INkhosi Yekugcina Leyayilungile Ka-Israyeli

JOSAYA abeneminyaka lesiphohlongo budzala nakabekwa kuba yinkhosi yaseningizimu, embusweni wetive letimbili taka-Israyeli. Abesemncane kakhulu kutsi angaba yinkhosi, ngako kwakunebantfu labadzala labebamsita kutsi abuse sive.

Kwatsi ngemnyaka wesikhombisa wekubusa kwakhe, Josaya wacala kufuna Jehova. Walandzela sibonelo semakhosi labusa kahle, njengaDavide, Jehoshafati kanye naHezekiya. Ngako watsi asengumfanyana nje, wenta intfo lekhombisa kutsi abenesibindzi.

Kwasekusikhatsi lesidze ema-Israyeli lamanyenti enta tintfo letimbi. Abekhonta bonkulunkulu bemanga, futsi abephindze akhotsamele tithico. Ngako Josaya netinceku takhe baphuma, bacala kuphihlita tonkhe tintfo tekukhulekela kwemanga eveni. Lona kwakungumsebenti lomatima, ngoba banyenti bantfu labebakhonta bonkulunkulu bemanga. Uyambona yini Josaya kanye netinceku takhe baphihlita letithico lana esitfombeni?

Ngemuva kwaloko, Josaya wakhetsa emadvodza lamatsatfu kutsi ahole ekuvuseteleni lithempeli Jehova. Imali yayikwelekwa kubantfu, bese iniketwa lamadvodza kutsi aholele tisebenti letativusetela lithempeli. Atsi asasebenta ethempelini, umphristi lomkhulu Hilkiya watfola lokutsite lokubaluleke kakhulu. Kwakuyincwadzi yemtsetfo, leyo Jehova latsi Mosi akayibhale kadzeni. Kwase kwendlule iminyaka leminyenti yanyamalala.

Lencwadzi yatsatfwa yaletfwa kuJosaya, futsi wacela kutsi afundzelwe yona. Watsi asalalele, wabona kutsi bantfu babengasawugcini umtsetfo waJehova. Loko kwamvisa buhlungu lobukhulu, ngako wadzabula timphahla takhe, njengoba umbona lapha esitfombeni. Watsi: ‘Jehova usitfukutselele, ngoba bobabe wetfu abazange bawente wonkhe umtsetfo lobhalwe kulencwadzi.’

Josaya wase sewutfuma umphristi lomkhulu Hilkiya kutsi abatfolele loko Jehova abetakwenta kubo. Hilkiya wahamba wayokhuluma naHulda, umphrofethikati. Lomphrofethikati wamniketa lomlayeto lovela kuJehova, watsi afike awutjele Josaya. Watsi: ‘IJerusalema kanye nebantfu bonkhe batawujeziswa, ngoba bangishiyile mine bakhonta bonkulunkulu bemanga, futsi yonkhe indzawo beyigcwele bubi. Kodvwa wena Josaya, ngoba wente lokuhle watitfoba kimi, lesijeziso angeke sifike kuze kube ngulapho sewufile.’