SIFUNDVO 56
Josaya Abewutsandza UMtsetfo WaJehova
Josaya waba yinkhosi yakaJuda ngesikhatsi aneminyaka lengu-8 budzala. Ngalawo malanga bantfu bebenta imilingo futsi bakhonta titfombe. Ngesikhatsi Josaya aneminyaka lengu-16, wetama kufundza indlela lekahle yekukhonta Jehova. Nakaneminyaka lengu-20, waphihlita titfombe tabonkulunkulu futsi wadzilita nemalati yonkhe indzawo. Nakaneminyaka lengu-26, wahlela kutsi lithempeli laJehova lilungiswe.
Hilkiya, umPhristi Lomkhulu watfola incwadzi yemtsetfo waJehova ethempelini, lokungenteka beyibhalwe nguMosi. Shafani mabhalane weNkhosi waya nalomtsetfo kuJosaya wafike wamfundzela. Njengobe Josaya abelalele, wabona kutsi sekuphele iminyaka leminyenti bantfu bangamlaleli Jehova. Inkhosi Josaya yatsi kuHilkiya: ‘Jehova usikwatele kakhulu, hamba uyothantaza. Jehova utasitjela loko lokufanele sikwente.’ Jehova waphendvula asebentisa Hulda umphrofethikati, watsi: ‘Bantfu bakaJuda bangishiyile. Batawubajeziswa, kodvwa hhayi nakusabusa inkhosi Josaya ngobe uyangilalela.’
INkhosi Josaya nayiva lomlayeto yaya ethempelini yafike yabita bonkhe bantfu bakaJuda. Yabese ifundzela lesive umtsetfo waJehova. Josaya nalabantfu bakaJuda betsembisa kulalela Jehova ngenhlitiyo yabo yonkhe.
Besekuphele iminyaka leminyenti sive sakaJuda singaligubhi liPhasika. Ngesikhatsi Josaya afundza kulomtsetfo kutsi liPhasika kufanele ligujwe njalo ngemnyaka, watsi kulesive: ‘Kufanele sentele Jehova liPhasika.’ Ngako Josaya walungiselela kwenta iminikelo leminyenti futsi wahlela kutsi kube nalabatawuhlabela ethempelini. Lesive sabese siba neliPhasika kanye neMkhosi Wesinkhwa Lesite Imvubelo emalanga langu-7. Kusukela ngesikhatsi saSamuweli bekungakaze kube nemkhosi weliPhasika lofana nalona. Josaya abewutsandza mbamba uMtsetfo waJehova. Uyakutsandza yini wena kufundza ngaJehova?
“Livi lakho lisibane lesicondzisa tinyawo tami, futsi likukhanya lokukhanyisa indlela yami.”—Tihlabelelo 119:105