivamile, uyaciniseka kutsi imiphumela lemihle layitfola ihlobene kakhulu nekuhlela lokuhambisana ‘nelikhono lekucondzisa,’ ngekuvumelana neseluleko lesitfolakala eVini laNkulunkulu. Wacinisa budlelwane bakhe naJehova futsi wakwati kusita labanyenti kutsi bemukele emaciniso eliBhayibheli.
‘Likhono lekucondzisa’ liyadzingeka nasemndenini. Kukhulisa bantfwana akusimelula futsi kutsatsa sikhatsi. Kukhetsa lenikwentako kute nisite umndeni usondzele kuJehova nekutsi utatitfola njani tintfo tekutiphilisa, kutsintsa likusasa labo bonkhe emndenini. (Taga 22:6) Batali labangemaKhristu bangase batibute: ‘Ngaloko lesikucocako nangaloko lesikwentako, siyabafundzisa yini bantfwabetfu indlela labangakha ngayo buhlobo naJehova lokuyintfo letabasita nasebakhulile? Indlela lesiphila ngayo iyabasita yini bacondze kutsi bangayiphila njani imphilo lengabiti futsi banake kakhulu umsebenti waJehova?’—1 Thim. 6:6-10, 18, 19.
Imphumelelo sibili ayiyi ngemcebo nobe imigomo bantfu balelive labalwela kuyifinyelela. INkhosi Solomoni beyikwati kahle loko. Yaphefumulelwa kutsi ibhale: “Kuyakubahambela kahle labo labesaba Nkulunkulu, bahloniphe Nkulunkulu.” (Shu. 8:12) Loko kuveta kuhlakanipha kwekufuna ‘likhono lekucondzisa’ lelisekelwe eVini laNkulunkulu futsi lelihambisana nalo.—2 Thim. 3:16, 17.
[Sitfombe ekhasini 30]
Kute kugcizelelwe umsebenti wabo, bashayeli bemikhumbi bebavetwa njengalabo labakhulu kunalabo labanakekela imikhumbi
[Emavi laveta Umtfombo walentfo]
Su concessione del Ministero per i Beni e le Attività Culturali. Akukavumeleki kutsi siphindze sentiwe lesitfombe nobe kwentiwe emakhophi aso nganome nguyiphi indlela.