Tsatsa Sibonelo Sebaphrofethi—Zefaniya
1. Zefaniya abengumphrofethi ngephansi kwasiphi simo, futsi usibonelo lesihle ngayiphi indlela kitsi lamuhla?
1 Emkhatsini welikhulu lesikhombisa B.C.E., Bhali abekhontwa ngekukhululeka lokukhulu kaJuda. Bekusandza kubulawa Amoni, inkhosi lembi kwase kubusa iNkhosi Josiya leseyincane. (2 Khr. 33:21–34:1) Ngaleso sikhatsi, Jehova watfuma Zefaniya kutsi amemetele sehlulelo saKhe. Nanobe kungenteka kutsi Zefaniya abewasebukhosini kaJuda, akazange ehlise sisindvo semlayeto waJehova wekulahla ngelicala baholi bakaJuda. (Zef. 1:1; 3:1-4) Ngendlela lefanako, natsi senta konkhe lokusemandleni etfu kute silingise Zefaniya ngekuba nesibindzi futsi singavumeli tihlobo tetfu tisiphazamise ekukhonteni Jehova. (Mat. 10:34-37) Wawutsini umlayeto Zefaniya lawumemetela, futsi kwaba namuphi umphumela?
2. Yini lokufanele siyente kute sivikeleke ngelilanga lentfukutselo yaJehova?
2 Funani Jehova: NguJehova kuphela longasindzisa bantfu ngelilanga lentfukutselo yakhe. Kungaleso sizatfu Zefaniya ancenga emaJuda kutsi afune Jehova, afune kulunga, aphindze afune kutfobeka, sikhatsi sisekhona. (Zef. 2:2, 3) Kunjalo nalamuhla. NjengaZefaniya, sikhutsata bantfu kutsi bafune Jehova kodvwa natsi kufanele sente lokutsite, sitimisele ‘kungayekeli kulandzela Simakadze.’ (Zef. 1:6) Sifuna Jehova ngekulifundza ngekucophelela liVi lakhe kanye nekuthantaza sicele sicondziso sakhe. Sifuna kulunga ngekutiphatsa kahle. Sifuna kutfobeka ngekutsi sitimisele kutitfoba siphindze sitisebentise ngekushesha ticondziso letivela enhlanganweni yaJehova.
3. Kungani kufanele sihlale sinembono lofanele ngemsebenti wekushumayela?
3 Imiphumela Lemihle: Umlayeto wesehlulelo lowawumenyetelwa nguZefaniya wenta labanye kaJuda baphendvuka, ikakhulukati Josiya inkhosi leseyincane. Yacala kufunisisa Jehova isengumfana. Ngemuva kwaloko, Josiya wasukela lomkhulu umsebenti wekucedza kukhonta titfombe kulelive. (2 Khr. 34:2-5) Nanobe lamuhla lenye inhlanyelo yeMbuso iwela eceleni kwendlela, emadvwaleni, noma emanyeveni, lenye yona iwela emhlabatsini lomuhle bese itsela titselo. (Mat. 13:18-23) Siyaciniseka kutsi Jehova utawuchubeka abusisa imetamo yetfu njengobe sihlale simatasatasa sisakata inhlanyelo yeMbuso.—Hla. 126:6.
4. Kungani kufanele sihlale silindze Jehova?
4 Lamanye emaJuda abecabanga kutsi Jehova akasoze asitsatse sinyatselo. Noma kunjalo, Jehova wabacinisekisa bonkhe kutsi lalisedvute lilanga lakhe lelikhulu. (Zef. 1:12, 14) Bekutawusindza labo labetsembela kuye kuphela. (Zef. 3:12, 17) Njengobe sihlale silindze Jehova, shengatsi singatfola injabulo ekumkhonteni ngebunye Nkulunkulu wetfu lomkhulu sikanye nebazalwane betfu.—Zef. 3:8, 9.