SEHLUKO 8
Josaya Bekanebangani Labakahle
Ucabanga kutsi kulukhuni yini kwenta tintfo letilungile?— Bantfu labanyenti bacabanga kanjalo. LiBhayibheli lisitjela kutsi umfana lobitwa ngekutsi nguJosaya wakutfola kulukhuni kakhulu kwenta tintfo letilungile. Kodvwa bekanebangani labakahle lebebamsita kakhulu. Asesifundze kabanti ngaJosaya nangebangani bakhe.
Babe waJosaya bekungu-Amoni, inkhosi yakaJuda. Amoni bekenta tintfo letimbi kakhulu futsi akhonta netitfombe. Ngesikhatsi Amoni afa, Josaya wabekwa kutsi abe yinkhosi yakaJuda. Ngaleso sikhatsi, bekaneminyaka lesiphohlongo kuphela! Ucabanga kutsi Josaya wenta tintfo letimbi njengababe wakhe yini?— Cha, akazange!
Zefaniya wecwayisa bantfu kutsi bangatikhonti titfombe
Ngisho nobe bekasemncane kakhulu, Josaya bekafisa kulalela Jehova. Ngesizatfu saloko, wakhetsa bangani bakhe kuphela kubantfu labatsandza Jehova. Bamsita kutsi ente tintfo letilungile. Bekubobani labanye bangani baJosaya?
Lomunye umngani waJosaya bekunguZefaniya. Zefaniya bekangumphrofethi lobekacwayisa bantfu bakaJuda ngekutsi bebatawukwehlelwa tintfo letimbi nangabe bakhonta titfombe. Josaya wamlalela Zefaniya, futsi wakhonta Jehova, hhayi titfombe.
Lomunye webangani baJosaya bekunguJeremiya. Bekacishe alingane naye ngeminyaka, futsi bebahlala endzaweni leyakhelene ngesikhatsi basakhula. Bebabangani labakhulu kangangekutsi nakufa Josaya, Jeremiya wabhala ingoma lekhetsekile lechaza indlela lebekalahlekelwe ngayo. BoJeremiya naJosaya bebasitana kute bente lokulungile baphindze balalele Jehova.
BoJosaya naJeremiya basitana kuze bente tintfo letilungile
Yini longayifundza esibonelweni saJosaya?— Ngisho nangesikhatsi asengumfana lomncane, Josaya bekafisa kwenta lokulungile. Bekati kutsi kufanele abe nebangani labatsandza Jehova kuphela. Nawe yenta konkhe lokusemandleni akho kute ukhetse bangani labatsandza Jehova, nalabangakusita kutsi wente lokulungile!